লোকসভা নিৰ্বাচনৰ অন্ত, এতিয়া দেশৰ ১০ আৰু অসমৰ ২খন আসনৰ ৰাজ্যসভাৰ উপ-নিৰ্বাচন
শেহতীয়াকৈ সমাপ্ত হোৱা লোকসভা নিৰ্বাচনৰ বাবে ৰাজ্যসভাৰ ১০খন আসন খালী হৈ পৰিছে। ৰাজ্যসভা সচিবালয়েও ৭খন ৰাজ্যৰ খালী পদৰ অধিসূচনা জাৰি কৰিছে। অসমতো ২ খন আসন খালী হৈ পৰিছে লোকসভা নিৰ্বচনৰ পাছতে।
খালী হোৱা আসনসমূহৰ ভিতৰত আছে অসম, বিহাৰ আৰু মহাৰাষ্ট্ৰৰ দুখনকৈ, হাৰিয়ানা, মধ্যপ্ৰদেশ, ৰাজস্থান আৰু ত্ৰিপুৰাত এখনকৈ আসন। এই অধিসূচনাৰ পিছতে ৰাজ্যসভাত এই খালী পদসমূহ পূৰণৰ বাবে নিৰ্বাচনৰ নতুন তাৰিখ ঘোষণা কৰিব নিৰ্বাচন আয়োগে।
১০খন আসনৰ বাবে খালী পদৰ অধিসূচনা জাৰি কৰা সাতখন ৰাজ্যৰ ভিতৰত ৭খন আসন বিজেপিৰ, ২খন কংগ্ৰেছৰ আৰু এখন আসন ৰাষ্ট্ৰীয় জনতা দলৰ হাতত আছিল। এতিয়া নতুনকৈ হব লগা নিৰ্বাচনত কোনে জয় হয় সেয়া লক্ষনীয় হব। অৱশ্যে ১০ আসনৰ ভিতৰত অধিকাংশত বিজেপিয়ে জয় হোৱাৰ সম্ভাৱনা আছে।
অসমৰ ক্ষেত্ৰত কবলৈ গলে, ৰাজ্যসভাৰ দুয়োখন আসন পূৰ্বে বিজেপিৰ দখলত আছিল। আসন দুখনত আছিল সৰ্বানন্দ সোণোৱাল আৰু কামাখ্যা প্ৰসাদ তাছা। দুয়োগৰাকী নেতাৰ ভিতৰত ক্ৰমে -সৰ্বানন্দ সোণোৱালে ডিব্ৰুগড় লোকসভা সমষ্টিৰ পৰা আৰু কামাখ্যা প্ৰসাদ তাছাই নৱ গঠিত কাজিৰঙা লোকসভা নিৰ্বাচনৰ পৰা নিৰ্বাচিত হৈছে।
আনহাতে কেৱল ৰাজ্যসভাই নহয় অসম বিধানসভাতো খালী হৈছে ৫ খন আসন। এই ৫ খন আসনতো উপ-নিৰ্বাচন অনুষ্ঠিত হোৱাটো নিশ্চিত হৈ পৰিছে।
সংসদলৈ নিৰ্বাচিত হোৱা এই ৫ বিধায়কৰ ভিতৰত আছে ঢলা সমষ্টিৰ বিধায়ক তথা পৰিবহন বিভাগৰ মন্ত্ৰী পৰিমল শুক্লবৈদ্য, বিহালী সমষ্টিৰ বিধায়ক ৰঞ্জিত দত্ত, চামগুৰি সমষ্টিৰ বিধায়ক ৰকিবুল হুছেইন, কোকৰাঝাৰ সমষ্টিৰ বিধায়ক জয়ন্ত বসুমতাৰী আৰু বঙাইগাওঁ সমষ্টিৰ বিধায়ক ফণীভূষণ চৌধুৰী।
ইয়াৰে পৰিমল শুক্লবৈদ্য শিলচৰ লোকসভা সমষ্টি, ৰঞ্জিত দত্ত শোণিতপুৰ লোকসভা সমষ্টি, ৰকিবুল হুছেইন ধুবুৰী লোকসভা সমষ্টি, জয়ন্ত বসুমতাৰী কোকৰাঝাৰ লোকসভা সমষ্টি আৰু ফণীভূষণ চৌধুৰী বৰপেটা লোকসভা সমষ্টিৰ পৰা নিৰ্বাচিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
