তামিলনাডুত নতুন চৰকাৰ গঠন হৈছে। ৰাজ্যখনৰ নতুন মুখ্যমন্ত্ৰী হিচাপে শপত গ্ৰহণ কৰাৰ পিছত প্ৰথমটো বৃহৎ সিদ্ধান্তত গ্ৰহণ কৰিছে থালাপতি বিজয়ে। বিজয়ে ৰাজ্যজুৰি পূজাস্থলী, শিক্ষানুষ্ঠান, বাছ ষ্টেণ্ডৰ সমীপত অৱস্থিত ৭১৭ খন চৰকাৰী সুৰাৰ দোকান বন্ধ কৰাৰ নিৰ্দেশ দিয়ে।
মঙলবাৰ অৰ্থাৎ আজি জাৰি কৰা এক নিৰ্দেশ অনুসৰি অহা দুসপ্তাহৰ ভিতৰত মন্দিৰ, মছজিদ, গীৰ্জা, বিদ্যালয়, মহাবিদ্যালয় আৰু বাছ ষ্টেণ্ডৰ পৰা ৫০০ মিটাৰৰ ভিতৰত চলি থকা তামিলনাডু ৰাজ্যিক বিপণন নিগমৰ সকলো সুৰাৰ দোকান বন্ধ কৰিবলৈ নিৰ্দেশ দিছে।
ৰাজ্যত বন্ধ থাকিব ৭১৭ খন দোকান
তামিলনাডু চৰকাৰৰ তথ্য অনুসৰি ৰাজ্যখনত বৰ্তমান ৪৭৬৫ খন টাছমাক সুৰাৰ দোকান আছে। বন্ধৰ বাবে নিৰ্বাচিত ৭১৭ খন দোকানৰ ভিতৰত ২৭৬খন পূজাস্থলীৰ ওচৰত, ১৮৬খন শিক্ষানুষ্ঠানৰ ওচৰত, আৰু ২৫৫খন বাছ ষ্টেণ্ডৰ ওচৰত।
বিজয়ে কাৰ্যভাৰ গ্ৰহণ কৰাৰ কিছু ঘণ্টাৰ ভিতৰতে গ্ৰহণ কৰা প্ৰথমটো বৃহৎ নীতিগত সিদ্ধান্ত হৈছে সুৰাৰ দোকান বন্ধ কৰা, আৰু নতুন চৰকাৰে ইয়াক স্পৰ্শকাতৰ ৰাজহুৱা স্থানত সুৰাৰ বিপণী স্থাপন কৰাৰ উদ্বেগ দূৰ কৰাৰ লক্ষ্যৰে এক উল্লেখযোগ্য সামাজিক সংস্কাৰৰ ব্যৱস্থা হিচাপে উপস্থাপন কৰিছে।
ইয়াৰ পূৰ্বে ৫১ বছৰীয়া অভিনেতা পৰিণত ৰাজনীতিবিদ বিজয়ে দেওবাৰে তামিলনাডুৰ মুখ্যমন্ত্ৰী হিচাপে শপত গ্ৰহণ কৰে। তেওঁৰ দল টিভিকেয়ে ঐতিহাসিক নিৰ্বাচনী জয়লাভ কৰি ৰাজ্যখনৰ সৰ্ববৃহৎ দল হিচাপে নিজকে প্ৰতিষ্ঠা কৰে। সংখ্যাগৰিষ্ঠতাৰ অভাৱত পৰিলেও টিভিকে কংগ্ৰেছ, বাওঁপন্থী দল, ভিচিকে, মুছলিম লীগৰ সমৰ্থনত ইতিহাসত প্ৰথমখন মিত্ৰজোঁটৰ চৰকাৰ গঠন কৰে।
মুখ্যমন্ত্ৰীয়ে কাৰ্যভাৰ গ্ৰহণ কৰাৰ পিছৰে পৰা লোৱা আন উল্লেখযোগ্য সিদ্ধান্তসমূহৰ ভিতৰত বিজয়ে ঘৰুৱা গ্ৰাহকক ২০০ ইউনিট বিনামূলীয়া বিদ্যুৎ প্ৰদানৰ আঁচনিত অনুমোদন জনায়। মহিলাৰ সুৰক্ষাৰ বাবে বিশেষ বাহিনী গঠনৰ বাবেও তেওঁ অনুমোদন জনায়, আৰু ৰাজ্যখনত ক্ৰমাৎ বৃদ্ধি পোৱা কথিত ড্ৰাগছৰ বিপদৰ বিৰুদ্ধে যুঁজিবলৈ দিয়া প্ৰতিশ্ৰুতি পূৰণ কৰি প্ৰতিখন জিলাতে ড্ৰাগছ বিৰোধী ইউনিট স্থাপন কৰাৰ সিদ্ধান্ত লয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
