অসম লাইভ ২৪ঃ কোভিড ভেকচিন গ্ৰহণ নকৰিলে বিধানসভাত প্ৰৱেশ কৰিব নোৱাৰিব বিধায়কসকল। বিধানসভাৰ অধ্যক্ষই জাৰি কৰিছে এই নিৰ্দেশনা। এই গুৰুত্বপূৰ্ণ সিদ্ধান্ত গ্ৰহণ কৰে বিহাৰ বিধানসভাৰ অধ্যক্ষ বিজয় কুমাৰ সিনহাই। সম্প্ৰতি বিহাৰ বিধানসভাৰ গ্ৰীষ্মকালীন অধিৱেশন চলি আছে। অধিৱেশনৰ আৰম্ভণিতেই অধ্যক্ষ বিজয় কুমাৰ সিনহাই বিধায়কসকলক সপৰিয়ালে প্ৰতিষেধক গ্ৰহণ কৰিবলৈ আহ্বান জনায়। লগতে বিধায়কসকলক সৌজন্যত নিজৰ অঞ্চলত ৮০ শতাংশ ভেকচিনেচন সম্পন্ন হ’লে সেই বিধায়কগৰাকীক পুৰস্কৃত কৰা হ’ব বুলিও ঘোষণা কৰে বিধানসভাৰ অধ্যক্ষই। বিজয় কুমাৰ সিনহাই কয়, ক’ৰোনাৰ পৰা ৰক্ষা পোৱাৰ সৰ্বোত্তম সুৰক্ষা কৱচ হ’ল ভেকচিন। ভেকচিনেচনৰ ক্ষেত্ৰত জনপ্ৰতিনিধিয়ে বিশেষ ভূমিকা গ্ৰহণ কৰা উচিত। ক’ৰোনা মহামাৰীৰ দ্বিতীয় লহৰৰ প্ৰভাৱ শেষ নহওতেই তৃতীয় লহৰৰ সম্ভাৱনা ব্যক্ত কৰিছে বিশেষজ্ঞসকলে। গতিকে সকলো সজাগ হোৱাৰ লগতে ভেকচিনেচনত গুৰুত্ব প্ৰদান কৰিবলৈ আহ্বান জনায় অধ্যক্ষগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
