সাংসদ ভৱনত উদ্ধাৰ টকাৰ বাণ্ডিল, কংগ্ৰেছ নেতাৰ আসনৰ তলত উদ্ধাৰ টকাখিনি
দেশজুৰি আলোড়নৰ সৃষ্টি কৰিছে সাংসদ ভৱনৰ এক ঘটনাই। কংগ্ৰেছ নেতা এগৰাকীৰ আসনৰ তলৰ পৰা উদ্ধাৰ টকাৰ বাণ্ডিল। যাৰ পাছতে তোলপাৰ লাগি যায় সকলোফালে। কিদৰে সাংসদ ভৱনৰ ভিতৰত প্ৰৱেশ কৰিলে টকাৰ বাণ্ডিল, তাকে লৈ এতিয়া প্ৰশ্ন।
কালি সন্ধিয়া সাসংদ ভৱনৰ অধিৱেশন অন্ত পৰাৰ পাছতে নিৰাপত্তা পৰীক্ষা চলি আছিল। সেই পৰীক্ষা নিৰিক্ষাতেই উদ্ধাৰ হয় টকাৰ বাণ্ডিল। প্ৰাপ্ত খবৰ অনুসৰি, ৰাজ্যসভাৰ ২২২ নং আসনত যোৱা বৃহস্পতিবাৰে উদ্ধাৰ হৈছিল টকাৰ বাণ্ডিল।
পাছত জানিব পৰা যায় এই আসন কংগ্ৰেছ নেতা তথা তেলেংগনাৰ কংগ্ৰেছ সাংসদ তথা বিখ্যাত অধিবক্তা অভিষেক মনু সিংৱীৰ। ৰাজ্যসভাত নোটৰ বাণ্ডিলটো উদ্ধাৰ হোৱাৰ পিছতে সাংসদসকলৰ মাজত আতংকৰ সৃষ্টি হৈছে। ৰাজ্যসভাৰ অধ্যক্ষ জগদীপ ধনখৰে বিষয়টোৰ তদন্তৰ নিৰ্দেশ দিছে।
অৱশ্যে অভিষেক মনু সিংভীয়ে লগে লগে এই বিষয়ে অস্বীকাৰ কৰি কয় যে, এই টকা তেওঁৰ নহয়। অভিষেক মনু সিংভীয়ে কয় যে, ‘কি হৈছে মই নাজানো, কিন্তু সেই নোটৰ বাণ্ডিলটো মোৰ নহয়। মাত্ৰ ৫০০ টকা লৈ সংসদলৈ গৈছিলো’।
অভিষেক মনু সিংৱীৰ মতে ‘মই ১২:৫৭ বজাত ৰাজ্যসভালৈ গৈ ১ বজাত উভতি আহিছিলো। সেই সময়ছোৱাত মোৰ হাতত মাত্ৰ ৫০০ টকীয়া নোট এখন আছিল। এই সমগ্ৰ বিষয়টো তদন্ত কৰিব লাগে’। সদনত এই হুলস্থুল আৰম্ভ হোৱাৰ পাছতে অধ্যক্ষ জগদীপ ধনখৰেও তদন্তৰ নিৰ্দেশ দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
