ত্ৰিপুৰাৰ আৰক্ষী সঞ্চালক প্ৰধান (DGP) অনুৰাগ ধনখড়ক সোমবাৰে আগৰতলাস্থিত আৰক্ষী মুখ্য কাৰ্যালয়ৰ নিজৰ কাৰ্যালয়ত মৃত অৱস্থাত উদ্ধাৰ হোৱা ঘটনাই সমগ্ৰ ৰাজ্যত চাঞ্চল্যৰ সৃষ্টি কৰিছে। প্ৰাৰম্ভিক তদন্ত অনুসৰি, DGP অনুৰাগ ধনখড়ে চ*ৰমপন্থা অৱলম্বন কৰাৰ আশংকা প্ৰকাশ কৰা হৈছে। অৱশ্যে, মৃ*ত্যুৰ সঠিক কাৰণ সন্দৰ্ভত এতিয়াও কোনো নিশ্চিত তথ্য প্ৰকাশ কৰা হোৱা নাই। ঘটনাৰ পিছতে অনুৰাগ ধনখড়ৰ নশ্বৰ দেহ আগৰতলাৰ জি বি চিকিৎসালয়লৈ প্ৰেৰণ কৰা হয়। ৰাজ্যখনৰ শীৰ্ষ আৰক্ষী বিষয়াজনৰ আকস্মিক মৃ*ত্যুক কেন্দ্ৰ কৰি প্ৰশাসনিক আৰু আইন-শৃংখলা মহলত গভীৰ উদ্বেগৰ সৃষ্টি হৈছে।
উচ্চ পৰ্যায়ৰ তদন্ত আৰম্ভ
ঘটনাৰ প্ৰকৃত কাৰণ উদ্ঘাটনৰ উদ্দেশ্যে ইতিমধ্যে উচ্চ পৰ্যায়ৰ তদন্ত আৰম্ভ কৰা হৈছে। তদন্ত সম্পূৰ্ণ নোহোৱালৈকে মৃ*ত্যুৰ কাৰণ সন্দৰ্ভত কোনো ধৰণৰ নিশ্চিত সিদ্ধান্তত উপনীত হ’ব নোৱাৰিব বুলি সংশ্লিষ্ট সূত্ৰই জনাইছে। উল্লেখযোগ্য যে, ত্ৰিপুৰা কেডাৰৰ ১৯৯৪ বৰ্ষৰ IPS বিষয়া অনুৰাগ ধনখড়ে ২০২৫ চনৰ মে’ত ৰাজ্য চৰকাৰৰ নিযুক্তিৰ পিছত ত্ৰিপুৰাৰ আৰক্ষী সঞ্চালক প্ৰধান হিচাপে দায়িত্বভাৰ গ্ৰহণ কৰিছিল।
ঘটনাস্থলী পৰিদৰ্শন মুখ্যমন্ত্ৰী মানিক সাহাৰ
ঘটনাৰ খবৰ লাভ কৰাৰ লগে লগে ত্ৰিপুৰাৰ মুখ্যমন্ত্ৰী মানিক সাহা আৰক্ষী মুখ্য কাৰ্যালয়লৈ গৈ পৰিস্থিতিৰ বুজ লয়। তেওঁ ঘটনাস্থলীত উপস্থিত থাকিলেও এই সন্দৰ্ভত সংবাদ মাধ্যমক কোনো মন্তব্য প্ৰকাশ কৰা নাই। মুখ্যমন্ত্ৰীৰ পৰিদৰ্শনৰ পিছতো চৰকাৰ বা আৰক্ষীৰ ফালৰ পৰা কোনো আনুষ্ঠানিক বিবৃতি প্ৰকাশ কৰা হোৱা নাই। ঘটনাৰ সময়ত আৰক্ষী মুখ্য কাৰ্যালয়ত বহু জ্যেষ্ঠ আৰক্ষী বিষয়া আৰু চৰকাৰী বিষয়াই উপস্থিত আছিল। আৰক্ষীয়েও ঘটনা সন্দৰ্ভত এই পৰ্যন্ত কোনো আনুষ্ঠানিক মন্তব্য আগবঢ়োৱা নাই।
তদন্ত আৰু অন্যান্য প্ৰয়োজনীয় আইনী প্ৰক্ৰিয়া সম্পূৰ্ণ হোৱাৰ পিছত কৰ্তৃপক্ষই আনুষ্ঠানিকভাৱে ঘটনাটোৰ বিষয়ে অধিক তথ্য প্ৰকাশ কৰিব বুলি আশা কৰা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
