ডাবৰৰ কেইবাটাও খাদ্য সামগ্ৰীৰ বিক্ৰী আৰু প্ৰচাৰত বাধা আৰোপ কৰিছে ভাৰতীয় খাদ্য সুৰক্ষা আৰু মান নিয়ন্ত্ৰণ প্ৰাধিকৰণে (FSSAI)। এই তালিকাত কোম্পানীটোৰ মধু (Honey), ঘিউ (Cow Ghee) আদি সামগ্ৰীও অন্তৰ্ভুক্ত আছে। এই সামগ্ৰীসমূহত ডাবৰে “100% Pure”, “100% Natural”, “100% Purity Guaranteed” আদি দাবীৰে বজাৰত বিক্ৰী কৰা হৈছিল। FSSAI-এ এই দাবীসমূহক গ্ৰাহকক বিভ্ৰান্ত কৰা বুলি উল্লেখ কৰি ডাবৰক ১৫ দিনৰ ভিতৰত ইয়াৰ ওপৰত ব্যাখ্যা দাখিল কৰিবলৈ নিৰ্দেশ দিছে।
FSSAIৰ তদন্তত কি পোহৰলৈ আহিল?
FSSAIৰ তদন্তত প্ৰকাশ পাইছে যে ডাবৰৰ ৱেবছাইটত বিক্ৰী কৰা কেইবাটাও খাদ্য সামগ্ৰীৰ লেবেলত বিভ্ৰান্তিকৰ দাবী ব্যৱহাৰ কৰা হৈছিল। ইয়াৰ ভিতৰত “100% Natural”, “100% Pure”, “100% Purity Guaranteed”, “100% Organic” আৰু “100% Tender Coconut Water” আদি দাবী উল্লেখযোগ্য। সংস্থাটোৰ মতে, এইধৰণৰ “100%” দাবীসমূহ Food Safety and Standards (Advertising and Claims) Regulations, ২০১৮ৰ পৰিপন্থী। এই দাবীসমূহ অস্পষ্ট, বৈজ্ঞানিকভাৱে প্ৰমাণিত নহয় আৰু গ্ৰাহকক বিভ্ৰান্ত কৰিব পাৰে।
নিয়ম ভংগৰ আন কেইটামান গুৰুত্বপূৰ্ণ অভিযোগ
‘জৈৱিক ভাৰত’ ল’গ’ৰ অপব্যৱহাৰ: ডাবৰ হিমালয়ান অৰ্গেনিক এপ’ল চাইডাৰ ভিনেগাৰ আৰু ডাবৰ অৰ্গেনিক হানিত বৈধ FSSAI অৰ্গেনিক অনুমোদন নোহোৱাকৈ “জৈৱিক ভাৰত” ল’গ’ ব্যৱহাৰ কৰা হৈছিল।
মিশ্ৰিত খাদ্যত ভ্ৰান্তিকৰ দাবী: ডাবৰ হ’মমেইড কোকোনাট মিল্ক “100% Purity” দাবীৰে বিক্ৰী কৰা হৈছিল। কিন্তু FSSAIৰ নিয়ম অনুসৰি মিশ্ৰিত (Compound) খাদ্য সামগ্ৰীৰ ক্ষেত্ৰত এইধৰণৰ দাবী কৰাৰ অনুমতি নাই।
পূৰ্বেও ডাবৰক সতৰ্ক কৰা হৈছিল
FSSAIয়ে জনোৱা মতে, ইয়াৰ পূৰ্বেও ডাবৰক এনে “100%” দাবী তৎক্ষণাত বন্ধ কৰিবলৈ জাননী প্ৰেৰণ কৰা হৈছিল। কিন্তু কোম্পানীয়ে কোনো সন্তোষজনক পদক্ষেপ গ্ৰহণ নকৰাত সংস্থাটোৱে এই কঠোৰ নিষেধাজ্ঞামূলক (Prohibition) আদেশ জাৰি কৰে। এতিয়া ডাবৰে ১৫ দিনৰ ভিতৰত FSSAIক জনাব লাগিব যে আদেশ লাভ কৰাৰ পিছত কোম্পানীয়ে কি কি ব্যৱস্থা গ্ৰহণ কৰিছে।
‘100%’ দাবীৰ বাবে বৈজ্ঞানিক প্ৰমাণ বাধ্যতামূলক
FSSAIৰ মতে, Food Safety and Standards (Advertising and Claims) Regulations, ২০১৮ত “100%” শব্দটোৰ কোনো সুনিৰ্দিষ্ট সংজ্ঞা নাই। সেয়েহে “100% Natural”, “100% Pure”, “100% Purity Guaranteed” অথবা “100% Organic” আদি দাবীসমূহ গ্ৰাহকক বিভ্ৰান্ত কৰাৰ আশংকা থাকে।
FSSAI-এ খাদ্য কোম্পানীসমূহক এনে দাবী ব্যৱহাৰৰ পৰা বিৰত থাকিবলৈ পৰামৰ্শ দিছে। নিয়ম অনুসৰি, যিকোনো খাদ্য সামগ্ৰীৰ ওপৰত কৰা দাবী সত্য, স্পষ্ট আৰু বৈজ্ঞানিক প্ৰমাণৰ আধাৰত হ’ব লাগিব। যদি কোনো কোম্পানীয়ে ভ্ৰান্তিকৰ বা প্ৰমাণবিহীন দাবী কৰে, তেন্তে FSSAIয়ে জাননী জাৰি কৰা, লেবেল সলনি কৰিবলৈ নিৰ্দেশ দিয়া, সামগ্ৰীৰ বিক্ৰী বন্ধ কৰা বা আন আইনী ব্যৱস্থা গ্ৰহণ কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
