পোষ্ট অফিচত ১ লাখ টকা জমা কৰিলেই পাব ৪৪,৯৯৫ টকা সুদ, কিন্তু কেনেকৈ?

বিনিয়োগৰ কাৰণেই হৈছে ধন বঢ়োৱা৷ কোৱা হয় নিৰাপদে ধন বঢ়োৱাৰ উপযুক্ত স্থানেই বিনিয়োগ৷ কিন্তু নিৰ্ভৰযোগ্য স্থানত সেই বিনিয়োগ হ’ব লাগে৷ আমাৰ দেশত যিসমূহ বিনিয়োগৰ উপকৰণ আছে তাৰ মাজত ফিক্সড ডিপোজিট, সংক্ষেপে এফ ডি সৰ্বাধিক জনপ্ৰিয়৷ ইয়াতেই এটা কথা আছে- এফ ডি ক’ত কৰিব বেংক নে পোষ্ট অফিচত সেয়া জানিবলৈ বহুজনেই আগ্ৰহী৷ ছেভিংছ একাউণ্টত বেছি ৰিটাৰ্ণ দিয়াৰ ক্ষেত্ৰত ভাৰতৰ পোষ্ট অফিচে বেংকসমূহক পিছপেলাইছে৷ আনহাতে ভাৰতীয় ৰিজাৰ্ভ বেংকে ৰেপো ৰেট কমোৱাৰ পাছত সমস্ত বেংক এফ ডি স্কিমৰ সুদৰ হাৰ কমাই দিছে৷ অন্যহাতে পোষ্ট অফিচ এফ ডি স্কিমে এতিয়াও আগৰদৰেই উচ্চ সুদ দি আছে৷ পোষ্ট অফিচৰ এনে এক স্কিমৰ কথা ক’ব খুজিছো য’ত কেৱল মাত্ৰ ১ লাখ টকা জমা কৰিয়েই ৪৪,৯৯৫ টকাৰ নিৰ্দিষ্ট সুদ লাভ কৰিব আপুনি৷

পোষ্ট অফিচত ৭.৫ শতাংশ পৰ্যন্ত বাম্পাৰ সুদৰ প্ৰস্তাৱ দিয়া হৈছে৷ পোষ্ট অফিচত আপুনি ১ বছৰ, ২ বছৰ, ৩বছৰ আৰু ৫ বছৰৰ বাবে এফ ডি একাউণ্ট খুলিব পাৰে৷ উল্লেখ্য যে পোষ্ট অফিচৰ টি ডি নামেৰে এফ ডি একাউণ্ট খোলা হয়৷ এটা পোষ্ট অফিচ টি ডি একাউণ্ট বেংক একাউণ্টৰ এফ ডিৰ দৰেই৷ য’ত বিনিয়োগকাৰীয়ে এক নিৰ্দিষ্ট সুদৰ হাৰত ম্যাদপূৰ্তিৰ ওপৰত সম্পূৰ্ণ ৰিটাৰ্ণ পায়৷

পোষ্ট অফিচ সঞ্চয় প্ৰকল্পসমূহৰ সুবিধা হৈছে যে এইসমূহ কেন্দ্ৰীয় চৰকাৰৰ দ্বাৰা নিয়ন্ত্ৰিত হয় সেয়ে কেৱল চৰকাৰী গেৰেণ্টিসহ স্থিৰ সুদ পায় বিনিয়োগকাৰীয়ে৷ ইয়াৰোপৰি তাৰ সৈতে অৰ্থও সম্পূৰ্ণ নিৰাপদে থাকে৷ পোষ্ট অফিচত ১ বছৰৰ টিডিত ৬.৯ শতাংশ, ২ বছৰৰ টি ডিত ৭.০শতাংশ, ৩ বছৰৰ টি ডিত ৭.১ শতাংশ আৰু ৫ বছৰৰ টি ডিত ৭.৫ শতাংশ সুদ প্ৰদান কৰে৷