অসম লাইভ২৪ঃ টি-২০ বিশ্বকাপৰ ছেমিফাইনেলত ভাৰতীয় দলটো ধৰাশায়ী হ’ল ইংলেণ্ডৰ হাতত। হাৰ্দিক আৰু কোহলিয়ে ভাল বেটিং কৰিলেও শেষ পৰ্যন্ত ভাৰতীয় দলটো ফাইনেলত প্ৰৱেশ কৰিব নোৱাৰিলে। প্ৰথমে বেট ধৰি ৬ উইকেট হেৰুৱাই ১৬৮ ৰান কৰিছিল টীম ব্লুৱে। কিন্তু ইংলেণ্ডৰ অপেনাৰদ্বয় জ’ছ বাটলাৰ আৰু এলেক্স হেলছেৰ বেটিঙে ধৰাশায়ী কৰে ভাৰতীয় দলটোক। টী-২০ বিশ্বকাপত আৰম্ভণিৰে পৰা ভাৰতীয় দলটোৰ পাৰফৰ্মেন্সক লৈ প্ৰশ্ন উত্থাপিত হৈছিল। প্ৰায়কেইখন মেচতে ভাৰতীয় দলটোৱে কেৱল বেটিঙৰ জোৰতহে জিকিবলৈ সক্ষম হৈছিল। পাকিস্তান আৰু বাংলাদেশৰ বিৰুদ্ধেও কথমপিহে জয় লাভ কৰিছিল ভাৰতে। কিন্তু ছেমিফাইনেলত ভাৰতীয় দলটোক আৰু ভাগ্যই লগ নিদিলে। ইংলেণ্ডৰ ভাবিব নোৱাৰা ধৰণে বিধ্বস্ত হ’ল টীম ব্লু। ।
ভাৰতীয় দলটোৰ এই বিপৰ্যয় কিয়?
উন্নত বেটিং লাইন আৰু বলিং লাইন থকাৰ পিছতো কিয় এই বিপৰ্যয়ৰ সন্মুখীন হ’ল ভাৰতীয় দলটো! আৰম্ভণি ঠিকেই আছিল! সূৰ্য কুমাৰ, বিৰাট কোহলী, হাৰ্ডিক পাণ্ডিয়াৰ পাৰফৰ্মেন্সক লৈ আশাবাদী হৈ পৰিছিল ভাৰতবাসী। এইবাৰ বিশ্বকাপ ভাৰতেই জয় কৰিব, কিন্তু সকলোৰে আশাত চেঁচাপানী ঢালি ছেমিফাইনেল খেলিয়ে অষ্ট্ৰেলিয়াৰ পৰা বিদায় মাগিলে ভাৰতে।
উল্লেখ্য যে, ২০১৫ চনত অনুষ্ঠিত এদিনীয়া বিশ্বকাপত ইংলেণ্ড দলটোৰ পাৰফৰ্মেন্স বিশেষ উন্নত নাছিল। যাৰ বাবে ভাৰতীয় দলটো অধিক আত্মবিশ্বাসী হৈ পৰিছিল। এই অতি আত্মবিশ্বাসেই পৰাজয়ৰ অন্য এক কাৰণ বুলি ক্ৰিকেট সমালোচকসকলে মন্তব্য কৰিছে। আনহাতে ইংলেণ্ডে ’১৫ৰ পাছৰে পৰা অনুশীলন জোৰদাৰ কৰিছিল। তাৰ ফলাফল ২০১৬ৰ টী-২০ বিশ্বকাপতেই বিশ্ববাসীয়ে দেখিলে। কিয়নো মাত্ৰ এবছৰৰ ভিতৰতে উন্নত প্ৰদৰ্শনেৰে ২০১৬ত ফাইনেল খেলিলে ইংলেণ্ডে। তাৰ পাছত ২০১৯ৰ শ্বাসৰুদ্ধকৰ ফাইনেলত ৰোমাঞ্চকৰ জয় লাভ ইংলেণ্ডৰ।
ইয়াৰ পাছৰে পৰা টীম ইংলেণ্ড আৰু থমকি ৰব লগা হোৱা নাই। কিন্তু ভাৰতীয় দলটোৱে পাৰফৰ্মেন্স উন্নত কৰা নাছিল বুলিও খেল সমালোচকে মন্তব্য কৰিছে। ইংলেণ্ড, পাকিস্তান আদি দলসমূহে প্ৰত্যেক বছৰে উন্নত প্ৰদৰ্শন দেখুৱাবৰ বাবে যথেষ্ট অনুশীলন কৰে। কিন্তু ভাৰতীয় দলটোৱে এইবাৰো অনুশীলনতকৈ খাদ্য, হোটেল আদি আনুসংগিক দিশসমূহতহে বিতৰ্ক কৰা পৰিলক্ষিত হ’ল বুলিও আক্ষেপ উজাৰিছে বহু নেটিজেনে। ।
ইংলেণ্ডৰ পৰা কি শিক্ষা ল’ব লাগে ভাৰতে?
বিগত বছৰকেইটাত খেলৰ পদ্ধতিত বহুকেইটা পৰিৱৰ্তন আনিছে ব্ৰিটিছ বাহিনীয়ে। সীমিত অভাৰৰ খেলসমূহত প্ৰথমৰৰ পৰা আক্ৰমণাত্মক প্ৰদৰ্শন দাঙি ধৰাৰ চেষ্টা কৰে বাটলাৰ বাহিনীয়ে। বহুকেইখন টী-২০ মেচত ইংলেণ্ডৰ দলৰ ছিনিয়ক তাৰকা খেলুৱৈ সময়মতে বিদায় দিছে দলটোৱে। ২০০৭ চনত মহেন্দ্ৰ সিং ধোনীয়ে ভাৰতীয় দলটোৰ দায়িত্ব লৈ, যেনেকৈ সময়মতে তাৰকা খেলুৱৈসকলক দলটোৰ পৰা অব্যাহতি দিছিল, সেই নীতিকে অনুসৰণ কৰিছে বাটলাৰ বাহিনীয়ে। সাম্প্ৰতিক সময়ত বাটলাৰ বাহিনীৰ খেল দেখি খেল সমালোচকে একেষাৰে কৈছে বাটলাৰ বাহিনীয়ে হয় কৰিম- নহ’লে মৰিম। এই নীতিৰেই খেলপথাৰত খেল দেখুৱাইছে ইংলেণ্ডে। দলটোৰ বেটিং পূৰ্বতকৈ যথেষ্ট উন্নত হৈছে। বিপক্ষৰ কোনো দলকেই দুৰ্বল বুলি ভবা নাই বাটলাৰ বাহিনীয়ে।
খেলৰ মাজতে বিৰতিৰ প্ৰয়োজন!
২০২১ চনত ভাৰতৰ মাটিত হোৱা টেষ্ট ছিৰিজৰ মাজতেই সাময়িক বিৰতি লৈছিল বাটলাৰে। অৰ্থাৎ খেলৰ মাজত বিৰতিৰো প্ৰয়োজনীয়তা আছে। ইংলেণ্ডৰ দলটোৰ যুক্তি ক্ৰিকেটাৰসকলৰ মানসিক স্বাস্থ্য ভালে ৰাখিবলৈ বিৰতিৰ প্ৰয়োজনীয়তা থাকে। বিশ্বকাপ খেলাৰ আগমুহূৰ্তত পাকিস্তানৰ বিৰুদ্ধে টি-২০ খেলি থকাৰ মাজতেই বেন ষ্ট’কচ আৰু বাটলাৰকে ধৰি বহুকেইজনেই বিৰতি লৈছিল।
স্পিনাৰৰ গুৰুত্ব বঢ়াব লাগে!
ইংলেণ্ড দলে স্পিনাৰৰ গুৰুত্ব আগতকৈ বঢ়াইছে। সীমিত অভাৰৰ মেচত স্পিনাৰৰ গুৰুত্ব আছে। আদিল ৰছিদ আৰু লিয়াম লিভিংষ্টনৰ দৰে স্পিনাৰক গুৰুত্ব দিছে বাটলাৰবাহিনীয়ে। তাৰ বিপৰীতে ধোনীৰ অৱসৰৰ পিছত ভাৰতীয় দলটোৱে স্পিনাৰ চিনাক্ত কৰাত সিদ্ধান্তই ল’ব পৰা নাই। ধোনীৰ পাছত আৰু কোনো এজন অধিনায়কে সঠিক স্পিনাৰ চিনাক্ত কৰিব পৰা নাই।
ধনৰ বাবেই লীগ খেলি অযথা মানসিক কষ্ট লোৱাৰ প্ৰয়োজন নাই
বিভিন্ন দেশত হোৱা টী-২০ৰ লীগ খেলসমূহত ইংলেণ্ডৰ খেলুৱৈৰ চাহিদা বৃদ্ধি হৈছে। কিন্তু ধনৰ বাবেই লীগ খেল খেলিব সেই কথাত ইংলেণ্ডৰ খেলুৱৈৰ দ্বিমত আছে। ষ্ট্ৰোকছৰ দৰে খেলুৱৈয়ে মানসিক স্বাস্থ্য ভালে ৰখাৰ বাবেই আইপিএলৰ পৰাও অব্যাহতি লৈছিল।
এই সময়ত ভাৰতীয় দলটোৱে এইকেইটা কথাত গুৰুত্ব আৰোপ কৰিলেই পৰবৰ্তী সময়ত ভাৰতীয় দলৰ আৰু এনে বিপৰ্যয় নহ’ব বুলিও খেল সমালোচকসকলে মন্তব্য কৰা পৰিলক্ষিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
