পৃথিৱীৰ সৰ্বোচ্চ শৃংগ মাউণ্ট এভাৰেষ্টৰ বহু দুঃসাহিক কাহিনী মাজে সময়ে আপোনালোকে নিশ্চয় শুনিছে। কিন্তু আজি যিটো সত্য কাহিনী আপোনালোকৰ আগত আগবঢ়াবলৈ ওলাইছো সেয়া পঢ়ি হয়টো আপোনালোকেও ক’ব ‘ৰাখে হৰি, মাৰে কোনে’। এই কাহিনীটোৰ মূল নায়ক নেপালৰ দাৱা শ্বেৰ্পা এই ঘটনা বিগত মে’ মাহৰ শেষৰটো সপ্তাহৰ। ৫৭ বৰ্ষীয় অভিজ্ঞ দাৱা শ্বেৰ্পাই কেইবাজনো ব্ৰিটিছ পৰ্বতাৰোহীৰ সৈতে সফলতাৰে আৰোহণ কৰিছিল পৃথিৱীৰ সৰ্বোচ্চ শৃংগ এভাৰেষ্টত। তেতিয়ালৈ সকলো ঠিকেই আছিল। ইয়াৰ পূৰ্বে কেইবাবাৰো এভাৰেষ্ট আৰোহণ কৰাৰ অভিজ্ঞতা থকা দাৱা শ্বেৰ্পাই হয়টো কেতিয়াও ভবা নাছিল যে তেওঁৰ বাবে এইবাৰ ৰৈ আছে কাল অমানিশা। এইবাৰো সফলতাৰে এভাৰেষ্টৰ শিখৰত চুমুক দি উভতাৰ পথতে এভাৰেষ্টৰ শিখৰৰ পৰা প্ৰায় ১০০ মিটাৰ তলত পৰ্বতাৰোহী দলটোৰ পৰা বিচ্ছিন্ন হৈ পৰে দাৱা শ্বেৰ্পা। তাৰ পিছত প্ৰথমে অক্সিজেনৰ অভাৱ, তাৰ পিছত খাদ্যৰ অভাৱ আৰু প্ৰচণ্ড হিমবাহৰ কবলত পৰিলেও কিন্তু হাৰ মনা নাছিল দাৱাই। ইপিনে নিৰুদ্দিষ্ট হৈ পৰাৰ ৭ দিন উকলি যোৱাৰ পিছতো কোনো সন্ধান নোপোৱাত দাৱাৰ কাঠমাণ্ডুস্থিত ঘৰত বিৰাজ কৰিছিল শোকৰ ছাঁ। পৰিয়ালে শেষত সকলো আশা বাদ দি তেওঁৰ শেষকৃত্য সম্পন্ন কৰিবলৈও চলাইছিল যো-জা। কাৰণ এভাৰেষ্টত ৭ দিনলৈ মৃত্যুৰ সৈতে যুঁজ দি জয়ী হোৱাটো একপ্ৰকাৰ অসম্ভৱ। ৭ দিন অক্সিজেন অবিহনে, খাদ্য অবিহনে থাকি জীৱন্তে ঘূৰি অহাৰ কাহিনী তেনেই বিৰল, একপ্ৰকাৰ অসম্ভৱ। কিন্তু এনে অসম্ভৱপ্ৰায় ঘটনাও মিৰাকলৰ দৰে সংঘটিত হ’ল দাৱা শ্বেৰ্পাৰ ক্ষেত্ৰত আৰু তেতিয়াই আহিল শোকসন্তপ্ত পৰিয়ালৰ ওঁঠত হাঁহি বিৰিঙোৱা সেই খবৰটো। দাৱাৰ মৃত্যু হোৱা নাই, তেওঁ জীয়াই আছে আৰু তেওঁক উদ্ধাৰ কৰাৰ বাবে এভাৰেষ্টৰ পাদদেশত আগবাঢ়িছে উদ্ধাৰ অভিযানকাৰী দল।
কেনেকৈ ৭ দিনলৈ জীয়াই আছিল সাহসী দাৱা শ্বেৰ্পা?
এটা আন্তঃৰাষ্ট্ৰীয় সংবাদ মাধ্যমত দিয়া সাক্ষাৎকাৰত দাৱা শ্বেৰ্পাই কয় যে ‘মই নিজেও ভবা নাছিলো যে মই জীৱন্তে ঘৰলৈ উভতিম, জীৱন্তে উদ্ধাৰ হোৱাটো বাদেই মোৰ নশ্বৰ দেহো যে ঘৰ পাব সেই আশাও মই বাদ দিছিলো। কিন্তু নেদেখাজনৰ কৃপাত মই যেন পুনৰ জীৱন পালো’। ৭ দিনলৈ কেৱল বৰফ আৰু পেকেটত থকা কিছু চকলেট খাই জীয়াই থকা বুলি বৰ্ণনা কৰা দাৱাই লগতে কয় যে এসময়ত তেওঁ প্ৰচণ্ড হিমবাহৰো সন্মুখীন হৈছিল। কিন্তু হিমবাহ প্ৰচণ্ড হলেও দীঘলীয়া নোহোৱাৰ বাবেই হয়তো বেছি অপকাৰ নহ’ল। তেওঁ লগতে কয় যে এই জীৱন-মৃত্যুৰে যুঁজা এই দুঃসময়ত এভাৰেষ্টত আৰোহণ কৰা দীৰ্ঘদিনীয়া অভিজ্ঞতাই তেওঁক যথেষ্ট সহায় কৰে। বিগত বৃহস্পতিবাৰে এভাৰেষ্ট যাত্ৰা পথৰ খুম্বু আইচফলৰ পৰা হেলিকপ্টাৰৰ সহায়ত উদ্ধাৰ অভিযানকাৰী দলে উদ্ধাৰ কৰে। সম্প্ৰতি দাৱা শ্বেৰ্পা সংকটমুক্ত যদিও সম্পূৰ্ণ সুস্থ নহয়। নেপালৰ কাঠমাণ্ডুৰ এখন চিকিৎসালয়ত চিকিৎসাধীন হৈ আছে শ্বেৰ্পা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
