টেলিভিছন ধাৰাবাহিক ‘য়ে কাহা আ গয়ে হম’ৰ শ্বুটিংৰ সময়ত সহ অভিনেতা কৰণ কুন্দ্ৰাৰ বিৰুদ্ধে হাৰাশাস্তি আৰু শাৰীৰিক নিৰ্যাতনৰ গুৰুতৰ অভিযোগ উত্থাপন কৰিছে অভিনেত্ৰী সানভি তালৱাৰে। সানভিয়ে দাবী কৰে যে তেওঁ নিজেই চেটত থাকি ভাল পাইছিল কিন্তু বেছি সকলোৰে সৈতে মিলিত হোৱা নাছিল – যিটো কৰণ আৰু তেতিয়াৰ পৰিচালকজনে একেবাৰেই ভাল পোৱা নাছিল।
এটা দৃশ্যৰ শ্বুটিঙৰ অভিজ্ঞতা শ্বেয়াৰ কৰি সানভিয়ে অভিযোগ কৰে যে পৰিচালকে ‘একচন’ কমাণ্ড দিয়াৰ আগতেই কৰণে তেওঁক হঠাতে চুম্বন কৰিছিল। এই ঘটনাৰ প্ৰতি সঁহাৰি জনাই তেওঁ কৰণক চৰ মাৰে। ইয়াৰ পিছত পৰিস্থিতি অধিক উত্তপ্ত হৈ পৰে আৰু কৰণে পুনৰ তেওঁক আক্ৰমণ কৰে বুলি দাবী কৰে অভিনেত্ৰীগৰাকীয়ে।
শেহতীয়াকৈ ফিল্মীবিটৰ সৈতে হোৱা এক সাক্ষাৎকাৰত সানভিয়ে কয়, “এটা দৃশ্যৰ শ্বুটিং হৈছিল, কিন্তু পৰিচালকে এতিয়াও ‘একচন’ বুলি কোৱা নাছিল। তাৰ আগতে তেওঁ মোক চুম্বন কৰিছিল আৰু মই তেওঁক চৰ মাৰিছিলো। সেই মুহূৰ্তত তেওঁ কোনো প্ৰতিক্ৰিয়া প্ৰকাশ কৰা নাছিল, কিন্তু কিছু সময়ৰ পিছত, তেওঁ ঘূৰি আহি মোক এবাৰ চৰ মাৰিছিল। এজন পুৰুষ আৰু এগৰাকী মহিলাৰ মাজত চৰ এটাৰ তীব্ৰতাৰ মাজত বহুত পাৰ্থক্য আছে। মই মজিয়াত বাগৰি পৰিলোঁ। তাৰ পিছত তেওঁ গালি-গালাজ কৰিবলৈ আৰম্ভ কৰিলে। মোক আৰু মোৰ পৰিয়ালক।”
এই কাণ্ডৰ পিছত শ্বুটিং স্থলীত থকা পৰিৱেশক লৈ ক্ষোভ প্ৰকাশ কৰি অভিনেত্ৰীগৰাকীয়ে আৰু কয়, “সেইদিনা চেটত মোৰ কাষত কোনেও থিয় দিয়া নাছিল। পিছত একতা মেম (একতা কাপুৰ)য়ে কৰণৰ হৈ মোৰ ওচৰত ক্ষমা বিচাৰি মোক সমৰ্থন কৰিছিল। পৰিস্থিতি চম্ভালিবলৈ তেওঁ মোক বহুত সহায় কৰিছিল।” সানভিয়ে কয় যে সেই সময়ত কৰণে অভিনেত্ৰী অনুষা দণ্ডেকাৰৰ লগত ডেটিং কৰি আছিল। এই ঘটনাৰ কথা জানিব পাৰি অনুষাও চেটলৈ আহে। কিন্তু পিছত কৰণ আৰু পৰিচালকজনে মিলি চেটটোৰ পৰিৱেশ ইমান আশন্ত কৰি তুলিছিল যে তেওঁৰ কামত অসুবিধাৰ সৃষ্টি কছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
