ব্যক্তিগত খণ্ডত চাকৰি কৰাসকলৰ বাবে এটা গুৰুত্বপূৰ্ণ খবৰ

ব্যক্তিগত খণ্ডত চাকৰি কৰা লোকসকলৰ বাবে কৰ্মচাৰী ভৱিষ্য নিধি বা EPF হৈছে সঞ্চয়ৰ এক গুৰুত্বপূৰ্ণ মাধ্যম। প্ৰতিমাহে দৰমহাৰ এটা অংশ PF একাউণ্টত জমা হয় আৰু সেই জমা ধনৰ ওপৰত বছৰি সুত পোৱা যায়। এই ধন ভৱিষ্যতে অৱসৰৰ সময়ত যথেষ্ট সহায়ক হয়। কিন্তু কিছুমান বিশেষ পৰিস্থিতিত PF একাউণ্ট ‘Inoperative’ বা নিষ্ক্ৰিয় হৈ পৰিব পাৰে। এনে হ’লে একাউণ্টত নতুনকৈ সুত জমা হোৱা বন্ধ হ’ব পাৰে। EPFOৰ তথ্য অনুসৰি, তলৰ ৪টা পৰিস্থিতিত PF একাউণ্ট নিষ্ক্ৰিয় হ’ব পাৰে—

১. ৫৫ বছৰৰ পিছত অৱসৰ ল’লে

যদি কোনো কৰ্মচাৰীয়ে ৫৫ বছৰ বা তাৰ পিছত অৱসৰ গ্ৰহণ কৰে আৰু অৱসৰৰ পিছৰ ৩৬ মাহ অৰ্থাৎ ৩ বছৰলৈ PFৰ ধন উলিয়াবলৈ কোনো পদক্ষেপ নলয়, তেন্তে একাউণ্টটো নিষ্ক্ৰিয় হিচাপে গণ্য হ’ব পাৰে। ইয়াৰ পিছত একাউণ্টত সুত জমা হোৱা বন্ধ হ’ব পাৰে।

২. বিদেশত স্থায়ীভাৱে বসবাস কৰিবলৈ গ’লে

যদি কোনো PF সদস্যই ভাৰত এৰি স্থায়ীভাৱে আন এখন দেশত বসবাস কৰিবলৈ যায়, তেন্তে তেওঁৰ PF একাউণ্ট নিষ্ক্ৰিয় একাউণ্টৰ শ্ৰেণীত পৰিব পাৰে।

৩. PF সদস্যৰ মৃত্যু হ’লে

PF সদস্যৰ মৃত্যু হ’লে তেওঁৰ একাউণ্ট নিষ্ক্ৰিয় হিচাপে গণ্য হ’ব পাৰে। এনে ক্ষেত্ৰত একাউণ্টৰ ধন মনোনীত বা আইনগত উত্তৰাধিকাৰীয়ে দাবী কৰি উলিয়াব পাৰে। সেয়ে নোমিনীয়ে সময়মতে PFৰ ধনৰ বাবে ক্লেইম কৰা উচিত।

৪. ৩ বছৰলৈ ক্লেইম নকৰিলে

যেতিয়া PFৰ ধন সদস্যৰ বাবে উলিওৱাৰ যোগ্য হৈ পৰে, কিন্তু সদস্যই তাৰ পিছতো ৩৬ মাহ অৰ্থাৎ ৩ বছৰলৈ কোনো ক্লেইম নকৰে, তেন্তে একাউণ্টটো নিষ্ক্ৰিয় হ’ব পাৰে।

EPFOৰ পৰামৰ্শ কি?

চাকৰি সলনি কৰাৰ সময়ত পুৰণি PF একাউণ্টত থকা ধন নতুন PF একাউণ্টলৈ UANৰ জৰিয়তে ট্ৰেন্সফাৰ কৰি লোৱাটো ভাল। ইয়াৰ ফলত PFৰ সঞ্চয় একেলগে থাকে আৰু সুদৰ সুবিধাও অব্যাহত থাকে। সেয়ে চাকৰি সলনি কৰাৰ পিছত পুৰণি PF একাউণ্টৰ ধন পৰি থাকিবলৈ নিদি, সময়মতে নতুন একাউণ্টলৈ ট্ৰেন্সফাৰ কৰাটো উপকাৰী।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ