দিল্লীৰ যন্তৰ-মন্তৰত ছাত্ৰ আন্দোলনে লাভ কৰা সফলতাৰ পাছতে দেশজুৰি চৰ্চাত আছে CJP আৰু ইয়াৰ প্ৰতিষ্ঠাপক অভিজিত দীপকে। বিশেষকৈ যুৱপ্ৰজন্ম আৰু ছাত্ৰ-ছাত্ৰীৰ বিভিন্ন সমস্যা, শিক্ষা ব্যৱস্থাৰ সংস্কাৰ আৰু পেপাৰ লিকৰ দৰে বিষয়ক লৈ সৰৱ হৈ অহা CJP-এ যুৱসমাজৰ মাজত এক বিশেষ চৰ্চা লাভ কৰিছে।
ইফালে, প্ৰধানমন্ত্ৰী নৰেন্দ্ৰ মোদীয়েও শেহতীয়াকৈ ছ’চিয়েল মিডিয়াৰ জৰিয়তে Gen-Zৰ সৈতে পোনপটীয়াকৈ সংযোগ স্থাপনৰ চেষ্টা কৰিছে। ২৩ জুলাইত প্ৰধানমন্ত্ৰী মোদীয়ে ইনষ্টাগ্ৰামত শ্বেয়াৰ কৰা এটা ভিডিঅ’ই মাত্ৰ ২৪ ঘণ্টাৰ ভিতৰতে ৩০.৩ কোটিৰো অধিক ভিউ লাভ কৰাৰ দাবী কৰা হৈছে। এই ঘটনাই ছ’চিয়েল মিডিয়াতো প্ৰধানমন্ত্ৰীগৰাকীৰ যুৱপ্ৰজন্মৰ মাজত থকা জনপ্ৰিয়তাক লৈ নতুনকৈ চৰ্চাৰ সৃষ্টি কৰে।
এনে সময়তে যুৱপ্ৰজন্মৰ মাজত প্ৰধানমন্ত্ৰী নৰেন্দ্ৰ মোদী, লোকসভাৰ বিৰোধী দলপতি ৰাহুল গান্ধী আৰু CJPৰ অভিজিত দীপকে—এই তিনিগৰাকীৰ ভিতৰত কোনজন আটাইতকৈ জনপ্ৰিয়, সেই বিষয়ে C-Voterৰ এক সমীক্ষাত কিছু গুৰুত্বপূৰ্ণ তথ্য প্ৰকাশ পাইছে।
যুৱপ্ৰজন্মৰ মাজত কোন আটাইতকৈ জনপ্ৰিয়?
C-Voterৰ সমীক্ষাত যুৱপ্ৰজন্মক সোধা হৈছিল—‘যুৱসমাজৰ মাজত আটাইতকৈ জনপ্ৰিয় নেতা কোন?’ CJPৰ আন্দোলনৰ পিছতো সমীক্ষাৰ ফলাফলত প্ৰধানমন্ত্ৰী নৰেন্দ্ৰ মোদীয়ে সৰ্বাধিক সমৰ্থন লাভ কৰে। ৩৯.৮ শতাংশ তৰুণ প্ৰজন্মই নৰেন্দ্ৰ মোদীক আটাইতকৈ জনপ্ৰিয় নেতা হিচাপে উল্লেখ কৰে। আনহাতে, এই তালিকাৰ দ্বিতীয় স্থানত আছে ৰাহুল গান্ধী। ২৭.৯ শতাংশ নৱপ্ৰজন্মই ৰাহুল গান্ধীক জনপ্ৰিয় নেতা হিচাপে বাছনি কৰে। CJPৰ প্ৰতিষ্ঠাপক অভিজিত দীপকেক ১২.৬ শতাংশ তৰুণে আটাইতকৈ জনপ্ৰিয় নেতা বুলি মত প্ৰকাশ কৰে। অৰ্থাৎ, সমীক্ষাৰ হিচাপত মোদী প্ৰথম স্থানত থকাৰ বিপৰীতে ৰাহুল গান্ধী দ্বিতীয় আৰু অভিজিত দীপকে তৃতীয় স্থানত আছে। এই সমীক্ষাই এটা কথা স্পষ্ট কৰিছে যে পূৰ্বৰ তুলনাত ৰাহুল গান্ধীৰ জনপ্ৰিয়তা কিছু বাঢ়িলেও নৰেন্দ্ৰ মোদীক স্পৰ্শ কৰিবলৈ এতিয়াও বহু দূৰ বাকী।
চৰকাৰৰ পদক্ষেপক লৈ যুৱসমাজ সন্তুষ্ট নেকি?
দেশত প্ৰতিযোগিতামূলক পৰীক্ষা আৰু নিযুক্তি পৰীক্ষাৰ প্ৰশ্নকাকত ফাদিলক লৈ দীৰ্ঘদিন ধৰি বিতৰ্ক চলি আহিছে। বিশেষকৈ ছাত্ৰ-ছাত্ৰীসকলৰ মাজত এই বিষয়টোৱে ব্যাপক ক্ষোভৰ সৃষ্টি কৰিছে। সমীক্ষাটোত যুৱ সমাজক সোধা হৈছিল—পেপাৰ লিক ৰোধ কৰিবলৈ চৰকাৰে গ্ৰহণ কৰা পদক্ষেপসমূহত তেওঁলোক সন্তুষ্ট নেকি? এই গুৰুত্বপূৰ্ণ প্ৰশ্নটোৰ উত্তৰত ৩৩.২ শতাংশ লোকে ‘হয়’ বুলি কয়। বিপৰীতে ৫০.৭ শতাংশ লোকে চৰকাৰৰ পদক্ষেপত সন্তুষ্ট নহয় বুলি মত প্ৰকাশ কৰে। আনহাতে, ১৬.১ শতাংশ লোকে এই বিষয়ে ‘নাজানো’ বুলি উত্তৰ দিয়ে। এই তথ্যই পেপাৰ লিকৰ দৰে গুৰুত্বপূৰ্ণ বিষয়ত চৰকাৰৰ পদক্ষেপক লৈ যুৱসমাজৰ মাজত এতিয়াও যথেষ্ট অসন্তুষ্টি থকা বুলি ইংগিত দিয়ে।
C-Voterৰ সমীক্ষাত আন এটা প্ৰশ্ন কৰা হৈছিল—প্ৰশ্নকাকত ফাদিলৰ বিষয়ত সংসদত সন্তোষজনক আলোচনা হৈছিলনে? ইয়াৰ উত্তৰত ৩৯ শতাংশ লোকে ‘নহয়’ বুলি মত প্ৰকাশ কৰে। অৰ্থাৎ, সমীক্ষাত অংশগ্ৰহণ কৰা সৰ্বাধিক সংখ্যক লোকেই সংসদত প্ৰশ্নকাকত ফাদিলৰ বিষয়ত হোৱা আলোচনাক সন্তোষজনক বুলি গণ্য কৰা নাই।
ইয়াৰ বিপৰীতে ৩৫.৬ শতাংশ লোকে সংসদত সন্তোষজনক আলোচনা হৈছিল বুলি মত দিয়ে। আনহাতে, ২৫.৩ শতাংশ লোকে এই বিষয়ে নিশ্চিত নহয় বা ‘নাজানো’ বুলি উত্তৰ দিয়ে।
যুৱ ৰাজনীতিত নতুন সমীকৰণৰ ইংগিত নেকি?
C-Voterৰ সমীক্ষাৰ তথ্যই এটা কথা স্পষ্ট কৰিছে যে প্ৰধানমন্ত্ৰী নৰেন্দ্ৰ মোদী এতিয়াও যুৱপ্ৰজন্মৰ মাজত উল্লেখযোগ্য জনপ্ৰিয়তা বজাই ৰাখিছে। একে সময়তে ৰাহুল গান্ধীৰো যথেষ্ট শক্তিশালী সমৰ্থন আছে। অন্যহাতে, অভিজিত দীপকে আৰু CJPৰ দৰে নতুন মুখে যুৱ আৰু ছাত্ৰ সমাজৰ নিৰ্দিষ্ট সমস্যাক কেন্দ্ৰ কৰি চৰ্চালৈ অহাটোৱে দেশৰ যুৱ ৰাজনীতিৰ ক্ষেত্ৰত নতুন সমীকৰণৰ সম্ভাৱনাৰ ইংগিত বহন কৰিছে। অৱশ্যে, এই সমীক্ষাৰ ফলাফলক যুৱসমাজৰ সামগ্ৰিক ৰাজনৈতিক মতামতৰ চূড়ান্ত প্ৰতিফলন হিচাপে গণ্য কৰিব নোৱাৰি। সমীক্ষাৰ নমুনা, সময়, পদ্ধতি আৰু অংশগ্ৰহণকাৰীৰ পৰিসৰ আদি বিবেচনা কৰিহে ইয়াৰ ফলাফলৰ মূল্যায়ন কৰাটো গুৰুত্বপূৰ্ণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
