২০২৪ৰ লোকসভা নিৰ্বাচনত মোদীৰ জোঁট NDA সংখ্যাগৰিষ্ঠতা লাভ কৰিলেও কৰোবাত যেন মন সেমেকা মোদীৰ৷ NDA মেজিক নম্বৰ ২৭২ পাৰ কৰিলেও ২০১৯ চনৰ সমান পাৰদৰ্শিতা দেখুৱাব নোৱাৰিলে এইবাৰৰ নিৰ্বাচনত৷ বিজেপিয়ে আশা কৰাধৰণে লাভ নকৰিলে একক সংখ্যাগৰিষ্ঠতা৷ নীতিশ-নাইডুক ভৰসা কৰিলেই চৰকাৰ গঠনৰ কুচকাৱাছ চলাইছে বিজেপি দলে৷ আগন্তুক ৫টা বছৰ এইকেইজন নেতাৰ ওপৰত ভৰসা কৰিয়েই আগুৱাই যাব লাগিব নৰেন্দ্ৰ মোদীও৷ এইবাৰ ভাৰতীয় জনতা পাৰ্টীয়ে লাভ কৰিছে ২৪০খন আসন৷ যি মেজিক ফিগাৰৰ পৰা বহু দূৰৈত৷
NDA চৰকাৰ গঠনৰ বাবে প্ৰস্তুতি চলাই থকাৰ সময়তে দুজনকৈ বিৰোধী নেতাই কৰা মন্তব্যই তোলপাৰ লগাইছে দেশৰ ৰাজনীতি৷ দুগৰাকীকৈ কংগ্ৰেছী নেতাই দাবী কৰিছে যে, ম্যাদ শেষ হোৱাৰ পূৰ্বেই এই চৰকাৰ ভাঙি যাব৷ চৰকাৰ গঢ়িব বিৰোধী দলে৷ শনিবাৰে কংগ্ৰেছ কমিটিৰ ৱাৰ্কিং বৈঠকৰ পাছতেই এই মন্তব্য কৰিছে দুগৰাকী জনপ্ৰিয় কংগ্ৰেছ নেতাই৷ যোৰহাটৰ পৰা বিপুল ভোটত নিৰ্বাচনত জয়ী হোৱা কংগ্ৰেছী সাংসদ গৌৰৱ গগৈয়ে এই সন্দৰ্ভত কয়, ‘পাঁচ বছৰ প্ৰধানমন্ত্ৰীৰ গাদীত মোদী থাকিব নোৱাৰিব৷’ অন্যহাতে ছত্তিছগড়ৰ প্ৰাক্তন মুখ্যমন্ত্ৰী ভূপেশ বাঘেলে কয়, ‘NDA চৰকাৰ অত্যন্ত দৌদুল্যমান৷ অতি শীঘ্ৰেই এই চৰকাৰৰ পতন হ’ব৷’ ৰাজনন্দগাওঁৰ পৰা এইবাৰ কংগ্ৰেছৰ হৈ যুঁজত নামিছিল ভূপেশ বাঘেল৷ কিন্তু বিজয় সাব্যস্ত কৰিব নোৱাৰিলে বাঘেলে৷ কংগ্ৰেছৰ ৱাৰ্কিং কমিটিত যোগদানৰ পূৰ্বে বাঘেলৰ মন্তব্য, ‘কল আৰু বগৰীৰ কাহানিও মিল নহয়৷ এই চৰকাৰৰ পতন অনিবাৰ্য৷’
অন্যহাতে গৌৰৱ গগৈয়ে বিষয়টোক লৈ কয়,‘প্ৰাপ্ত ভোটৰ নিৰিখত ৰায়বৰেলীত ৰাহুল গান্ধীৰ জয়ৰ ব্যৱধান বাৰাণসীত মোদীৰ প্ৰাপ্ত ভোটৰ ব্যৱধানৰ তুলনাত বহু বেছি৷ মোৰ মনে কয় পাঁচ বছৰ প্ৰধানমন্ত্ৰীৰ আসনত থাকিব নোৱাৰিব নৰেন্দ্ৰ মোদী৷’ গেৰুৱা শিবিৰক চাপ দিবৰ বাবেই কংগ্ৰেছী নেতৃত্বই এনে ধৰণৰ মন্তব্য কৰি আহিছে বুলি একাংশ ৰাজনৈতিক বিশ্লেষকে মন্তব্যও কৰিছে৷ গৌৰৱ, ভূপেশ বাঘেলৰ ওপৰিও কংগ্ৰেছৰ সাংসদ মানিকাম ঠাকুৰে কয়, ‘ক্ৰমশ প্ৰকাশ্য নীতিতেই জোৰ দিছে৷ মোদী ৩.০ চৰকাৰৰ প্ৰতিটো কামত নজৰ ৰাখিব ইণ্ডিয়া জোঁটে৷
লোকসভাত বিৰোধী দলনেতাৰ আসনত দেখা যাব ৰাহুল গান্ধীক৷ এই সন্দৰ্ভত কংগ্ৰেছৰ বৰ্ষীয়ান নেতা বিৰাপ্পা মইলীয়ে স্পষ্টভাৱে কয়, ‘অৱশ্যেই৷ মানুহে ৰাহুল গান্ধীক বিৰোধী নেতা হিচাপে চাবলৈ দেখে ৰৈ আছে৷ কংগ্ৰেছ আৰু ইণ্ডিয়া জোঁটেও ৰাহুলকেই বিচাৰিছে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
