পশ্চিম বংগৰ ৰাজ্যপাল আৰ.এন. ৰবিয়ে বৃহস্পতিবাৰে বংগ বিধানসভা ভংগ কৰে। এইবাৰ বিধানসভা নিৰ্বাচনত বিজেপিয়ে সংখ্যাগৰিষ্ঠতা লাভ কৰে। এই বিজয়ৰ পিছতে ভোট চুৰিৰ অভিযোগ উত্থাপন কৰি মমতা বেনাৰ্জীয়ে মুখ্যমন্ত্ৰী পদৰ পৰা পদত্যাগ কৰিবলৈ অস্বীকাৰ কৰে। ইয়াৰ পোহৰত পশ্চিম বংগৰ বৰ্তমানৰ ৰাজ্যপাল আৰ.এন. ৰবি, ২০২৬ চনৰ নিৰ্বাচনী প্ৰক্ৰিয়া সম্পূৰ্ণ হোৱাৰ পিছতে এক বৃহৎ পদক্ষেপ গ্ৰহণ কৰিছে।
ভাৰতৰ সংবিধানৰ ১৭৪ নং অনুচ্ছেদৰ দফা (2)ৰ উপ-দফা (b)ৰ অধীনত প্ৰদান কৰা ক্ষমতা ব্যৱহাৰ কৰি তেওঁ পশ্চিম বংগ বিধানসভা ভংগ কৰাৰ নিৰ্দেশ দিছে ।
এই ঘোষণা ৬ মে’, ২০২৬ তাৰিখ বুধবাৰে প্ৰকাশিত বিশেষ অধিসূচনা (অধিসূচনা নং: ২৭৫-পিএ/১এল-০৩/২০২৬)ত কৰা হৈছে। চৰকাৰৰ সংসদীয় পৰিক্ৰমা বিভাগে জাৰি কৰা এই নিৰ্দেশনা অনুসৰি ২০২৬ চনৰ ৭ মে’ৰ পৰা কাৰ্যকৰী হোৱাকৈ চলিত বিধানসভা আনুষ্ঠানিকভাৱে ভংগ কৰা হ’ব।
ৰাজ্যপালে বিধানসভা ভংগ কৰে
ৰাজ্যপাল আৰ.এন.ৰবিয়ে স্বাক্ষৰ কৰে এই আদেশত। ৰবি, ৰাজহুৱা স্বাৰ্থত প্ৰকাশ কৰিছিল ৰাজ্যৰ মুখ্য সচিব দুষ্যন্ত নাৰিয়ালা (আই এ এছ)য়ে। সাধাৰণতে নতুন চৰকাৰে কাৰ্যভাৰ গ্ৰহণ কৰাৰ আগতে নিৰ্বাচনৰ পিছত পুৰণি বিধানসভা ভংগ কৰাটো সাংবিধানিক নিয়ম।
এই আদেশে ১৭ নং বিধানসভাৰ কাৰ্যকালৰ অন্ত পেলায় আৰু নৱনিৰ্বাচিত প্ৰতিনিধিৰে ১৮ নং বিধানসভা গঠনৰ পথ প্ৰশস্ত কৰে। আগন্তুক কেইদিনমানৰ পৰা নতুন মন্ত্ৰীসভাৰ শপতগ্ৰহণ আৰু নতুন বিধানসভাৰ প্ৰথম অধিৱেশন আহ্বানৰ কাম আৰম্ভ হ’ব বুলি আশা কৰা হৈছে।
মমতাই মুখ্যমন্ত্ৰীৰ পদৰ পৰা পদত্যাগ কৰিবলৈ অস্বীকাৰ কৰিছিল
পশ্চিমবংগ বিধানসভা নিৰ্বাচনত ২৯৩ খন আসনৰ ভিতৰত ২০৭ খন আসনত বিজেপিয়ে জয়লাভ কৰিছিল, আৰু প্ৰথমবাৰৰ বাবে বংগত বিজেপি চৰকাৰ গঠন হ’বলৈ সাজু হৈছে। মমতা বেনাৰ্জীৰ দলটোৱে এই নিৰ্বাচনত পৰাজয়ৰ সন্মুখীন হ’বলগীয়া হয়, ১৫ বছৰৰ পাছত মমতা বেনাৰ্জীক ক্ষমতাৰ পৰা উৎখাত কৰা হৈছে।
নিৰ্বাচনৰ পিছত মমতা বেনাৰ্জীয়ে প্ৰায় ১০০খন আসনত ভোট চুৰিৰ অভিযোগ উত্থাপন কৰি কয় যে তেওঁ পৰাস্ত হোৱা নাই, কিন্তু বলপূৰ্বকভাৱে পৰাস্ত হৈছে। মুখ্যমন্ত্ৰী পদৰ পৰাও পদত্যাগ কৰিবলৈও অস্বীকাৰ কৰে ছানীয়ে। তেওঁৰ অস্বীকাৰৰ পিছতে ৰাজ্যপালগৰাকীয়ে বিধানসভা ভংগ কৰি মমতা বেনাৰ্জীৰ মুখ্যমন্ত্ৰীৰ কাৰ্যকালৰ অন্ত পেলায়।
৯ মে’ত নতুন চৰকাৰৰ শপত গ্ৰহণ অনুষ্ঠান
আনহাতে বিজেপিয়ে নতুন চৰকাৰ গঠনৰ প্রক্রিয়া আৰম্ভ কৰিছে৷ বৃহস্পতিবাৰে নিশা কলকাতাত উপস্থিত হৈছে কেন্দ্ৰীয় গৃহমন্ত্ৰী অমিত শ্বাহ। শুকুৰবাৰে নৱনিৰ্বাচিত বিজেপি বিধায়কৰ বৈঠক অনুষ্ঠিত হ’ব। এই বৈঠকত নিৰ্বাচিত হ’ব বিধায়িনী দলৰ নেতা। ইয়াৰ পিছতে ৯ মে’ত কলকাতাৰ ব্ৰিগেড খেলপথাৰত শপত গ্ৰহণ কৰিব নতুন মুখ্যমন্ত্ৰীগৰাকীয়ে।
ৰবীন্দ্ৰ জয়ন্তীৰ দিনা ব্ৰিগেডত অনুষ্ঠিত হ’ব নতুন চৰকাৰৰ শপতগ্ৰহণ। ডাবল ইঞ্জিন চৰকাৰে জনসাধাৰণক সাক্ষী হিচাপে লৈ যাত্ৰা আৰম্ভ কৰিব। শনিবাৰে ব্ৰিগেডত উপস্থিত থাকিব প্ৰধানমন্ত্ৰী আৰু গৃহমন্ত্ৰী। বিজেপি শাসিত ৰাজ্যৰ কেইবাগৰাকীও মুখ্যমন্ত্ৰী উপস্থিত থাকিব। শপতগ্ৰহণ অনুষ্ঠানত এছ পি জি আৰু কলকাতা আৰক্ষীয়ে নিৰাপত্তা প্ৰদান কৰিব। ব্ৰিগেডৰ বাহিৰত নিৰাপত্তাৰ দায়িত্ব ল’ব কেন্দ্ৰীয় বাহিনী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
