অসম লাইভ২৪ঃ উচ্চতম ন্যায়ালয়ে দেশৰ ৰাজধানী দিল্লীৰ প্ৰশাসনিক সেৱাৰ নিয়ন্ত্ৰণক লৈ কেন্দ্ৰ চৰকাৰ আৰু দিল্লীৰ ৰাজ্য চৰকাৰৰ মাজত চলি থকা বিবাদৰ ৰায়দান কৰিছে। ইয়াৰ পূৰ্বে পাঁচজনীয়া সাংবিধানিক বিচাৰপীঠে কেন্দ্ৰ আৰু দিল্লী চৰকাৰৰ যুক্তি শুনি ১৮ জানুৱাৰীতেই বিশেষ আদেশ প্ৰদান কৰিছিল। বৃহস্পতিবাৰে ৫টা বিশেষ বিষয়ক লৈ ৰায়দান কৰিছে চন্দ্ৰচুড়ৰ বিচাৰপীঠে।
দিল্লী চৰকাৰে অসামৰিক সেৱা নিজৰ নিয়ন্ত্ৰণত ৰাখিব
উচ্চতম ন্যায়ালয়ে দিয়া ৰায় মতে সকলোৰে সন্মতিতেই ন্যায়ালয়ে অসামৰিক সেৱাৰ ওপৰত দিল্লীৰ ৰাজ্য চৰকাৰৰ নিয়ন্ত্ৰণ থাকিব বুলি জনাইছে। দিল্লী চৰকাৰৰ সেৱাসমূহৰ ওপৰত আইনী আৰু চৰকাৰী ক্ষমতা থাকিব।
২০১৯ ৰ ৰায়ৰ সৈতে সন্মত হোৱা নাছিল বিচাৰপীঠ
মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত এখন সাংবিধানিক বিচাৰপীঠে কয় যে, চৰকাৰৰ প্ৰশাসনৰ ওপৰত নিয়ন্ত্ৰণ থকা প্ৰয়োজন। ন্যায়াধীশ অশোক ভূষণে ২০১৯ৰ ৰায়ৰ সৈতে একমত হোৱা নাছিল তেওঁৰ মতে সেৱাসমূহৰ ওপৰত দিল্লীৰ কোনো অধিকাৰ নাই।
লেফটেনেণ্ট গভৰ্ণৰৰ ভুমিকাক লৈয়ো ৰায়
উচ্চতম ন্যায়ালয়ে কয় যে, লেফটেনেণ্ট গভৰ্ণৰৰ ভূমি, ৰাজহুৱা শৃংখলা আৰু আৰক্ষী সম্পৰ্কীয় বিষয়ৰ বাহিৰে কোনো বিষয়ত মাত মতাৰ অধিকাৰ নাই। চৰকাৰক পৰামৰ্শহে দিব পাৰিব লেফটেনেণ্ট গভৰ্ণৰে।
দিল্লী বিধানসভা গণতন্ত্ৰৰ নীতি-সিদ্ধান্তৰ প্ৰতীক
মুখ্য ন্যায়াধীশ ডি ৱাই চন্দ্ৰচূড়ৰ বিচাৰপীঠে কয় যে, দিল্লী বিধানসভাই গণতন্ত্ৰৰ নীতি সিদ্ধান্তক সন্মান জনাইয়েই সকলো কাম কৰি গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
