শ্ৰীলংকা ভ্ৰমণৰ পূৰ্বে ভাৰতীয় দলৰ নতুন অধিনায়ক, বি চি চি আইৰ গোপন সূত্ৰে প্ৰকাশ
শ্ৰীলংকাৰ বিৰুদ্ধে খেলিবলগীয়া ছিৰিজ সন্দৰ্ভত ডাঙৰ খবৰ ওলাইছে। এই ভ্ৰমণত টিম ইণ্ডিয়াই ৩ খন টি-২০ আৰু ৩ খন এদিনীয়া মেচ খেলিব লাগিব। ২৭ জুলাইৰ পৰা শ্ৰীলংকাৰ বিৰুদ্ধে তিনিখন খেলৰ টি-২০ ক্ৰিকেট শৃংখলাত ভাৰতীয় দলৰ অধিনায়ক হিচাপে থাকিব তাৰকা অল ৰাউণ্ডাৰ হাৰ্দিক পাণ্ডিয়া। বি চি চি আইৰ ভিতৰৰ পৰা পোৱা তথ্যত এই কথা প্ৰকাশ পাইছে।
আইচিচি টি-২০ বিশ্বকাপৰ ফাইনেলত ভাৰতৰ জয়ৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰা অল ৰাউণ্ডাৰ হাৰ্দিক পাণ্ডিয়াই আগন্তুক টি-২০ শৃংখলাত ভাৰতীয় দলৰ অধিনায়কত্ব কৰিব। আনহাতে ভাৰতীয় দলটোক টি-২০ চেম্পিয়ন কৰি এই ফৰ্মেটৰ পৰা অৱসৰ লোৱাৰ কথা ঘোষণা কৰিছিল ৰোহিত শৰ্মাই।
বিচিচিআইৰ এক জ্যেষ্ঠ সূত্ৰই জানিবলৈ দিয়া মতে, ‘হাৰ্দিক পাণ্ডিয়া ভাৰতীয় টি-২০ দলৰ উপ- অধিনায়ক আছিল। তেওঁ সম্পূৰ্ণ ফিট আৰু তিনিখন মেচৰ টি-২০ ছিৰিজৰ বাবেও উপলব্ধ, সেয়েহে তেওঁ অধিনায়ক হ’ব।
২৭ জুলাইৰ পৰা ৩০ জুলাইলৈ পল্লেকেলত অনুষ্ঠিত হ’বলগীয়া টি-২০ শৃংখলাৰ বিপৰীতে ২ৰ পৰা ৭ আগষ্টলৈ কলম্বোত অনুষ্ঠিত হ’ব এদিনীয়া। আগন্তুক কেইদিনমানৰ ভিতৰতে ঘোষণা কৰা হ’ব দলটো।
অৱশ্যে উপ অধিনায়ক শুভমন গিল নে সূৰ্য্যকুমাৰ যাদৱ হ’ব সেয়া এতিয়াও সিদ্ধান্ত হোৱা নাই। এদিনীয়া শৃংখলাৰ সন্দৰ্ভত বিষয়াগৰাকীয়ে কয় যে ব্যক্তিগত কাৰণত পাণ্ডিয়াই বিৰতি বিচাৰিছে আৰু নিয়মীয়া অধিনায়ক ৰোহিত শৰ্মাক এই বিষয়ে অৱগত কৰিছে।
বিচিচিআইৰ সম্পাদক জয় শ্বাহে স্পষ্টকৈ কৈছে যে আন্তঃৰাষ্ট্ৰীয় ক্ৰিকেট নেখেলিলেও সকলো তাৰকা ক্ৰিকেটাৰে ঘৰুৱা ক্ৰিকেটত খেলিব লাগিব। ৰেহাই দিয়া হৈছে ৰোহিত, বিৰাট কোহলী আৰু জছপ্ৰীত বুমৰাহক। বিচিচিআইয়ে বিচাৰিছে যে আন সকলো টেষ্ট বিশেষজ্ঞই আগষ্ট মাহত দুলীপ ট্ৰফীৰ অন্ততঃ এখন মেচ খেলক। ইয়াৰ পিছত দলটোৱে বাংলাদেশ আৰু নিউজিলেণ্ডৰ সৈতে টেষ্ট ছিৰিজ খেলিব লাগিব।
ভাৰতৰ শ্ৰীলংকা ভ্ৰমণৰ সময়সূচী
২৭ জুলাই – ১ম টি২০, সন্ধিয়া ৭ বজাত, পল্লেকেল
২৮ জুলাই – ২য় টি২০, সন্ধিয়া ৭ বজাত, পল্লেকেল
৩০ জুলাই – ৩য় টি২০, সন্ধিয়া ৭ বজাত, পল্লেকেল
২ আগষ্ট – ১ম এদিনীয়া, ২.৩০ বজাত, কলম্বো
৪ আগষ্ট – ২য় এদিনীয়া, ২.৩০ বজাত, কলম্বো
৭ আগষ্ট – ৩য় এদিনীয়া, ২.৩০ বজাত, কলম্বো
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
