অসম লাইভ ২৪ঃ দেশত কোভিড-১৯অতিমাৰী আৰম্ভ হোৱাৰ সময়তে ২০২০ চনত পিএম কেয়াৰ্ছ ফাণ্ড গঠন কৰা হৈছিল৷
এই পি এম কেয়াৰ্ছ ফাণ্ডত কিমান ধন জমা হৈছিল তাৰ তথ্য তথ্য জনা অধিকাৰৰ আওতা নপৰে বুলিও প্ৰধানমন্ত্ৰী কাৰ্যালয়ে ঘোষণা কৰিছিল আৰু সমগ্ৰ বিষয়টো গৈ ন্যায়ালয়ৰ মজিয়াতো গৈ পাইছিল৷
বহু কেইগৰাকী আইনজীৱীয়ে পিএম কেয়াৰ্ছ ফাণ্ডৰ জমা হোৱা ধনৰ পৰিমাণৰ তথ্য বিচাৰি তথ্য জনা অধিকাৰ আইনৰ যোগে আবেদন কৰিছিল৷ তাৰ পিছতে বাৰে বাৰে প্ৰধানমন্ত্ৰী কাৰ্যালয়ে পিএম কেয়াৰ্ছ ফাণ্ডত জমা হোৱা ধনৰ হিচাপ ৰাজহুৱা কৰা নাছিল৷
তথ্য জনাৰ আইনৰ এক্তিয়াৰ ভিতৰত পিএম কেয়াৰ্ছ ফাণ্ড নপৰে বুলি প্ৰধানমন্ত্ৰী কাৰ্যালয়ে ঘোষণা কৰি আহিলেও এতিয়া এই ফাণ্ডৰ কিছু তথ্য ৰাজহুৱা কৰা হৈছে৷
সোমবাৰে ফাণ্ডৰ ৱেবছাইটত প’ষ্ট কৰা এক অ’ডিট ষ্টেটমেন্টত কোৱা হৈছে পিএম কেয়াৰ্ছ ফাণ্ডত প্ৰথমটো বছৰতে প্ৰায় ১১ হাজাৰ কোটি টকা জমা হৈছিল।
ষ্টেটমেন্টটোৰ মতে ২০২০ চনৰ মাৰ্চ মাহৰ পৰা ২০২১ চনৰ মাৰ্চ মাহলৈকে পিএম কেয়াৰ্ছ ফাণ্ডত মুঠ ১০ হাজাৰ ৯৯০ কোটি টকা জমা হৈছিল।
তথ্য অনুসৰি মহামাৰীৰ বিৰুদ্ধে যুঁজ দিয়াৰ বিপৰীতে এই ফাণ্ডৰ পৰা ৩,৯৬৭ কোটি টকা অৰ্থাৎ মুঠ পুঁজিৰ ৩৬.১৭ শতাংশ বিভিন্ন সাহায্য তথা প্ৰকল্পৰ বাবে ব্যৱহাৰ কৰা হৈছে।
উক্ত ষ্টেটমেন্টৰ মতে প্ৰথমটো বছৰত জমা হোৱা প্ৰায় ৭ হাজাৰ কোটি টকা ব্যৱহাৰ নোহোৱাকৈ জমা হৈ আছে৷ অথচ মহামাৰীৰ ফলত বলৱৎ কৰা ল’কডাউনৰ বাবেই সেই সময়ত কোটি কোটি ভাৰতীয়ৰ জীৱন দুবিৰ্ষহ হৈ পৰিছিল৷
ইফালে এই তথ্যই উন্মোচন কৰিছে বিজেপি চৰকাৰ তথা বিজেপি দলৰ অন্য এক ভয়ংকৰ মিথাচ্যাৰ৷ উল্লেখ্য যে চৰকাৰৰ বহু কেন্দ্ৰীয় মন্ত্ৰী আৰু বিজেপিৰ জ্যেষ্ঠ নেতাই প্ৰকাশ কৰি আহিছিল যে চৰকাৰে ভেকচিন সংগ্ৰহ কৰাৰ বাবেই দেশত মূল্যবৃদ্ধি হৈছে ৷
কিন্তু প্ৰকাশিত তথ্যৰ মতে পিএম কেয়াৰ্ছ ফাণ্ডৰ ৩৫ শতাংশ অৰ্থাৎ ১৩৯২ কোটই টকা ভেকচিন সংগ্ৰহৰ বাবে খৰচ কৰা হৈছে৷ কেন্দ্ৰীয় চৰকাৰে এই টকাৰে কোভিড ভেকচিনৰ ৬৬ মিলিয়ন ড’জ ক্ৰয় কৰা বুলি প্ৰকাশ কৰা হৈছে।
এই ফাণ্ডত জমা হোৱা ধন আৰু ক’ত ক’ত ব্যৱহাৰ কৰা হৈছে? ষ্টেটমেন্টত প্ৰকাশ পোৱা অনুসৰি ‘মেড ইন ইণ্ডিয়া’ ভেন্টিলেটৰ নামত ফাণ্ডত জমা হোৱা ৩৩ শতাংশ অৰ্থাৎ ১৩১১ কোটি, কেন্দ্ৰীয় শাসিত অঞ্চলসমূহক ১০০০ কোটি, প্ৰেচাৰ ছুইং এবছৰ্পশ্যন মেডিকেল অক্সিজেন জেনেৰেশ্যন প্লেন্ট ইনষ্টলৰ বাবে ২০১ কোটি টকা খৰচ কৰা হৈছে৷
আনহাতে, ৯ খন ৰাজ্য তথা কেন্দ্ৰীয় শাসিত অঞ্চলত ১৬টা আৰটি-পিচিআৰ টেষ্টিং লেব স্থাপনৰ লগতে মুজাফৰপুৰ আৰু পাটনাত দখন ৫০০ বিছনাযুক্ত অস্থয়ী কোভিড হাস্পাতাল স্থাপনত ৫০কোটি টকা, বায়’টেকন’লজি বিভাগৰ অধীনত দুখন স্বায়ত্তশাসিত ইনষ্টিটিউট লেবেৰটৰীক ২০ কোটি টকাকৈ প্ৰদান কৰা হৈছে।
উল্লেখ্য যে কোভিড-১৯ অতিমাৰীৰ দৰে জৰুৰী পৰিস্থিতিত অনুদান সংগ্ৰহৰ বাবে প্ৰধানমন্ত্ৰী নৰেন্দ্ৰ মোদীয়ে এই ফাণ্ড আৰম্ভ কৰিছিল। অতিমাৰীৰ মাজতো দেশৰ উদ্যোগপতিৰ পৰা সাধাৰণ লোকলৈকে কোটি কোটি মানুহে পিএম কেয়াৰ্ছ ফাণ্ডলৈ সাহায্য প্ৰদান কৰিছিল৷ প্ৰধানমন্ত্ৰী নৰেন্দ্ৰ মোদীয়েই অধ্যক্ষ হিচাপে থকা এই ফাণ্ডৰ সমস্ত ধন সম্পূৰ্ণৰূপে আয়কৰমুক্ত।
ইফালে ২০২১-২২ বৰ্ষত উক্ত ফাণ্ডত জমা হোৱা ধনৰ পৰিমাণ এতিয়াও ৰাজহুৱা কৰা হোৱা নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
