জম্মু-কাশ্মীৰৰ আজি দ্বিতীয় দফাৰ ভোটগ্ৰহণ আৰম্ভ হৈছে পুৱা ৭বজাৰ পৰা৷ বুধবাৰে দ্বিতীয় দফাত জম্মু-কাশ্মীৰৰ ২৬টা বিধানসভা সমষ্টিৰ বাবে ভোটগ্ৰহণ অনুষ্ঠিত হ’ব৷ এই ভোটগ্ৰহণক কেন্দ্ৰ কৰি কটকটীয়া নিৰাপত্তাৰ ব্যৱস্থা কৰা হৈছে জম্মু-কাশ্মীৰত৷ জম্মু আৰু কাশ্মীৰ আৰক্ষীৰ ওপৰিও নিৰাপত্তাৰ দায়িত্বত মোতায়েন কৰা হৈছে সেনা৷ বিভিন্ন কেন্দ্ৰত সেনাই টহল দি আছে৷ শান্তিপূৰ্ণ ভোটগ্ৰহণ নিশ্চিত কৰিবলৈকে এই নিৰাপত্তাবেষ্টনী গঢ়ি তোলা হৈছে৷
বুধবাৰে জম্মুৰ তিনিখন আৰু কাশ্মীৰৰ তিনিখন জিলাৰ ভোটগ্ৰহণ৷ ইয়াৰ মাজতেই কাশ্মীৰৰ তিনি জিলা হৈছে বদগাম, গাণ্ডেৰবাল আৰু শ্ৰীনগৰ৷ জম্মুৰ তিনি জিলা হৈছে ৰইছি, ৰাজৌৰি আৰু পুঞ্চ৷ এইসমূহৰ মাজত শ্ৰীনগৰৰ ৮খন, বদগাম জিলাৰ ৫খন, ৰাজৌৰিত ৫খন, পুঞ্চত ৩খন, গাণ্ডেৰবালত ২টা আৰু ৰইছিত ৩খন বিধানসভা আসন আছে৷ উল্লেখ্য যে ৰইছি, ৰাজৌৰি আৰু পুঞ্চত চূড়ান্ত সতৰ্কত জাৰি কৰা হৈছে৷ কাৰণ বিগত কেইবামাহ ধৰি এই অঞ্চলত জংগী কাৰ্যকলাপৰ নানান ঘটনা ঘটিছে৷ বুধবাৰে যাতে কোনো অপ্ৰীতিকৰ ঘটনা নহয় তাৰবাবে সষ্টম হৈ আছে প্ৰশাসন৷
জম্মু কাশ্মীৰৰ দ্বিতীয় দফাৰ ভোটগ্ৰহণত আছে একাধিক হেভিৱেট প্ৰাৰ্থী৷ প্ৰাক্তন মুখ্যমন্ত্ৰী তথা নেশ্ব্যনেল কনফাৰেন্সৰ নেতা ওমৰ আব্দুল্লাসহ মুঠ ২৩৯ জন প্ৰাৰ্থীয়ে বুধবাৰে নিৰ্বাচনী যুঁজত নামিছে৷ ওমৰে এইবাৰ যুঁজ দিছে দুটাকৈ কেন্দ্ৰৰ পৰা৷ এটা বদগাম আৰু এটা আব্দুল্লা পৰিয়ালৰ পুৰণি গড় গাণ্ডেৰৱাল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
