২৬ দিন ধৰি অনশন কৰা ছোনম ৱাংচুকে অনশন ভংগ কৰাৰ পাছত একাংশ বিৰোধী সাংসদ আৰু নেতাই বিভিন্ন প্ৰশ্ন উত্থাপন কৰা দেখা গৈছে। কোনোৱে তেওঁক গোপন বুজাবুজি কৰাৰ অভিযোগ উত্থাপন কৰাৰ বিপৰীতে কোনোৱে তেওঁক আন্না-২ বুলি অভিযোগ কৰিছে। অৱশ্যে এক ভিডিঅ বাৰ্তাযোগে এই অভিযোগসমূহৰ উচিত উত্তৰ দিছে ছোনম ৱাংচুকে।
২৬ দিনৰ অনশনৰ পিছতো সততাৰ প্ৰমাণ দিব লাগিব নেকি?
ক্ষোভেৰে ছোনম ৱাংচুকে সেই সংশ্লিষ্ট বিৰোধী সাংসদকলক প্ৰশ্ন কৰে “২৬ দিনৰ অনশনৰ পিছতো মোৰ সততাৰ প্ৰমাণ কৰিব লাগিব নেকি? চৰিত্ৰৰ প্ৰমাণ পত্ৰ দেখুৱাব লাগিব নেকি?”কিছু দুখ আৰু আচৰিত হৈ ভিডিঅ’যোগে এই বাৰ্তা প্ৰেৰণ কৰিবলৈ বাধ্য হোৱা বুলিও তেওঁ কয়। উল্লেখ্য যে ২৬ দিনৰ অনশনৰ ফলত ১১ কিলোগ্ৰাম শৰীৰৰ ওজন কমিছে ছোনম ৱাংচুকৰ। অৱশ্যে ভিডিঅ বাৰ্তাটোত এতিয়াও তেওঁ নিজকে যুঁজিবলৈ সাজু কৰি ৰাখিছে বুলি মন্তব্য কৰে।
ৱাংচুকৰ বিৰুদ্ধে গোপন চুক্তিৰ অভিযোগ!
ছোনম ৱাংচুকে লগতে ক্ষোভেৰে কয় “লাডাখৰ দৰে ঠাণ্ডা পৰিৱেশৰ পৰা আহি দিল্লীৰ দৰে অত্যন্ত গৰম ঠাইত অনশন কৰাৰ পিছতো মোৰ অনশন কিমান বিশুদ্ধ আৰু সৎ আছিল সেইটো প্ৰমাণ কৰিবলৈ মই চৰিত্ৰৰ প্ৰমাণ পত্ৰ দিব লাগিব নেকি? কোনো কোনোৱে প্ৰশ্ন কৰিছে যে মই কিয় ব্ৰত ভংগ কৰিলোঁ। আন কোনোৱে মোৰ বিৰুদ্ধে চুক্তিৰ বিনিময়ত অনশন ভংগৰ অভিযোগ উত্থাপন কৰিছে। মোৰ অনশন ১০০% পৱিত্ৰ। ভিডিঅ’টোত ৱাংচুকে কয় যে, “মই যদি চুক্তি কৰিলোহেঁতেন তেন্তে ২৬ দিনৰ বাবে অনশন কৰাৰ কিয় প্ৰয়োজন হৈছিল? যদি মই চুক্তি কৰিলোহেঁতেন তেন্তে এয়াৰ কণ্ডিচনাৰ কোঠাত বহি কৰিব নোৱাৰিলোহেঁতেননে? মোৰ বিৰুদ্ধে অনা এই অভিযোগ সঁচাকৈয়ে লজ্জাজনক।” অৱশ্যে কোন বিৰোধী নেতাই ৱাংচুকৰ বিৰুদ্ধে এই অভিযোগ আনিছে তাৰ সবিশেষ সদৰী কৰা নাই সমাজকৰ্মীজনে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
