গৰমৰ দিনত মহৰ উপদ্ৰৱে মানুহৰ জীৱন অতিষ্ঠ কৰি তোলে। কিন্তু আপুনি নিশ্চয় লক্ষ্য কৰিছে—একে ঠাইত একেলগে বহি থকা মানুহৰ মাজতো কিছুমানক মহে অবিৰতভাৱে কামোৰে, আনহাতে কিছুমান মানুৰ কাষলৈ মহ প্ৰায় নাযায়েই। মহক আমাৰ শৰীৰৰ পৰা ওলোৱা কিছুমান জৈৱিক সংকেত, শৰীৰৰ উষ্ণতা আৰু বিশেষ গন্ধে আকৰ্ষণ কৰে।
মহে কেনেকৈ মানুহ বিচাৰি পায়?
মানুহক কেৱল মাইকী মহেই কামোৰে। কিয়নো কণী বিকাশৰ বাবে প্ৰয়োজনীয় প্ৰ’টিন সিহঁতে মানুহৰ তেজৰ পৰাই লাভ কৰে। গৱেষণাৰ পৰা জানিব পৰা গৈছে যে মহে প্ৰায় ১০ মিটাৰ দূৰৰ পৰাই নিজৰ চিকাৰ চিনাক্ত কৰিব পাৰে। মানুহে উশাহ এৰাৰ সময়ত বায়ুত এৰি দিয়া কাৰ্বন ডাইঅক্সাইড (CO₂) মহৰ বাবে আটাইতকৈ ডাঙৰ সংকেত। এই গেছৰ উপস্থিতি অনুভৱ কৰিলেই মহে বুজি পায় যে ওচৰতে কোনো জীৱিত প্ৰাণী আছে। এই কাৰণেই শিশুতকৈ প্ৰাপ্তবয়স্ক মানুহক মহে বেছিকৈ কামোৰে, কিয়নো প্ৰাপ্তবয়স্ক মানুহে অধিক কাৰ্বন ডাই অক্সাইড এৰি দিয়ে। একেদৰে অধিক ওজনৰ ব্যক্তি বা ব্যায়াম কৰা লোকৰ শৰীৰৰ বিপাকীয় ক্ৰিয়া (Metabolism) দ্ৰুত হোৱাৰ বাবে অধিক CO₂, ঘাম আৰু তাপ উৎপন্ন হয়, যাৰ ফলত মহ সিহঁতৰ প্ৰতি অধিক আকৰ্ষিত হয়।
গৰ্ভৱতী মহিলাক কিয় বেছিকৈ কামোৰে?
গৰ্ভাৱস্থাত শৰীৰৰ বিপাকীয় ক্ৰিয়া আৰু শ্বাস-প্ৰশ্বাসৰ গতি বৃদ্ধি পায়। ফলস্বৰূপে শৰীৰে অধিক তাপ উৎপন্ন কৰে আৰু অধিক কাৰ্বন ডাইঅক্সাইড নিৰ্গত কৰে। এই দুয়োটা কাৰণতে গৰ্ভৱতী মহিলাক আন মহিলাতকৈ প্ৰায় দুগুণ বেছিকৈ মহে কামোৰিব পাৰে। বিশেষজ্ঞসকলৰ মতে, গৰ্ভাৱস্থাত শৰীৰটো যেন এক “সৰু ভাটী”ৰ দৰে কাম কৰে, যাৰ বাবে মহে সহজে এনে ব্যক্তিক বিচাৰি পায়।
শৰীৰৰ গন্ধেই নিৰ্ধাৰণ কৰে মহৰ পছন্দ
মহে যেতিয়া মানুহৰ ওচৰ চাপি আহে, তেতিয়া কেৱল কাৰ্বন ডাইঅক্সাইডেই নহয়, শৰীৰ আৰু উশাহৰ পৰা ওলোৱা বিশেষ গন্ধও চিনাক্ত কৰে। আমাৰ ছালত বাস কৰা অণুজীৱসমূহে (Microorganisms) শৰীৰৰ বিভিন্ন জৈৱ পদাৰ্থ ভাঙি বহু ধৰণৰ উৰি যাব পৰা জৈৱিক যৌগ (Volatile Organic Compounds) উৎপন্ন কৰে। এই যৌগসমূহ সহজে বায়ুত বিয়পি পৰে আৰু মহে সেইবোৰ সহজেই অনুভৱ কৰিব পাৰে। বিজ্ঞানীসকলে কৈছে, মানুহৰ ছালৰ পৰা ৫০০তকৈও অধিক ধৰণৰ এনে ৰাসায়নিক যৌগ ওলায়। ইয়াৰ ভিতৰত এমোনিয়া, লেক্টিক এচিড আৰু বিশেষকৈ কাৰ্বক্সিলিক এচিডৰ উপস্থিতি মহৰ বাবে অত্যন্ত আকৰ্ষণীয়।
ছালৰ বেক্টেৰিয়াৰ ভূমিকাও গুৰুত্বপূৰ্ণ
নেদাৰলেণ্ডছৰ ৱাগেনিঙেন বিশ্ববিদ্যালয়ৰ গৱেষণাত দেখা গৈছে যে যিসকল লোকক মেলেৰিয়া বাহক মহে বেছিকৈ কামোৰে, তেওঁলোকৰ ছালত থকা বেক্টেৰিয়াৰ গঠন আন লোকতকৈ পৃথক। এই বেক্টেৰিয়াই শৰীৰৰ বিশেষ গোন্ধ সৃষ্টি কৰাত মুখ্য ভূমিকা পালন কৰে। আচলতে, ছালত বেক্টেৰিয়া নাথাকিলে মানুহৰ ঘামৰ বিশেষ কোনো গোন্ধেই নাথাকিলহেঁতেন।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
