অৱশেষত প্ৰায় পাঁচটা মাহৰ মূৰত উত্তৰ কোৰিয়াৰ একনায়কত্ববাদী শাসক কিম জং উনৰ পত্নী ৰি চুল জুক ৰাজহুৱা স্থানত দেখা গ’ল৷
বুধবাৰে ৰি চল জুক স্বামী কিম জং উনৰ সৈতে উত্তৰ কোৰিয়াৰ সংবাদ মাধ্যমে প্ৰত্যক্ষ কৰে৷
কোৰিয়ান চেন্ট্ৰেল নিউজ এজেঞ্চি-এ প্ৰকাশ কৰা অনুসৰি উত্তৰ কোৰিয়াৰ শাসক কিমৰ পত্নীয়ে বুধবাৰে ৰাজধানীৰ পিয়ঙয়ঙৰ মানচুদাএ আৰ্ট থিয়েটাৰ ৰাজহুৱাভাৱে প্ৰত্যক্ষ কৰে৷ সংবাদ সংস্থাটোৰ সূত্ৰৰ অনুসৰি ৰি চুল জুকে বুধবাৰে উক্ত থিয়েটাৰত উপস্থিত হৈ নৱবৰ্ষ উপলক্ষ্যে উদযাপন কৰা এক অনুষ্ঠানত অংশগ্ৰহণ কৰে৷
উল্লেখ্য যে ইয়াৰ পূৰ্বে উত্তৰ কোৰিয়াৰ একনায়কত্ববাদী শাসকগৰাকীৰ পত্নী জুক যোৱা ৯ ছেপ্টেম্বৰত এক ৰাজহুৱা অনুষ্ঠানত দেখা গৈছিল৷ সেইবাৰ স্বামী কিম জং উনৰ সৈতে জুকে কিমৰ প্ৰয়াত ককাকৰ মৃত্যু বাৰ্ষিকী উপলক্ষ্যে কুমচুচান প্লেচৰ এক শ্ৰদ্ধাঞ্জলি অনুষ্ঠানত অংশগ্ৰহণ কৰিছিল৷
‘‘যেতিয়া স্বামী কিম জং উনৰ সৈতে ৰি চুল জুৱে আদৰণি সংগীতৰ তালে তালে প্ৰৱেশ কৰে তেতিয়া থিয়েটাৰৰ ভিতৰত থকা সকলোৱে ‘হুৰাহ’ বুলি চিঞৰি তেওঁক সম্ভাষণ জনায়৷’’ সংবাদ সংস্থা কেচিএনএ-এ এইদৰে কয়৷ সংবাদ সংস্থাটোৰ মতে কিম জং উনৰ পত্নীয়ে অনুষ্ঠানটোত অংশগ্ৰহণ কৰা শিল্পীসকলৰ সৈতে ফ’টোও উঠে৷
উল্লেখ্য যে স্বামী কিম জং উনৰ সৈতে প্ৰায়ে সামাজিক-ব্যৱসায়িক অনুষ্ঠান, সামৰিক ভ্ৰমণ আদিত উপস্থিত থাকি ৰি চুল জুৱে আন্তঃৰাষ্ট্ৰীয় সংবাদ মাধ্যমৰ দৃষ্টিত পৰি আহিছে৷ কিন্তু যোৱা কেবামাহ ধৰি কিমৰ সৈতে পত্নীক ৰাজহুৱা অনুষ্ঠানত অনুপস্থিত থকাত তেওঁ গৰ্ভধাৰণ কৰা বুলি চৰ্চা চলিছিল৷
ইফালে চিৰ বৈৰী ৰাষ্ট্ৰ দক্ষিণ কোৰিয়াৰ চোৰাংচোৱাই প্ৰকাশ কৰিছিল যে কিমৰ পত্নীয়ে কোভিড-১৯ৰ সংক্ৰমণৰ পৰা নিজকে সুৰক্ষিত ৰাখিবলৈ ৰাজহুৱা কাৰ্যসূচীৰ পৰা বিৰত আছিল৷ দক্ষিণ কোৰিয়াৰ চোৰাংচোৱা সংস্থাসমূহৰ মতে কিম আৰু ৰি চুল জুৰ তিনিটাকৈ সন্তান আছে আৰু ৰাজহুৱা অনুষ্ঠানৰ পৰা আঁতৰি থাকি জুৱে নিজ সন্তানৰ সৈতে সময় অতিবাহিত কৰিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
