ম্যানমাৰৰ ভূমিকম্পৰ ফলত কম্পন অনুভূত হৈছে প্ৰতিবেশী দেশ থাইলেণ্ডতো। তাৰেই ৰাজধানী চহৰ বেংককত ভূমিকম্পৰ ফলত ভাঙি পৰিছে নিৰ্মীয়মান এটা ৩০ মহলীয়া ঘৰ। বহু শ্ৰমিকেই সেই ঘৰত কাম কৰি আছিল। তাতেই একাংশ শ্ৰমিক যদি জীৱন্তে উলাই আহিছে কিছু শ্ৰমিক আকৌ সোমাই পৰিছে ধ্বংসস্তুপৰ মাজত। শনিবাৰে হোৱা ভূমিকম্পৰ ফলত ধ্বংস হৈছে বহু শ্ৰমিকৰ জীৱনো। এই ঘটনাৰ বৰ্ণনা দিছে এগৰাকী প্ৰত্যক্ষদৰ্শী শ্ৰমিকে। কেনেকৈ তেওঁৰ চকুৰ সন্মুখত ৩০ মহলীয়া ঘৰ ভাঙি পৰিছিল তাছপাতৰ দৰে। সেই সময়ত তেওঁৰ ভাতৃয়ে কাম কৰি আছিল ভিতৰত।
সংবাদ সংস্থা এ এফ পিক প্ৰত্যক্ষদৰ্শী শ্ৰমিক খিন আঙে কয়- বেংককত ৩০ মহলীয়া এটা কেইবামহলীয়া অট্টালিকা নিৰ্মাণ হৈ আছিল। সেই ঘৰটোৰ নিৰ্মাণো প্ৰায় শেষ পৰ্যায়ত। দুপৰীয়া ১ বজাত আমাৰ কামৰ ছিফ্ট সলনি হয়। মই পানী খাবলৈ বাহিৰলৈ ওলাই আহিছিলো। বাহিৰলৈ ওলাই আহোতেই মোৰ ভাইটি সেই অট্টালিকাৰ ভিতৰলৈ সোমাই গৈছিল। দ্বিতীয় ছিফ্টৰ কাম আৰম্ভ হোৱাৰ সময়। কিন্তু মই বাহিৰ পোৱা মানে জোঁকাৰণি আৰম্ভ। কেইটামান ছেকেণ্ডতেই মোৰ চকু ধুলিয়ে চাট মাৰি ধৰিল। দেখিলো ঘৰটো হালি পৰিছে। মই প্ৰাণটো মুঠিত লৈ ৰাস্তাৰে দৌৰ দিলো। অলপ দূৰ গৈ ঘূৰি চাই দেখো অট্টালিকাটো নাই। কেইটামান ছেকেণ্ডতেই ৩০ মহলীয়া অট্টালিকা ধূলিত পৰিণত হল। মোৰ ভাইটিও সেই বিল্ডিঙৰ ভিতৰত আছিল।
শুকুৰবাৰে পুৱা ম্যানমাৰ কঁপাই গল দুটা ডাঙৰ ভূমিকম্পই। প্ৰথম কম্পনৰ মাত্ৰা আছিল ৭.৭ আৰু আফটাৰশ্বকৰ মাত্ৰা আছিল ৬.৮। এই দুই কম্পনত ক্ষয়ক্ষতি হৈছে বেংককৰো। ৩০ মহলীয়া অট্টালিকা ভাঙি পৰি মৃত্যু হৈছে ১০ গৰাকী শ্ৰমিকৰ। বহু শ্ৰমিকক এতিয়াও উদ্ধাৰ কৰিব পৰা হোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
