ভাৰতৰ সকলোতকৈ ধনী মুষ্টিমেয় কিছু ব্যক্তিৰ সম্পত্তি বিগত প্ৰায় আঢ়ৈ দশকত ডেৰগুণৰো বেছি বৃদ্ধি পাইছে৷ আন্তৰ্জাতিক গোষ্ঠী জি-২০ৰ সাম্প্ৰতিক এক ৰিপৰ্টত এই তথ্য প্ৰকাশিত হৈছে৷ ৰিপৰ্ট অনুসৰি ২০০০-২০২৩ চনৰ ভিতৰত দেশৰ সকলোতকৈ ধনী ১ শতাংশৰ সম্পত্তি ৬২ শতাংশ বৃদ্ধি পাইছে৷
স্বতন্ত্ৰ অৰ্থনীতিবিদক লৈ তৈয়াৰ হোৱা জি-২০ গোষ্ঠীৰ এক্সট্ৰা অৰ্ডিনাৰি কমিটি অফ ইনডিপেনডেণ্ট এক্সপাৰ্টছ অন গ্লোবেল ইনইকুয়ালিটিয়ে এই ৰিপৰ্ট প্ৰকাশ কৰিছে৷ সেই কমিটিৰ নেতৃত্বত আছে নোবেলজয়ী মাৰ্কিন অৰ্থনীতিবিদ জোছেফ ষ্টিগ্লিটজ৷ ইয়াৰোপৰি কমিটিত আছে জয়তী ঘোষ, উইনি বেনেয়িমা, ইমৰান ভালোদিয়াসহ কেইবাগৰাকীও৷ তেওঁলোকৰ ৰিপৰ্টত বিশ্বৰ ছাৰ্বিক পৰিস্থিতিৰ কথাও উল্লেখ আছে৷ তাত দেখা গৈছে বিগত আঢ়ৈ দশকত বিশ্বত যিমান নতুন সম্পত্তি গঢ়িছে তাৰ ৪১ শতাংশই আছে পৃথিৱীৰ সকলোতকৈ ধনী ১ শতাংশৰ হাতত৷
কমিটিৰ নেতৃত্বত থকা ষ্টিগ্লিটজ ৰিপৰ্টত এই বিশ্বব্যাপী বৈষম্যক লৈ সতৰ্ক দিয়া হৈছে৷ তেওঁৰ মতে এই বৈষম্য জৰুৰী পৰ্যায়ত গৈছে যিয়ে গণতন্ত্ৰ, অৰ্থনৈতিক স্থিতিশীলতা আৰু জলবায়ুগত দিশৰ পৰা উদ্বেগজনক৷ ৰিপৰ্টত লগতে কোৱা হৈছে চীন আৰু ভাৰতৰ দৰে কিছু জনবহুল দেশত জনমূৰি আয় বৃদ্ধি পাইছে৷ ইয়াৰ ফলত আন্তৰ্দেশীয় বৈষম্যক কম দেখুৱাইছে৷
জি-২০ গোষ্ঠীৰ সেই ৰিপৰ্ট অনুসৰি ২০০০-২০২৩ চনৰ ভিতৰত ভাৰতৰ সকলোতকৈ ধনী ১ শতাংশৰ সম্পত্তি ৬২ শতাংশ বৃদ্ধি পাইছে৷ সেই একে ধৰণেই চীনৰ সকলোতকৈ ধনী ১ শতাংশৰ সম্পত্তি প্ৰায় ৫৪ শতাংশ বাঢ়িছে৷ ৰিপৰ্টত কোৱা হৈছে সম্পত্তিৰ ক্ষেত্ৰতো চৰম বৈষম্য কেতিয়াও কাম্য নহয়৷ এই সমস্যা কেৱল ৰাজনৈতিকভাৱেহে সলনি কৰা সম্ভৱ৷ সেই ৰিপৰ্টে লগতে জনাইছে যে ২০২০ চনৰ পৰা বিশ্বব্যাপী দৰিদ্ৰ দূৰীকৰণ মন্থৰ হৈ গৈছে৷ কিছু কিছু এলেকাত প্ৰায় ৰৈ গৈছে দৰিদ্ৰ দূৰীকৰণ৷ কৰোবাত কৰোবাত দৰিদ্ৰ লোকৰ সংখ্যা বৃদ্ধি পাবলৈ আৰম্ভ হৈছে৷ অৰ্থনীতিবিদে সেই ৰিপৰ্টত দাবী কৰিছে যে যিসমূহ দেশত আৰ্থিক বৈষম্য বেছি, তাতেই গণতন্ত্ৰৰ অৱক্ষয়ৰ আশংকাও তুলনামূলকভাৱে বেছি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
