অসম লাইভ ২৪ঃ ১০ ডিচেম্বৰৰ পৰা ১৪ ডিচেম্বৰলৈ ছিকিমত অনুষ্ঠিত হ’ব দ্বিতীয় সংখ্যক ‘ছিকিম গ্ল’বেল ফিল্ম ফেষ্টিভেল ২০২১’ শীৰ্ষক চলচ্চিত্ৰ মহোৎসৱ৷ ছিকিম চৰকাৰৰ ফিল্ম প্ৰম’চন ব’ৰ্ড আৰু তথ্য আৰু জনসংযোগ বিভাগৰ উদ্যোগত অনুষ্ঠিত হ’ব চলচ্চিত্ৰ মহোৎসৱ৷ এই মহোৎসৱৰ উদ্দেশ্য ছিকিম তথা উত্তৰ-পূৰ্বাঞ্চলৰ চলচ্চিত্ৰ আৰু ফেশ্বন ক্ষেত্ৰৰ উত্তৰণ তথা ছিকিমক ‘ফিল্ম টুৰিজ্ম হটস্পট’ৰূপে প্ৰতিষ্ঠা কৰা৷ ৫ দিনীয়াকৈ অনুষ্ঠিত হ’বলগীয়া চলচ্চিত্ৰ মহোৎসৱত অংশগ্ৰহণ কৰিব চলচ্চিত্ৰ উদ্যোগৰে জড়িত দেশী-বিদেশী বহু বিশিষ্ট অভিনেতা-অভিনেত্ৰী, প্ৰযোজক-পৰিচালকে৷ চলচ্চিত্ৰ মহোৎসৱত অংশগ্ৰহণ কৰিব মালাইকা অড়োৰা, প্ৰিয়দৰ্শন, লিজা ৰয়, সঞ্জয় পুৰণ সিং চৌহান, অক্ষয় আদিত্য লামা, সঞ্জয় ঘোষ, সোণালী খুল্লাৰ শ্ৰুফ, অনন্ত নাৰায়ণ মহাদেৱনকে ধৰি বলীউডৰ বহু তাৰকাই৷ এই মহোৎসৱত অংশ ল’ব ফ্ৰান্স, ইটালী, আমেৰিকা আদি দেশৰ বহুকেইগৰাকী ছবি পৰিচালক, অভিনেতা-অভিনেত্ৰী আৰু প্ৰযোজকে৷ অংশগ্ৰহণ কৰিব স্পেইনৰ সাংসদেও৷ চলচ্চিত্ৰ মহোৎসৱলৈ অতিথিৰূপে আমন্ত্ৰিত হৈছে অসমৰ সাংবাদিক দেৱজিৎ ভূঞাও৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
