অসম লাইভ২৪ঃ দুদিনীয়া ভ্ৰমণসূচীৰে আজি মণিপুৰলৈ কংগ্ৰছ নেতা ৰাহুল গান্ধী। পুৱা ১১ বজাত মণিপুৰৰ লামকাত থকা কেইবাটাও শৰণাৰ্থী শিবিৰলৈ যাব ৰাহুল। শিবিৰত আশ্ৰয় লৈ থকা লোকৰ সৈতে পোনপটীয়াকৈ আলোচনাত মিলিত হ’ব ৰাহুল। তাৰপিছতেই বিষ্ণুপুৰৰ শৰণাৰ্থী শিবিৰলৈ যাব ৰাহুল। বৃহস্পতিবাৰে নিশা কটাব মৈৰাঙত। শুকুৰবাৰে তেওঁ ইম্ফলৰ বিভিন্ন শৰনাৰ্থী শিবিৰত যাব। ইম্ফলৰে এখন হোটেলত তেওঁ মেইতেই, কুকি আৰু নগাসকলৰ সৈতে বৈঠকত মিলিত মিলিত হ’ব ৰাহুল।
দিল্লীলৈ ওভতি যোৱাৰ পূৰ্বে সাংবাদিকৰ সৈতেও মিলিত হ’ব ৰাহুল। কিন্তু ৰাহুলৰ এই ভ্ৰমণৰ বিৰোধিতা কৰিছে মণিপুৰ পেট্ৰিয়াটিক পাৰ্টীয়ে। তেওঁলোকে বিৰোধিতা কৰা কাৰণো প্ৰকাশ কৰিছে। পেট্ৰিয়াটিক পাৰ্টীৰ সদস্যই কয়, ‘কংগ্ৰেছৰ দিনতেই মণিপুৰত সমস্যা আৰম্ভ হৈছে। ৰাহুলে এতিয়া সেই ঘোলা পানীত মাছ ধৰিবলৈ আহিছে। কংগ্ৰেছ চৰকাৰে ১৯৪৯ চনত স্বাধীন মণিপুৰক জোৰ কৰি ভাৰতৰ অংশীদাৰ কৰাইছিল। মণিপুৰবাসীয়ে কেতিয়াও সেই একত্ৰিকৰণ মানিব পৰা নাই। জোৰকৈ ধৰি ৰাখিব খোজাৰ বাবেই ৰাজ্যত সশস্ত্ৰ সংগ্ৰামৰ দীৰ্ঘ ইতিহাসৰ সূচনা হয়।’ ইয়াৰোপৰি সংগঠনটোৰ দাবী, ‘কংগ্ৰেছে কুকিসকলক ভোট বেংকৰ স্বাৰ্থত ব্যৱহাৰ কৰিছে। সেয়েই কুকিসকলে কুকিলেণ্ডৰ সপোন দেখিবলৈ আৰম্ভ কৰিছে। যদি কংগ্ৰেছে ভোট বেংক হিচাপে সিহঁতক ব্যৱহাৰ কৰি উচটনি নিদিলে হেতেন তেন্তে আজি কুকিয়ে মেইতেইসকলক বহিষ্কাৰ কৰি পৃথক ৰাজ্যৰ দাবী তুলিব সাহস নকৰিলেহেতেন। কংগ্ৰেছ চৰকাৰ আহিলে কুকি জঙ্গিসকলক দমন কৰি সংঘৰ্ষবিৰতিৰ চুক্তি কৰাৰ সলনি কংগ্ৰেছে তেওঁলোকক প্ৰশিক্ষণ দি আৰু জঙ্গি কৰিহে তুলিব।’
শেহতীয়াকৈ ইম্ফল আৰক্ষীৰ অস্ত্ৰাগাৰৰ পৰা অস্ত্ৰ উলিয়াই বিক্ৰিৰ চেষ্টা কৰাৰ সময়তে ৪জনক গ্ৰেপ্তাৰ কৰিছে আৰক্ষীয়ে। গ্ৰেপ্তাৰ কৰা দুৰ্বৃত্তৰ পৰা ৭টা অস্ত্ৰৰ লগতে ২১৮ ৰাউণ্ড গুলীও উদ্ধাৰ কৰিছে। বৰ্তমান পৰ্যন্ত লুট কৰা অস্ত্ৰৰ মাজত ১১১০টা পিষ্টল, প্ৰায় ১৪হাজাৰ গুলী আৰু ২৫০টা বোম উদ্ধাৰ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ