অসম লাইভ২৪ঃ হাৰ্দিক পাণ্ডিয়াক মুম্বাই ইণ্ডিয়ানছ দলৰ নতুন অধিনায়ক হিচাপে ঘোষণা কৰা হৈছে। ২০২৪ চনৰ আইপিএলত পাঁচবাৰকৈ খিতাপজয়ী দলটোক নেতৃত্ব দিব হাৰ্দিকে। মোটা টকাৰ বিনিময়ত হাৰ্দিকক গুজৰাট টাইটান্সৰ পৰা ক্ৰয় কৰিছে মুম্বাই ইণ্ডিয়ানছে। সম্প্ৰতি ইণ্ডিয়ান এক্সপ্ৰেছত প্ৰকাশিত এটা ৰিপৰ্টে দাবী কৰামতে হাৰ্দিকক কেইবা কোটি টকাৰ বিনিময়ত ক্ৰয় কৰিছে মুম্বাই ইণ্ডিয়ানছে। সকলোৱে মোটা অংকৰ ধন দিয়া বুলি দাবী কৰিলেও প্ৰকৃততে হাৰ্দিকক কিমান ধনৰ বিনিময়ত মুম্বাই ইণ্ডিয়ানছে ক্ৰয় কৰিছে সেই কথা জানিব পৰা হোৱা নাই।
অৱশ্যে একাংশ সূত্ৰই দাবী কৰামতে হাৰ্দিকক ক্ৰয় কৰোতে মুম্বাই ইণ্ডিয়ানছে গুজৰাট টাইটান্সক প্ৰায় ১০০ কোটি টকা ট্ৰেন্সফাৰ কৰি দিছে। বিগত ২বছৰ ধৰি গুজৰাট টাইটান্স দলৰ হৈ খেলিছে হাৰ্দিক পাণ্ডিয়াই। হাৰ্দিকে গুজৰাট দলটোক খিতাপ জয়ৰো সোৱাদ দিছে। বিগত বছৰত হাৰ্দিকৰ নেতৃত্বতেই দলটো ফাইনেলত উঠিছে। কিন্তু নৰেন্দ্ৰ মোদী ষ্টেডিয়ামত আয়োজিত অন্তিম মেচত চেন্নাই চুপাৰ কিংছৰ বিৰুদ্ধে খেলি পৰাজিত হয়।
পূৰ্বে হাৰ্দিক মুম্বাই ইণ্ডিয়ানছৰ সৈতেই আছিল। কিন্তু ২০২২ চনৰ আইপিএলৰ নিলামৰ পূৰ্বে মুম্বাই এৰি গুজৰাট টাইটান্সৰ সৈতে চুক্তিবদ্ধ হয়। শেহতীয়াকৈ আকৌ হাৰ্দিক মুম্বাইলৈ উভতিছে। বহুতৰেই ধাৰণা আছিল ৰোহিত শৰ্মাৰ অৱসৰৰ পাছত সূৰ্যকুমাৰ আৰু জছপ্ৰীত বুমৰাহেই অধিনায়কৰ দাবীদাৰ। কিন্তু শেষপৰ্যন্ত সকলোৰে আশাত চেঁচাপানী ঢালি মুম্বাই ইণ্ডিয়ানছৰ অধিনায়ক হৈছে হাৰ্দিক পাণ্ডিয়া।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
