বয়স মাত্ৰ ৩ বছৰ৷ যি বয়সত এটা সম্পূৰ্ণ বাক্যও ভালকৈ উচ্চাৰণ কৰিব নোৱাৰে এটি শিশুৱে৷ সেই বয়সতেই পিতৃ মাতৃয়ে জোৰকৈ উপবাসত ৰাখিছিল শিশুটিক৷ পিতৃ মাতৃৰ চাপতেই দিনৰ পাছত দিন ধৰি নোখোৱাকৈ আছিল শিশুটি৷ সেই উপবাসেই প্ৰাণ কাঢ়িলে টিউমাৰত আক্ৰান্ত ৩ বছৰীয়া এটি শিশুৰ৷
ৰাষ্ট্ৰীয় সংবাদমাধ্যমত প্ৰকাশিত প্ৰতিবেদনত উল্লেখ থকা অনুসৰি মৃত শিশুৰ পিতৃ পীযূষ জৈন পেছাত তথ্যপ্ৰযুক্তি কৰ্মী৷ পীযুষ আৰু বৰ্ষা জৈনৰ একমাত্ৰ সন্তান আছিল বিনয়া৷ ২০২৪ চনৰ ডিচেম্বৰ মাহত জনা যায় যে বিনয়া ব্ৰেইন টিউমাৰত আক্ৰান্ত৷ মুম্বাইত দীৰ্ঘদিন ধৰি চিকিৎসা কৰোৱা হৈছিল বিনয়াক৷ আনকি অস্ত্ৰোপচাৰো কৰোৱা হৈছিল৷ চিকিৎসা চলি থাকোতেই দিনে দিনে স্বাস্থ্যৰ অৱনতিয়েই ঘটি থাকিল বিনয়াৰ৷
বিনয়াৰ বাচি থকাৰ আশাও ক্ষীণ হৈ আহিছিল লাহে লাহে৷ তেতিয়াই পুৰণি ধৰ্মীয় আচাৰ পালনত বিশ্বাসী হৈ উঠে পীযূষ আৰু বৰ্ষা৷ তেওঁলোকক ধৰ্মগুৰুৱে কৈছিল, উপবাস কৰিলেই ধৰ্মীয় ৰীতি মানিলেই বিনয়াৰ কঠিন অসুখ দূৰ হ’ব৷ ২১ মাৰ্চত ইন্দোৰৰ ৰাজেশ মুনি মহাৰাজৰ সৈতে দেখা কৰিছিল তেওঁলোকে৷ পীযূষে জনাইছে যে সেইদিনা গুৰুজিয়ে জনাই যে বিনয়াৰ মৃত্যু ক্ৰমে কাষ চাপি আহিছে সেয়ে তাইক সান্থাৰা পালন কৰাওক বা উপবাসে ৰাখক৷
‘সান্থাৰা’ জৈন ধৰ্মাৱলম্বীসকলৰ শতাব্দী প্ৰাচীন এনে এক ৰীতি, য’ত মৃত্যু পৰ্যন্ত উপবাস কৰোৱা হয়৷ বিনয়া জৈনৰ মাজত সৰ্বকনিষ্ঠ শিশু যিয়ে সান্থাৰা ব্ৰত পালন কৰিছিল৷ গোল্ডেন বুক অৱ ৱাৰ্ল্ড ৰেকৰ্ডছতো নাম উঠিছে তেওঁৰ৷ পীযূষে সৰ্বভাৰতীয় সংবাদমাধ্যমক জনাইছে যে এই ব্ৰত শেষ কৰাৰ দহ মিনিট পাছতেই মৃত্যুৰ কোলাত ঢলি পৰে বিনয়া৷ গুৰুজিৰ আদেশতেই সন্তানক সান্থাৰা ব্ৰত কৰাবলৈ ৰাজি হৈছিল পিতৃ মাতৃ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
