অসম লাইভ২৪ঃ আইমী বৰুৱাৰ বহুচৰ্চিত ‘চেমখৰ’ ছবিখনক লৈ সৃষ্টি হৈছে বিতৰ্ক। ছবিখনত আইমী বৰুৱাই চেমখৰ ডিমাচাসকলৰ জীৱনক লৈ মিছা আৰু ভিত্তিহীন তথ্য সন্নিৱিষ্ট কৰাৰ অভিযোগ উত্থাপন হৈছে। ইয়াৰোপৰি ছবিখনত অভিনয় কৰা এটি তিনিমহীয়া কণমানিৰ শ্বুটিং শেষ হোৱাৰ ৫ দিন পিছতেই মৃত্যু হোৱা বুলিও অভিযোগ আনিছে৷ বিহত দিনকেইটাত এই বিষয়টো লৈ ক্ষুব্ধ হৈ পৰিছে ডিমা হাচাওৰ একাংশ লোক।
কণমানিটোৰ মৃত্যুৰ বাতৰিক লৈ সামাজিক মাধ্যমত একাংশ সৰৱ হৈ থাকোতেই কণমানিটোৰ পিতৃ-মাতৃয়ে এই সন্দৰ্ভত প্ৰতিক্ৰিয়া ব্যক্ত কৰিছে৷ পিতৃ-মাতৃয়ে সন্তানটোৰ মৃত্যুৰ বাবে কোনো প্ৰকাৰেই আইমী বৰুৱা জগৰীয়া নহয় বুলি উল্লেখ কৰি কয় যে, আইমী বৰুৱাই সন্তানটোক নিজৰ সন্তানৰ দৰেই মৰম কৰিছিল৷
বৃহস্পতিবাৰে হাফলঙত আইমী বৰুৱাৰ বিৰুদ্ধে উত্তাল প্ৰতিবাদ সাব্যস্ত কৰে সহস্ৰাধিক যুৱক–যুৱতী, পুৰুষ–মহিলাই। ছবিখনত বহু মিছা তথ্য সন্নিৱিষ্ট কৰাৰ অভিযোগ কৰে প্ৰতিবাদকাৰীসকলে। ছবিখনত দেখুওৱা কেতবোৰ তথ্যৰ বাস্তৱত কোনো ভিত্তি নাই বুলি মন্তব্য কৰে প্ৰতিবাদকাৰীসকলে।ইউনাইটেড ডিমাচা য়ুথৰ উদ্যোগত প্ৰতিবাদী সমদলত বিভিন্ন ৰাজনৈতিক দলৰ নেতা–কৰ্মীয়েও অংশগ্ৰহণ কৰে।
আইমী বৰুৱাই পৰিচালনা তথা অভিনয় কৰা ‘চেমখৰ’ ছবিত দেখুওৱা হৈছে চেমখৰ জনগোষ্ঠীৰ এখন আদিম গাঁও। য’ত কন্যা সন্তান জন্ম দি মাকৰ মৃত্যু হ’লে সন্তানটিক জীৱন্তে পুতি পেলোৱা হয়। এইয়া সম্পূৰ্ণ মনে সজা কাহিনী এনে কোনো নিয়ম তাত নাই বুলি সম্প্ৰদায়টোৰ লোকসকলে প্ৰকাশ কৰিছে৷ এনে ভুল উপস্থাপনৰ বাবেই ‘চেমখৰ’ ছবিখন নিষিদ্ধ ঘোষণা কৰাৰো দাবী উত্থাপন কৰিছে প্ৰতিবাদকাৰীসকলে।
ইফালে, চেমখৰ ছবিখনক লৈ বিতৰ্কৰ সৃষ্টি হোৱাৰ পিছতে সামাজিক মাধ্যমত নিজৰ প্ৰতিক্ৰিয়া প্ৰকাশ কৰিছে আইমী বৰুৱাই। ছবিখনৰ কাহিনীভাগ ঠাইখনক আধাৰ হিচাপে লৈ আগবঢ়াই নিয়া হৈছে যদিও ইয়াৰ কাহিনী সকলো ফালৰ পৰাই কাল্পনিক বুলি উল্লেখ কৰিছে আইমীয়ে।
সামাজিক মাধ্যমত আইমী বৰুৱাই লিখিছে, ‘চেমখৰ ছবিখন কিছু কাকত-গ্ৰন্থ-আলোচনী আৰু কিছু ব্যক্তিৰ পৰা লাভ কৰা তথ্যৰে ঠাইখনক জানিবলৈ আমি আধাৰ হিচাবে লৈ কাহিনীভাগ আগবঢ়াই নিছো যদিও, ইয়াৰ কাহিনী সকলো ফালৰ পৰাই সম্পূৰ্ণ কাল্পনিক। ছবি খনৰ জৰিয়তে আমি কেতিয়াও কাৰো আৱেগ-স্বাভিমানক আঘাত কৰিব বিচৰা নাই। কেৱল মাত্ৰ ঠাইখিনিৰ সৌন্দৰ্য, স্থানীয় ভাষা, সাজ-পাৰ আদিক সমাজৰ দৃষ্টি আৰ্কষণ কৰা প্ৰয়াস কৰিছিলোঁ। তথাপিও যদি কাৰোবাক কোনো ক্ষেত্ৰত আঘাত দিছোঁ তাৰ বাবে আমি ক্ষমাপ্ৰাৰ্থী।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
