বিদায় বীৰুৱালা…
সমাজৰ পৰা ডাইনী হত্যাৰ কু-প্ৰথা আৰু অন্ধবিশ্বাস নিৰ্মূলকৰণৰ বাবে ঐকান্তিক প্ৰয়াস চলাই অহা পদ্মশ্ৰী বীৰুবালা ৰাভাৰ দেহাৱসান। আজি ২০২৪ চনৰ ১৩ মে’ তাৰিখ সোমবাৰে বিদায় মাগে কুসংস্কাৰ বিৰোধী, সমাজ সংস্কাৰক বীৰুৱালা ৰাভাই।
কৰ্কট ৰোগত আক্ৰান্ত হৈ ৭০ বছৰ বয়সত গুৱাহাটী চিকিৎসা মহাবিদ্যালয়ৰ কেঞ্চাৰ হাস্পতালত চিকিৎসাধীন অৱস্থাত বিয়োগ ঘটে বীৰুৱালা ৰাভাৰ। ডাইনী হত্যাক সমাজৰ পৰা সম্পূৰ্ণৰূপে নিৰ্মূল কৰিবলৈ নিৰৱচ্ছিন্নভাৱে অহোপুৰুষাৰ্থ কৰি অহা সমাজ সংস্কাৰক পদ্মশ্ৰী বীৰুবালা ৰাভাৰ বিয়োগ অসমৰ সমাজ জীৱনৰ বাবে অপূৰণীয় ক্ষতি৷
কেইবাটাও দশক ধৰি এলান্ধুকলীয়া নীতি-নিয়মৰ বিৰুদ্ধে এক সবল কণ্ঠ, এক বাংময় প্ৰতিবাদ তথ ডাইনী কু প্ৰথাৰ বিৰুদ্ধে যুঁজ দিয়া ৰাভাই ২০২১ চনত দেশৰ চতুৰ্থ সৰ্বোচ্চ অসামৰিক সম্মান পদ্মশ্ৰী বঁটাৰে সন্মানিত হৈছিল। তাৰোপৰি উত্তৰ-পূৱ তথা অসমৰ প্ৰথমগৰাকী লোক হিচাপে ২০০৫ চনত শান্তিৰ ন’বেল বঁটাৰ বাবে মনোনীত হৈছিল।
গোৱালপাৰা জিলাৰ অসম-মেঘালয় সীমান্তৰ ঠাকুৰভিলা নামৰ এখন ভিতৰুৱা গাঁৱৰ এটি সাধাৰণ পৰিয়ালত ১৯৫৪ চনত বীৰুবালা ৰাভাৰ জন্ম হৈছিল। বহু কষ্টেৰে ডাঙৰ-দীঘল হোৱা ৰাভাই মাত্ৰ পঞ্চম শ্ৰেণীলৈকে পঢ়া-শুনা কৰাৰ পাছতেই বিদ্যালয় এৰিবলগীয়া হৈছিল। তেওঁৰ বিবাহ হয় গোৱালপাৰা জিলাৰ ঠাকুৰভিলা গাঁৱৰ এগৰাকী কৃষকৰ সৈতে৷
পুত্ৰৰ মানসিক ৰোগ হোৱাত সমাজৰ মানুহে ডাইনী সজাবলৈ যো-জা কৰাৰ সময়তে শ্বিলঙৰ মানসিক হাস্পতালত ভৰ্তি কৰাই লগতে ইয়াৰ বিৰুদ্ধে মাত মাতে। সেয়াই যেন আৰম্ভণি।
২০০০ চনৰ পৰাই তেওঁ সমাজত প্ৰচলিত ডাইনী প্ৰথাৰ বিৰুদ্ধে সৰৱ হৈ উঠিছিল বীৰুৱালা ৰাভা। বৰ্তমানলৈকে বিৰুবালা ৰাভাই প্ৰায় ৪০ৰো অধিক লোকৰ প্ৰাণৰক্ষা কৰিছে। ২০১১ চনত ডাইনী হত্যাৰ বিৰুদ্ধে তেওঁ গোৱালপাৰা জিলাত মিছন বিৰুবালা আৰম্ভ কৰিছিল। ২০১২ চনৰ ৩০ অক্টোবৰত এই মিছনক ৰাজ্যিক অভিযান হিচাপে স্বীকৃতি দিয়া হয়।
সেই সাহসী কণ্ঠৰ আজি নুমাই পৰিল জীৱন জ্যোতি। মুখ্যমন্ত্ৰী হিমন্ত বিশ্ব শৰ্মাই তেখেতৰ মৃত্যুত শোক প্ৰকাশ কৰাৰ লগতে অসমবাসীৰ অতি মৰমৰ বীৰুবালা ৰাভাৰ অন্ত্যেষ্টিক্ৰিয়া সম্পূৰ্ণ ৰাজ্যিক মৰ্যাদাৰে কৰা হ’ব বুলি ঘোষণা কৰে৷ আৰু এই বিষয়ত সকলো দিশ তদাৰক কৰিবলৈ কেবিনেট সতীৰ্থদ্বয় শ্ৰীচন্দ্ৰমোহন পাটোৱাৰী আৰু শ্ৰীজয়ন্ত মল্লবৰুৱাক দায়িত্ব প্ৰদান কৰা হৈছে ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
