ষ্টেণ্ড আপ কমেডিয়ান সময় ৰাইনাই বিভিন্ন মন্তব্যৰ বাবে সময়ে সময়ে চৰ্চাৰ শীৰ্ষত থাকে। সময় ৰাইনাৰ মন্তব্যবোৰৰ অধিকাংশই বিতৰ্কৰ কেন্দ্ৰবিন্দুত থাকিলেও এইবাৰ বিতৰ্কৰ বাবে নহয় অন্য এটা কাৰণতহে চৰ্চাৰ শীৰ্ষস্থান লাভ কৰিছে। অসমৰ বাহিৰৰ অন্য তাৰকাসকলৰ দৰে অসমৰ বানপীড়িতসকলৰ বাবে এইবাৰ সময় ৰাইনায়ো আগবঢ়াইছে সাহায্য। তেওঁ অসমৰ বানপীড়িতসকলৰ বাবে ১০ লাখ টকাৰ অনুদান আগবঢ়ায়। এই তথ্য মুখ্যমন্ত্রী হিমন্ত বিশ্ব শর্মাৰ কার্যালয়ৰ তৰফৰ পৰা লেনদেনৰ স্ক্ৰীণশ্বটসহ সদৰী কৰিছে। সময় ৰাইনাৰ এই পদক্ষেপক অনুৰাগীসকলে প্ৰশংসাৰে উপচায় দিছে।
ইতিমধ্যে ৰণদ্বীপ হুদা, ভূমি পেডনেকাৰ, ছলমান খান, কাৰ্তিক আৰিয়ানৰ দৰে মনোৰঞ্জন উদ্যোগটোৰ বহু তাৰকাই অসমৰ বানাক্ৰান্তক সহায়ৰ হাত আগবঢ়াইছে । কেৱল এয়াই নহয় বহু প্ৰভাৱশালী ব্যক্তিয়েও বান পীড়িতক সহায়ৰ হাত আগবঢ়াইছে। এনে ব্যক্তিৰ শীৰ্ষত আছে আদানি, আম্বানি, অনন্যা বিৰলাকে ধৰি জিন্দাল গ্ৰুপো। এতিয়া ছচিয়েল মিডিয়াত চৰ্চিত হৈছে ৰাইনাৰ অনুদান। মুখ্যমন্ত্রী হিমন্ত বিশ্ব শৰ্মাৰ কার্যালয়ে টুইটাৰযোগে এই কথা ঘোষণা কৰি লেনদেনৰ এটা স্ক্ৰীণশ্বট শ্বেয়াৰ কৰি লিখিছে,”মাননীয় মুখ্যমন্ত্ৰী ড° হিমন্ত বিশ্ব শৰ্মাই মুখ্যমন্ত্ৰীৰ সাহায্য পুঁজিলৈ শ্ৰী সময় ৰাইনাৰ বৰঙণি ১০ লাখ টকা গ্ৰহণ কৰিছে।” অসমৰ মুখ্যমন্ত্ৰীৰ কাৰ্যালয়ৰ পৰা দিয়া এই টুইটটোৱে অসংখ্য প্ৰতিক্ৰিয়া লাভ কৰিছে। প্ৰতিক্ৰিয়াসমূহৰ ভিতৰত “২০২৫ চনত কৰা FIR-এও স্থান লাভ কৰিছে।
সময় ৰাইনাৰ “ইণ্ডিয়াজ গট লেটেণ্ট”ৰ দ্বিতীয় ছিজনো প্ৰথম ছিজনৰ দৰেই চৰ্চাত আছে। অভিনেত্ৰী আলিয়া আৰু শ্বাৰৱৰীয়েও এই অনুষ্ঠানৰ প্ৰিমিয়াৰত অংশ লৈছিল। সময় ৰাইনাৰ এই অনুষ্ঠানটো নেটফ্লিক্স আৰু ইউটিউবতো ষ্ট্ৰীম কৰা হৈছে।
পূৰ্বতে উল্লেখ কৰাৰ দৰে মনোৰঞ্জন জগতখনৰ অসমৰ বানাক্ৰান্তলৈ সাহায্য আগবঢ়োৱা তাৰকাৰ তালিকা দীঘলীয়া। বলীউডৰ ভাইজান ছলমান খনৰ বিং হিউমেনৰ জৰিয়তে বন্যাৰ্তলৈ সাহায্য আগবঢ়োৱাৰ উপৰিও শিখসকলৰ প্ৰজেক্ট আছিয়ানাৰ জৰিয়তে বন্যাৰ্তলৈ ৫০০টা গৃহ নিৰ্মাণৰো প্ৰতিশ্ৰুতি দিছে ছলমান খানৰ সংস্থাটোৱে। ইয়াৰ উপৰিও বলীউডৰ তাৰকা অভিনেতা ৰণদ্বীপ হুদাই বান পীড়িত অঞ্চললৈ নিজে আহি আগবঢ়াইছিল সাহায্য। একেদৰে বলীউডৰ আন এজন অভিনেতা কাৰ্তিক আৰিয়ানে মুখ্যমন্ত্ৰীৰ সাহায্য পুঁজিলৈ ১ কোটি টকাৰ সাহায্য আগবঢ়াইছিল। ইয়াৰ উপৰিও অভিনেত্ৰী ভূমি পেডনেকাৰেও বন্যাৰ্তলৈ আগবঢ়াইছিল সাহায্য।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
