অসম লাইভ২৪ঃ ছৰি অখিল! অৰ্কিড পাৰ্কত উপস্থিত হৈ অখিল গগৈৰ সন্মুখত হঠাতেই ক্ষমা খুজিলে জুবিন গাৰ্গে। অখিল গগৈয়ে শ্বেয়াৰ কৰিছে এটা বিশেষ ভিডিঅ’। জুবিন আৰু অখিলৰ কথোপকথন শ্বেয়াৰ কৰি অখিল গগৈয়ে কেপশ্ব্যনত লিখিছে, ‘জুবিন গাৰ্গৰ সৈতে ১৩ জানুৱাৰী, ২০২৪ৰ দিনা কাজিৰঙা অৰ্কিড পাৰ্কত বহু কথা পাতিলোঁ। প্ৰথমেই জুবিনদাই শিৱসাগৰলৈ আমাৰ নিমন্ত্ৰণত গৈ মঞ্চত গীত নাগাই ঘূৰি অহা বাবে ক্ষমা বিচাৰিলে। ক’লে, sorry অখিল, সেইদিনা প্ৰগ্ৰেম নকৰা বাবে ছ’ৰি। মোৰ গাটো বহুত বেয়া আছিল। গোৱা হ’লে প্ৰগ্ৰেম বহু বেয়া হ’লহেঁতেন। গাব নোৱাৰিলো। গাবলৈ মন নগ’ল। তাৰ পাছত মই তিনিদিন তিনি ৰাতি শুই থাকিলোঁ।
মই শিল্পীৰ স্বাধীনতাক সন্মান কৰাৰ কথা ক’লোঁ। ক’লোঁ, এদিন গীত গাই দিবগৈ; নহ’লে আপোনাৰ-মোৰ কাজিয়া থকা বুলিহে ভাবিব। জুবিনদাই অনৰ্গল মিঠা মিঠা কথাবোৰ কৈ গ’ল। জুবিনদাই ক’লে— মই ধনী মানুহৰ লগত নাই; মই ছ’চিয়েলিষ্ট। মই চে গুৱেভাৰাৰ শিষ্য। মই সুধিলো— চে-ৰ ‘মটৰচাইকেল ডায়েৰী’ পঢ়িছে নেকি? পঢ়া বুলি ক’লে আৰু চিনেমাখন চোৱা বুলি ক’লে। মোকো সুধিলে— তুমি ছ’চিয়েলিষ্ট, বাওঁপন্থী হয়নে? মই হাঁহি হাঁহি ক’লোঁ— মই চাৰ্টিফাইড বাওঁপন্থী, ছ’চিয়েলিষ্ট। মই তেখেতৰ মেজাজী সাজ-পোচাক ভাল পোৱাৰ কথা ক’লোঁ; সেয়া প্ৰতিবাদৰ প্ৰতীক বুলি ক’লোঁ। মই ক’লোঁ, মই আপোনাৰ বহেমিয়ান জীৱনৰ “বলিয়ালিবোৰ” enjoy কৰোঁ। তেখেতে আজি বাৰম্বাৰ মুখ্যমন্ত্ৰী হিমন্ত বিশ্ব শৰ্মাই ড০ হীৰেন গোহাঁই ছাৰক অভব্য আচৰণ কৰাটোৰ বিৰোধিতা কৰিলে আৰু “হিমন্তদাক ক’ম” বুলি ক’লে। হিমন্ত বিশ্ব শৰ্মাই আজিকালি এনেকুৱা আচৰণ সঘনাই কৰে বুলি খেদ প্ৰকাশ কৰিলে। তেখেতক আজি মই বাৰম্বাৰ মদ কমকৈ খাবলৈ অনুৰোধ কৰিলোঁ। মদ খাই নিজকে ধ্বংস নকৰিবলৈ আহ্বান জনালোঁ। তেখেতৰ মেনেজাৰক মদ খালে গালি দিবলৈ ক’লোঁ; নিয়ন্ত্ৰণ কৰিবলৈ ক’লোঁ। তেখেতক পাৰ্কৰ মূল বিষয়বোৰ নিজে দেখুৱালোঁ।
লোকশিল্পী দিজেন গগৈ লোকবাদ্য সংগ্ৰহালয়ত জুবিনদাই ইমুৰ লগত বাদ্য সংগত কৰিলে।অৰ্কিড পাৰ্কক বহুত প্ৰশংসা কৰিলে।জুবিনদা আমাৰ পাৰ্কৰ নিয়মীয়া পৰ্যটক যদিও বহু বছৰৰ পাছত লগ পালোঁ। জুবিনদাক ক’লোঁ— আমি বোধহয় বিশ্বৰে সৰ্ববৃহৎ প্ৰাকৃতিক অৰ্কিড সংৰক্ষক। বনৌষধি সংগ্ৰহতো ৰেক’ৰ্ডেই হ’ব।জুবিনদাই পিছে নীলকণ্ঠ(Aristolochia assamica) চিনি পালে। “ অসম জাতীয় সংগ্ৰহালয়”ৰ সামগ্ৰীসমূহ মোক অসমৰ ৰাইজে দিয়া উপহাৰ বুলি আৰু সাজ-পোচাকৰ মিউজিয়ামৰ সকলো জাতি-জনগোষ্ঠীৰ কাপোৰসমূহ মাত্ৰ ১৫ দিনৰ ভিতৰত ফেচবুকত আহ্বান জনাই সংগ্ৰহ কৰা বুলি কওঁতে তেখেত আচৰিত হৈছিল।তেখেতে বেম্ব’ গাৰ্ডেনখন চাই বৰ ভাল পোৱা বুলিও ক’লে।কেইবা ঘণ্টাও তেখেতে অৰ্কিড পাৰ্কত কটালে আৰু প্ৰফুল্ল চিত্তে বিদায় ল’লে। পাৰ্কৰ ৰেষ্টুৰেণ্টৰ মেনেজাৰ জয়ন্ত গগৈয়ে আমাৰ কথোপকথনৰ সামান্য অংশ ৰেকৰ্ডিং কৰিছিল। জয়ন্তলৈ ধন্যবাদ।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
