ভাৰতীয় বিমান বাহিনীৰ গ্ৰুপ কেপ্টেইন শুভাংশু শুক্লা বৰ্তমান আন্তৰ্জাতিক মহাকাশ ষ্টেচনত আছে৷ তেওঁ নাছা, ইছৰো, ইউৰোপীয় মহাকাশ সংস্থা আৰু বেচৰকাৰী সংস্থা Axiom Spaceৰ Axiom-4 মিছনৰ আওতাত মহাকাশ ষ্টেচনত উপস্থিত হৈছে৷ শুভাংশু শুক্লা হৈছে মহাকাশত ভৰি ৰখা দ্বিতীয় ব্যক্তি আৰু আই এছ এছত উপস্থিত প্ৰথমজন ভাৰতীয়৷
আন্তৰ্জাতিক মহাকাশ ষ্টেচনত সকলোসময়তেই মহাকাশচাৰী উপস্থিত থাকে৷ সময়ে সময়ে মহাকাশচাৰীসকলক পৃথিৱীলৈ উভতাই অনা হয় আৰু নতুন মহাকাশচাৰী পঠিওৱা হয়৷ মহাকাশ ষ্টেচনত মাহৰ পাছত মাহ কটাই কিছু মহাকাশচাৰীয়ে৷ ২০২৫ চনৰ জুন মাহত বিশ্বৰ ২০তকৈ বেছি দেশৰ মুঠ ২৮০ জনতকৈ বেছি মহাকাশচাৰীয়ে আন্তৰ্জাতিক মহাকাশ ষ্টেচন পৰিদৰ্শন কৰিছে৷ এই মহাকাশচাৰীসকলে কেই সপ্তাহ আৰু কেইমাহ ধৰি পৃথিৱীৰ কক্ষপথত মাইক্ৰোগ্ৰেভিটি অৱস্থাত বাস কৰে৷ এই মিছনৰ মূল লক্ষ্য হৈছে বৈজ্ঞানিক পৰীক্ষা নিৰীক্ষা আৰু বিশ্বব্যপী সহযোগিতা৷ মহাকাশচাৰীও মানুহ আৰু মানুহ অসুস্থ হৈ পৰিবও পাৰে৷ সেয়ে বহুতৰে মনত কৌতুহল জাগে যে মহাকাশত কোনো মহাকাশচাৰী অসুস্থ হ’লে কি হয়?
মহাকাশত কোনো হাস্পতাল বা জৰুৰী ঘৰ নাই৷ মহাকাশ সংস্থাসমূহে জৰুৰী চিকিৎসাৰ বাবে সম্পূৰ্ণ প্ৰস্তুতি ৰাখে মহাকাশত৷ মহাকাশচাৰীসকলক মহাকাশলৈ যোৱাৰ পূৰ্বে প্ৰাথমিক চিকিৎসাৰ প্ৰশিক্ষণ দিয়া হয় আৰু আইএছ এছত প্ৰয়োজনীয় চিকিৎসা সৰঞ্জাম পোৱা যায়৷ প্ৰতিটো মিছনত এজন মহাকাশচাৰীক ক্ৰু মেডিকেল অফিচাৰ হিচাপে মনোনীত কৰা হয়৷ যিয়ে সাধাৰণ চিকিৎসা প্ৰশিক্ষণ লয় কিন্তু তেওঁ চিকিৎসক নহয়৷ এই মেডিকেল অফিচাৰৰ এটা মেডিকেল কীট থাকে যাৰ ভিতৰত থাকে বিষৰ ঔষধ, এণ্টিবায়োটিক, এলাৰ্জিৰ ঔষধ, পোৰ্টেবল আলট্ৰাছাউণ্ড ডিভাইছ, ডিফিব্ৰিলেটৰ আৰু ছিপিআৰ সৰঞ্জাম৷
কিয় ছি পি আৰ সম্ভৱ নহয়?
নাছাৰ মতে শূন্য মধ্যাকৰ্ষণত ছিপিআৰ কৰা কঠিন৷ কাৰণ মহাকাশত বুকুত চাপ দিয়া কঠিন হৈ পৰে৷ ইয়াৰ বাবে ভৰিত বান্ধি ছিপিআৰ দিয়াৰ বাবে এক বিশেষ ডিভাইছৰ ব্যৱস্থা আছে৷ যদি কোনো মহাকাশচাৰী মহাকাশত কোনো গুৰুতৰ সমস্যাৰ সন্মুখীন হয় তেতিয়া মহাকাশচাৰীক নাছাৰ মিছন কন্ট্ৰল চেণ্টাৰৰ পৰা ৰিয়েল টাইম ভিডিঅ আৰু অডিঅ’ৰ মাধ্যমেৰে চিকিৎকে টেলি মেডিকেল সহায়তা দিয়ে৷ আই এছ এছৰ পৰা প্ৰাপ্ত বায়োমেট্ৰিক তথ্যৰ ভিত্তিত চিকিৎসকে তেওঁলোকক ধাপে ধাপে নিৰ্দেশ দিয়ে৷ ইয়াৰ সহায়ত মহাকাশচাৰীক চিকিৎসা কৰা হয়৷
জৰুৰী পৰিসেৱাৰ কি কি ব্যৱস্থা?
যদি কোনো মহাকাশচাৰীৰ স্বাস্থ্যৰ অৱনতি হয় আৰু আই এছ এছত চিকিৎসা সম্ভৱ নহয় তেতিয়া জৰুৰী স্থানান্তৰণৰ ব্যৱস্থা আছে৷ আই এছ এছত সৰ্বদা কমপক্ষেও এটা স্পেছ এক্স ড্ৰেগন কেপছুল ডক কৰা থাকে যাতে এজন মহাকাশচাৰীক ৩-৫ ঘণ্টাৰ ভিতৰত পৃথিৱীলৈ উভতাই আনিব পাৰি৷ সাধাৰণতে এই কেপছুলটো কাজাখাস্তনৰ সমভূমিত অৱতৰণ কৰে৷ তাৰপৰাই ৰোগীক তাৎক্ষণিকভাৱে নাছাৰ চিকিৎসাকেন্দ্ৰ বা ৰাছিয়ান মহাকাশ সংস্থাৰ চিকিৎসা কেন্দ্ৰত ভৰ্তি কৰোৱা হয়৷ এই জৰুৰী স্থানান্তৰ ব্যৱস্থাটো শেষ অৱলম্বন হিচাপে ৰখা হয়৷ কাৰণ পৃথিৱীৰ মধ্যাকৰ্ষণ শক্তিত উভতি অহাৰ পাছত কিছু ৰোগীৰ স্বাস্থ্য আৰু বেয়া হৈ পৰিব পাৰে৷ সেয়ে আই এছ এছৰ ২০ বছৰতকৈ বেছি সময় ধৰি পৰিচালিত কাৰ্যক্ৰমত এতিয়ালৈকে কোনো মহাকাশচাৰীক চিকিৎসাৰ বাবে জৰুৰী অৱস্থাত উভতাই অনা হোৱা নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
