দুজন প্ৰাপ্তবয়স্কই একেলগে বিচাৰিলে একত্ৰবাস কৰিব পাৰে৷ বিবাহৰ আইনী বয়স নহলেও একেলগে থাকিব পাৰে তেওঁলোক৷ তেওঁলোকৰ সাংবিধানিক অধিকাৰক বয়সৰ সীমা দেখুৱাই খৰ্ব কৰিব নোৱাৰিব৷ এই কথা জনাইছে ৰাজস্থান হাইকৰ্টে৷ দেশত ১৮ বছৰ বয়স হলেও ২১ বছৰৰ পূৰ্বে পুৰুষৰ বিবাহ বৈধ নহয়৷ বিবাহৰ বয়স হোৱাৰ পূৰ্বে তেওঁলোকে এতিয়াৰে পৰা লিভ ইনত থাকিব পাৰিব৷ এই পৰ্যবেক্ষণ ৰাজস্থান হাইকৰ্টৰ৷
১৮ বছৰৰ এগৰাকী তৰুণী আৰু ১৯ বছৰৰ এজন তৰুণে সুৰক্ষা বিচাৰি ৰাজস্থান হাইকৰ্টত আবেদন কৰিছিল৷ তেওঁলোক দুজনেই কোটাৰ বাসিন্দা৷ আবেদনকাৰীয়ে কৰ্টত জনাই, স্বেচ্ছাই একত্ৰবাস কৰিব খুজিলে তেওঁলোক একেলগে থাকিব পাৰিব৷ একেলগে থাকিব বুলি ২০২৫ চনৰ ২৭ অক্টোবৰত তেওঁলোক চুক্তিবদ্ধ হৈছে৷ অভিযোগ যে তাৰপিছৰে পৰাই তৰুণীৰ পৰিয়ালে এই প্ৰেমিক যুগলক প্ৰাণে মাৰি পেলোৱাৰ ভাবুকিও দিছিল৷ তেওঁলোকৰ এই সম্পৰ্কৰ বিৰোধীতা কৰিছিল৷ এই বিষয়ক লৈ কোটা আৰক্ষীৰ কাষ চাপিও লাভ হোৱা নাছিল বুলি অভিযোগকাৰীয়ে কৰ্টত জনাইছে৷
যুগলক এই পিটিছনৰ কোৰ্টত বিৰোধিতা কৰিছে আইনজীৱী বিবেক চৌধুৰীয়ে৷ তেওঁ জনাই যে তৰুণৰ বয়স এতিয়াও ২১ বছৰ হোৱা নাই৷ সেয়ে তেওঁলোকক একেলগে থকাৰ অনুমতি দিব নালাগে৷ উল্লেখ্য যে আমাৰ দেশৰ পুৰুষৰ বিবাহৰ আইনী বয়স হৈছে ২১ বছৰ৷ মহিলাৰ ১৮ বছৰ৷ কিন্তু লিভ ইনৰ ক্ষেত্ৰত এই কথা মানি লোৱা নাই ৰাজস্থান হাইকৰ্টে৷ তেওঁলোকৰ পৰ্যবেক্ষণ যে সংবিধানৰ ২১ ধাৰা অনুসৰি জীয়াই থকা আৰু ব্যক্তিস্বাধীনতাৰ অধিকাৰ সকলোৰে আছে৷
আবেদনকাৰীৰ বিবাহৰ আইনী বয়স হোৱা নাই বুলি সেই অধিকাৰৰ পৰা তেওঁলোকৰ বঞ্চিত কৰিব নোৱাৰিব৷ ন্যায়াধীশ অনুপ ধান্দেৰ পৰ্যবেক্ষণ যে, ‘প্ৰত্যেক মানুহৰ জীৱন আৰু স্বাধীনতা ৰক্ষা কৰাৰ দায়িত্ব আছে ৰাষ্ট্ৰৰ৷’ ভাৰতৰ আইনত লিভ ইন টুগেদাৰ নিষিদ্ধ নহয়৷ এয়া কোনো অপৰাধো নহয়৷ যোধপুৰ আৰু ভিলোৱাৰা আৰক্ষীৰ ছুপাৰক যুগলৰ অভিযোগ গ্ৰহণ কৰি তেওঁলোকক সুৰক্ষা দিবলৈকো উপদেশ দিছে ন্যায়াধীশ ধান্দে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
