হাৰ্ডিক নহয়, ৰোহিতেই হ’ব পাৰে মুম্বাই ইণ্ডিয়ানছৰ অধিনায়ক ! কাৰণ…
আই পি এ ২০২৫ ক লৈ সকলো দলে প্ৰস্তুতি আৰম্ভ কৰিছে। অহা মাৰ্চ মাহৰ ২২ তাৰিখৰ পৰা আৰম্ভ হব ২০২৫ বৰ্ষৰ আই পি এল। পাছে কোন দলৰ কোন অধিনায়ক সেই সম্পৰ্কে এতিয়া ঠাৱৰ হোৱা নাই কোনো কোনো দল।
কোনো দল পূৰ্বৰ অধিনায়কেই অধিনায়কত্ব কৰিব, কোনো দলৰ নতুন অধিনায়ক। ৰয়েল ছেলেঞ্জাৰ্চ বাংগালুৰুৰ সদ্যহতে ঘোষণা হয় নতুন অধিনায়কৰ নাম। ৰজত পাটিদাৰ হব এইবাৰৰ অধিনায়ক।
মুম্বাই ইণ্ডিয়ানছে বৰ্তমানেও সদৰি কৰা নাই অধিনায়কৰ নাম। আই পি এল ২০২৪ৰ পূৰ্বে মুম্বাই ইণ্ডিয়ানছে ৰোহিত শৰ্মাক আঁতৰাই হাৰ্দিক পাণ্ডিয়াক অধিনায়ক হিচাপে নিযুক্তি দিছিল। সেই সময়ত এই সিদ্ধান্তৰ তীব্ৰ বিৰোধিতা হৈছিল।
পইণ্ট তালিকাৰ একেবাৰে তললৈ নামি গৈছিল ৫ বাৰৰ চেম্পিয়ন দলটো। কিন্তু এতিয়া ২২ মাৰ্চৰ পৰা আৰম্ভ হ’বলগীয়া নতুন ছিজনৰ উদ্বোধনী মেচত হাৰ্দিকৰ ঠাইত ৰোহিত শৰ্মাই অধিনায়কত্ব কৰিব বুলি খবৰ ওলাইছে। এই সিদ্ধান্তৰ আঁৰত ফ্ৰেঞ্চাইজিৰ এটা ডাঙৰ বাধ্যবাধকতা আছে বুলি প্ৰকাশ।
দেওবাৰে সন্ধিয়া প্ৰকাশ পাইছিল আই পি এলৰ ১৮ সংখ্যক ছিজনৰ সূচী। অহা ২২ মাৰ্চত ইডেন গাৰ্ডেনত অনুষ্ঠিত হ’ব ডিফেণ্ডিং চেম্পিয়ন কেকেআৰ আৰু আৰচিবিৰ মাজত ছিজনৰ প্ৰথমখন খেল। পিছদিনা অৰ্থাৎ ২৩ মাৰ্চত আই পি এলৰ ‘এল ক্লাছিকো’ অনুষ্ঠিত হ’ব য’ত তীব্ৰ প্ৰতিদ্বন্দ্বী মুম্বাই ইণ্ডিয়ানছ আৰু চেন্নাই ছুপাৰ কিংছৰ মাজত সংঘৰ্ষ হ’ব।
চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’বলগীয়া এই হাই ভল্টেজ মেচখনত খেলিব নোৱাৰিব মুম্বাই ইণ্ডিয়ানছৰ অধিনায়ক হাৰ্দিক পাণ্ডিয়াই। যোৱা ছিজনত অভাৰ ৰেট লেহেমীয়া হোৱাৰ বাবে তেওঁক এখন মেচৰ বাবে নিষেধাজ্ঞা আৰোপ কৰা হৈছিল আৰু ৩০ লাখ টকা জৰিমনা বিহা হৈছিল। বিচিচিআইয়ে যোৱা বছৰ এক বিবৃতিত কৈছিল যে তেওঁলোকৰ দলৰ এইটো ছিজনৰ তৃতীয়টো অভাৰ ৰেট অপৰাধ, সেয়েহে পাণ্ডিয়াক জৰিমনা বিহা হৈছিল।
এনে পৰিস্থিতিত হাৰ্দিক পাণ্ডিয়াৰ অনুপস্থিতিত দলটোৱে এই দায়িত্ব প্ৰাক্তন অধিনায়ক ৰোহিত শৰ্মাৰ হাতত অৰ্পণ কৰিব পাৰে। উল্লেখ্য যে, ৰোহিতৰ অধিনায়কত্বৰ অধীনত ২০১৩, ২০১৫, ২০১৭, ২০১৯ আৰু ২০২০ বৰ্ষত ৫ বাৰ আই পি এল খিতাপ দখল কৰিছে মুম্বাই ইণ্ডিয়ানছ দলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
