অসম লাইভ ২৪ঃ হাতীৰ ব্যৱহাৰ আৰু ৰাজ্যত নাই৷ এদিন আঢ্যৱন্তৰ পৰিচয় দিয়া হাতী এতিয়া আহুকালহে৷ হাতী থকা মানেই পৰিয়ালটো সমাজৰ লেখত ল’বলগীয়া পৰিয়াল৷ অসমৰ সমাজ জীৱনৰ সৈতে এৰাব নোৱাৰা হাতীটোকেই এদিন প্ৰতীক হিচাপে লৈ অসমৰ প্ৰথমটো আঞ্চলিকতাবাদী দল অসম গণ পৰিষদ গঠন হৈছিল৷
অসম গণ পৰিষদ দলটোৰ হাতীটোৰ দৰেই আদৰ আছিল অসমৰ প্ৰতিগৰাকী লোকৰ মনত৷ অসমৰ দুৰ্গম বাটেৰে ব্যৱসায় কৰিবলৈ একমাত্ৰ সাৰথিয়েই যিদৰে হাতী আছিল অসমৰ ৰাজনৈতিক পটভূমিত অসম গণ পৰিষদকো বাটকটীয়া বুলি আস্থা প্ৰকাশ কৰিছিল প্ৰতিগৰাকী অসমীয়াই৷ ৰাষ্ট্ৰীয়তাবাদৰ পৰা অসমক উদ্ধাৰ কৰাৰ একমাত্ৰ বিকল্প বুলি ধৰি লৈছিল অসম গণ পৰিষদকেই৷ ১৯৮৫ চনৰ কোনো এটি ৰৌদ্ৰোজ্জ্বল দিনত অসমৰ প্ৰথমটো ৰাজনৈতিক দলে ভুমুকি মাৰে৷ তাৰ পিছতেই দুটাকৈ নিৰ্বাচনত অসমবাসীৰ বিপুল সঁহাৰিত জয়লাভ কৰি চৰকাৰ গঠন কৰিলে অসম গণ পৰিষদে৷
কেইটানো বছৰ? ১৯৮৫ ৰ পৰা ২০২২৷ ৩৭ বছৰীয়া ইতিহাসত কথাবোৰ ধীৰে ধীৰে সলনি হ’ল৷ এদিন হাতী প্ৰতীকটো দেখিলেই আৱেগে খুন্দা মৰা জাতিটোৱে অসম গণ পৰিষদ বুলিলেই সন্দেহৰ দৃষ্টিৰে চোৱা হ’ল৷ ৰাষ্ট্ৰীয়তাবাদৰ ওচৰত বিক্ৰী যোৱা দল বুলি অসমবাসীৰ আস্থা যেন দিনকদিনে হেৰুৱাইছে অসমৰ প্ৰথমটো আঞ্চলিক দলে৷ ২০১৯ বৰ্ষত হোৱা কা’ আন্দোলনত অসম গণ পৰিষদৰ স্থিতিক লৈ অসমবাসী যেন নিৰাশ হ’ল৷
শেহতীয়াভাৱে অসম গণ পৰিষদে অস্তিত্ব হেৰুৱাৰ সময়তে অসম গণ পৰিষদৰ শক্তিশালী নেতা তথা বৰ্তমান বিজেপি মিত্ৰজোঁট চৰকাৰত কৃষিমন্ত্ৰীৰ দায়িত্বত থকা অতুল বৰাই শ্বেয়াৰ কৰা এখন ফটোৱে চৰ্চা লাভ কৰিছে৷ এটা দঁতাল হাতীৰ সৈতে এখন ফটো সামাজিক মাধ্যমত শ্বেয়াৰ কৰিছে মন্ত্ৰী অতুল বৰাই৷ ফটোখন দেখা মাত্ৰকেই একাংশ নেটিজেনে সামাজিক মাধ্যমত নিজকে হাঁহিয়াতৰ পাত্ৰ কিয় কৰে বুলি মন্তব্য কৰাৰ সময়তে একাংশ নেটিজেনে কৈছে, ‘অসম গণ পৰিষদে হাতী এতিয়া চুই চাবহে পাৰিব৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
