ভাগ্য ফুলিব পাৰে ৰাঘৱ চাড্ডাৰ! লাভ কৰিব পাৰে কেন্দ্ৰীয় মন্ত্ৰিত্ব!

আম আদমি পাৰ্টীৰে ৰাজনৈতিক পৰিচয় লাভ কৰি শেহতীয়াকৈ বিজেপিলৈ অহা ৰাঘৱ চাড্ডাৰ যেন ভাল দিন আহি আছে। গেৰুৱা বসন পৰিধান কৰাৰ পিছতে বিজেপি দলে চাড্ডাক দিছিল গুৰু দায়িত্ব। কিন্তু এক নিৰ্ভৰযোগ্য তথ্য অনুসৰি এইবাৰ ৰাঘৱ চাড্ডাই লাভ কৰিব পাৰে কেন্দ্ৰীয় মন্ত্ৰিত্ব। খবৰ অনুসৰি চলিত মাহৰ শেষৰ ফালে অথবা জুলাইৰ প্ৰথম সপ্তাহত মোদী মন্ত্ৰীসভাৰ সম্প্ৰসাৰণৰ সম্ভাৱনা আছে। যদি মন্ত্ৰীসভাৰ সম্প্ৰসাৰণ হয় তেতিয়া মোদী চৰকাৰৰ তৃতীয়টো কাৰ্যকালত এয়া হ’ব প্ৰথমটো সম্প্ৰসাৰণ। মোদী মন্ত্ৰীসভাৰ সম্প্ৰসাৰণত উত্তৰপ্ৰদেশ, পঞ্জাবৰ দৰে ৰাজ্যক অধিক গুৰুত্ব দিয়া হ’ব, কিয়নো এই দুয়োখন ৰাজ্যত আহি আছে বিধানসভা নিৰ্বাচন। উত্তৰপ্ৰদেশত এই পৰ্যন্ত যোগীৰ নেতৃত্বত শক্তিশালী স্থিতিত আছে বিজেপি। আনহাতে পঞ্জাবৰ দৰে ৰাজ্যত একক সংখ্যাগৰিষ্ঠতাৰে বিজেপিয়ে জিকিবলৈ যথেষ্ট প্ৰত্যাহ্বানৰ সন্মুখীন হ’ব। এনে পৰিপ্ৰেক্ষিততে কেন্দ্ৰীয় ৰে’ল ৰাজ্যমন্ত্ৰী ৰৱনীত সিং বিট্টুক বিজেপিয়ে এইবাৰ ৰাজ্যসভাৰ টিকট প্ৰদান নকৰাটোৱে এক বিশেষ ইংগিত বহন কৰিছে। আগন্তুক বিধানসভা নিৰ্বাচনত পঞ্জাবত বিট্টুক এখন চিনাকি মুখ হিচাপে নিৰ্বাচনী যুঁজত প্ৰক্ষেপ কৰাব পাৰে বিজেপিয়ে । পঞ্জাবৰ বিধানসভা নিৰ্বাচনৰ প্ৰতি দৃষ্টি ৰাখিয়েই মোদী মন্ত্ৰীসভাত পঞ্জাবৰ পৰা দুজনকৈ নেতাক স্থান দিয়াৰ যো-জা চলোৱাৰ খবৰ আহিছে। চৰ্চা অনুসৰি এই দুজন নেতা হৈছে বিজেপিৰ ৰাষ্ট্ৰীয় মহাসচিব তৰুণ চুঘ আৰু আম আদমি পাৰ্টীৰ পৰা বিজেপিলৈ যোৱা জনপ্ৰিয় নেতা ৰাঘৱ চাড্ডা। তৰুণ চুঘক প্ৰধানমন্ত্ৰী মোদীৰ এগৰাকী বিশ্বস্ত নেতা হিচাপে ধৰা হয় আৰু দীৰ্ঘদিনৰ পৰা ৰাষ্ট্ৰীয় স্বয়ংসেৱক সংঘৰ সৈতেও জড়িত। ইয়াৰ উপৰিও জম্মু-কাশ্মীৰ, তেলেংগানা আৰু লাড্ডাখ বিজেপিৰো দায়িত্বত আছে চুঘ। সূত্ৰ অনুসৰি মোদী চৰকাৰৰ কোনো গুৰুত্বপূৰ্ণ পদবী লাভ কৰিব পাৰে তৰুণ চুঘে।

আনহাতে উচ্চ শিক্ষিত, পেছাত এগৰাকী চাৰ্টাৰ একাউণ্টেণ্ট ৰাঘৱ চাড্ডায়ো বিজেপিলৈ আহিয়েই লাভ কৰিব পাৰে কেবিনেট মন্ত্ৰীৰ দায়িত্ব। বিশেষকৈ নৱপ্ৰজন্মৰ মাজত যথেষ্ট জনপ্ৰিয় ৰাঘৱ চাড্ডা ৰাষ্ট্ৰীয় ৰাজনীতিৰো এখন চিনাকি মুখ। উল্লেখ্য যে বিজেপিলৈ কেৱল ৰাঘৱ চাড্ডাই অহা নাছিল, লগত আনিছিল পূৰ্ব ক্ৰিকেটাৰ হৰভজন সিং, স্বাতী মালীৱালসহ আন ৭ গৰাকী শক্তিশালী AAP নেতাক। ৰাঘৱ চাড্ডাই দীৰ্ঘসময়ৰ পৰাই ৰাজ্যসভাত যুৱপ্ৰজন্মৰে জড়িত বিভিন্ন সমস্যাক আঙুলিয়াই আহিছিল। ইণ্টাৰনেটৰ পৃথিৱীতো ৰাঘৱ চাড্ডাৰ আছে ঈৰ্ষণীয় জনপ্ৰিয়তা। লক্ষণীয়ভাৱে কেন্দ্ৰীয় বিত্ত ৰাজ্যমন্ত্ৰী পংকজ চৌধুৰীক উত্তৰপ্ৰদেশ বিজেপিৰ অধ্যক্ষ হিচাপে নিযুক্তি দিয়াৰ পিছতে তেওঁক মোদী মন্ত্ৰীসভাৰ পৰা বিদায় দিয়াটো একপ্ৰকাৰ নিশ্চিত হৈ পৰিছে। তেনেস্থলত উক্ত পদটো ৰাঘৱ চাড্ডাক অৰ্পণ কৰা হ’ব পাৰে বুলি দেশৰ ৰাজনৈতিক মহলত চৰ্চা চলিছে।