অসম লাইভ২৪ঃ আকৌ এজন অভিনেতাৰ মৃত্যু। জিমত শৰীৰ চৰ্চা কৰি থকা অৱস্থাতেই শেষ বিদায় ল’লে অভিনেতা সিদ্ধান্ত সূৰ্যবংশীয়ে। ৪৬ বছৰীয়া অভিনেতা সিদ্ধান্তই শৰীৰ চৰ্চা কেন্দ্ৰতেই হঠাতে বাগৰি পৰাত ততাতৈয়াকৈ কোকিলাবেন ধীৰুভাই আম্বানী হাস্পতাললৈ লৈ যোৱা হয় যদিও চিকিৎসালয়তে মৃত্যুক সাবটি লয় অভিনেতাগৰাকীয়ে।
বৰ্তমানেও পিৰয়ালৰ তৰফৰ পৰা সিদ্ধান্তৰ ৰোগ সন্দৰ্ভত কোনো মন্তব্য অহা নাই যদিও বহুতেই অভিনেতাজন হৃদৰোগত আক্ৰান্ত হৈছিল বুলি প্ৰকাশ কৰিছে। ইয়াৰ পূৰ্বেও কৌতুক অভিনেতা ৰাজু শ্ৰী বাস্তৱ, সিদ্ধাৰ্থ শুক্লাকে ধৰি বহুকেইজন অভিনেতাৰ হৃদৰোগত মৃত্যু ঘটিছে। কিয় শৰীৰ চৰ্চা কৰা লোকসকলৰ মাজত বৃদ্ধি হৈছে হৃদৰোগৰ ভয়াৱহতা?
শৰীৰ চৰ্চাৰ প্ৰশিক্ষকৰ মতে প্ৰতিদিনে শৰীৰ চৰ্চা কৰিলেই ব্যক্তি এজন ফিট হৈ থাকিব এয়া সম্পূৰ্ণ ভুল ধাৰণা। শৰীৰ চৰ্চাৰ সমানে সমানে শৰীৰত কিবা ৰোগ হৈ আছে নেকি এই সম্পৰ্কে নিয়মিত চিকিৎসকৰ পৰামৰ্শ লৈ থকাটো অত্যন্ত জৰুৰী। প্ৰশিক্ষকে জনোৱা অনুযায়ী, ‘জিমত জইন কৰাৰ আগতেই শাৰিৰীক অসুস্থতাৰ কথা প্ৰশিক্ষকক ভালধৰণে ক’ব লাগে। বহুতেই জিমত জইন কৰোতে হৈ থকা শাৰিৰীক অসুস্থতাৰ কথা লুকুৱাই ৰাখে। বিশেষকৈ কভিডত আক্ৰান্ত হ’লে ছমাহলৈ কোনোধৰণৰ শৰীৰচৰ্চা কৰিব নালাগে। কভিডৰ পাছতেই হৃদৰোগীৰ সংখ্যা বিশ্বত বৃদ্ধি হৈছে। জিম কৰাৰ সময়ত অত্যাধিক ঘাম বাহিৰ হ’লেষ শ্বাস-প্ৰশ্বাস ঘন হ’লে বুকুৰ বিষ আদি হ’লে তাৎক্ষণিকভাৱে চিকিৎসকৰ পৰামৰ্শ ল’ব লাগে।
চিকিৎসকে প্ৰকাশ কৰা অনুযায়ী, বংশত যদি হৃদৰোগী, উচ্চ ৰক্তচাপ, কলষ্টেৰলৰ সমস্যা থকা ৰোগী আছে তেন্তে শৰীৰ চৰ্চালৈ যোৱাৰ আগতে ভালকৈ শৰীৰৰ পৰীক্ষা কৰি লোৱাটো জৰুৰী। আৰম্ভণিতেই কঠোৰ শৰীৰ চৰ্চা কৰিব নালাগে। শৰীৰক কিছু সময় দিয়াৰ প্ৰয়োজন থাকে, আৰম্ভণিতেই অত্যাধিক ওজন দাঙিব নালাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
