দেশৰ সকলোতকৈ ধনী ব্যক্তি মুকেশ আম্বানী৷ বিশ্বৰো সকলোতকৈ ধনী ব্যক্তিৰ তালিকাত প্ৰথম ১০টা স্থানৰ ভিতৰত আছে মুকেশ আম্বানীৰ নাম৷ কিন্তু এই উত্থান জানো তেওঁৰ এদিনতেই হৈছে? বহু বছৰৰ অক্লান্ত পৰিশ্ৰমৰ ফল এই বিশাল সাম্ৰাজ্য৷ এই বিপুল বাণিজ্য আৰু সম্পত্তি গঢ়াৰ আঁৰত কিন্তু মুকেশ আম্বানীয়েই অকলে খাটনি কৰিছে তেনে নহয়৷ তেওঁৰ এই কৰ্মযজ্ঞত প্ৰতিদিনেই ভাগ লৈছে লাখ লাখ কৰ্মীয়ে৷ আম্বানীৰ ব্যৱসায়িক কাম কাজত পত্নী নীতা আৰু পুত্ৰ আকাশৰ যিমান অৰিহনা আছে সমানেই অৰিহনা আছে আন এগৰাকীৰো৷ নাম প্ৰকাশলৈ নাহিলেও তেওঁ গোপনেই কৰি গৈছে আম্বানীক সহায়৷ পত্নীতকৈয়ো যাৰ ওপৰত অধিক ভৰসা মুকেশৰ৷ পত্নী কাষত নথকা স্থানতো তেওঁ ছাঁটোৰ দৰে লাগি থাকে মুকেশৰ সৈতে৷ তেওঁ আন কোনো নহয়, মুকেশ আম্বানীৰ সকলোতকৈ বিশ্বস্ত পৰামৰ্শদাতা মনোজ মোদী৷
ৰিলায়েন্স ইণ্ডাষ্ট্ৰিজৰ মেনেজিং ডাইৰেক্টৰ আৰু চেয়াৰমেনৰ পদত আছে মুকেশ আম্বানী৷ তেওঁ ৰিলায়েন্সক লৈ যিকোনো আকৰ্ষণীয় উদ্যোগ আৰু প্ৰকল্প আৰম্ভ কৰে কিন্তু মনোজ মোদীৰ পৰামৰ্শতহে৷ কলেজীয়া জীৱনৰ পৰাই মনোজ মোদী আৰু মুকেশ আম্বানী ভাল বন্ধু৷
মুম্বাই ইউনিভাৰ্চিটিৰ কেমিকেল টেকনোলজি বিভাগত দুয়োৰে প্ৰথম চিনাকি৷ তাতেই আৰম্ভ হৈছিল বন্ধুত্ব৷ ১৯৮০ৰ দশকত ধীৰুভাই আম্বানীৰ হাতত ধৰিয়েই আৰম্ভ হৈছিল ৰিলায়েন্সৰ যাত্ৰা৷ তেতিয়াই মনোজ মোদী যুক্ত হৈছিল ৰিলায়েন্সৰ সৈতে৷ তেতিয়াৰ পৰা এতিয়ালৈ মুকেশ নীতাই নহয়, তেওঁলোকৰ পৰবৰ্তী প্ৰজন্ম আকাশ, ইশা আৰু অনন্ত আম্বানীৰ সৈতেও তেওঁৰ খুবেই মধুৰ সম্পৰ্ক৷ তেওঁৰ হাতত ধৰি বাণিজ্যৰ শিক্ষা লৈছে মুকেশৰ তিনিও সন্তানে৷
২০২০ চনত ৰিলায়েন্স জিঅ’ৰ সৈতে ফেছবুকৰ ৪৩ হাজাৰ কোটিৰ ঐতিহাসিক চুক্তিৰ নেপথ্যৰ কাৰিগৰো আছিল মনোজ মোদী৷ তেওঁৰ ওপৰত সুখী হৈ আম্বানীয়ে তেওঁক ১৫০০ কোটি টকাৰ এখন বিলাসবহুল ঘৰ উপহাৰ দিছে৷ বৰ্তমান তেওঁ ৰিলায়েন্স ৰিটেল আৰু ৰিলায়েন্স জিঅ’ৰ ডাইৰেক্টৰ পদত আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
