উত্তৰ ভাৰতৰ শীতৰ কথা সকলোৱেই জানে৷ এইবাৰ অযোধ্যাৰ মন্দিৰত ৰামলালাকো সাধাৰণ পোছাকত ৰাখিব পৰা নাযাব৷ সেয়ে বিশেষভাৱে নক্সা তৈয়াৰ কৰি অনা হৈছে ৰামলালাৰ শীতৰ পোছক৷ আনকি সৰযূ নদীৰ তীৰৰ শীতপ্ৰবাহৰ কথা ভাৱিয়েই ৰামলালাৰ খাদ্যভাষতো কিছু পৰিবৰ্তন অনাৰ সিদ্ধান্ত লৈছে মন্দিৰ কৰ্তৃপক্ষই৷ এই সময়ত শৰীৰত শীতপোছাক পিন্ধোৱা হ’ব ৰামলালাক৷ মন্দিৰ কৰ্তৃপক্ষই জনাইছে যে ৰামলালাৰ এই গৰম পোছাক তৈয়াৰ কৰিছে দিল্লীৰ পোছাকশিল্পীয়ে৷
২০ নৱেম্বৰত যাৱতীয় ৰীতি মানি ৰামলালাৰ গাত পিন্ধোৱা হ’ব বিশেষ শীত পোছাক৷ ইয়াৰ ওপৰত থাকিব পছমিনা শালো৷ মন্দিৰৰ দোতলাত আছে ৰামলালাৰ তিনি ভায়েক আৰু হনুমানৰ বিগ্ৰহ৷ তেওঁলোকৰ বাবেও তৈয়াৰ কৰা হৈছে বিশেষ শীতপোছাক৷ কেৱল পোছাক নহয়, ভগৱানৰ খাদ্যতো সালসলনি অনা হৈছে৷
গৰমৰ কথা ভাৱিয়েই বিগত দিনকেইটাত ৰামলালাক খাদ্যত দৈ দিয়া হৈছিল৷ ২০ নৱেম্বৰৰ পাছত আৰু ৰামলালাক দৈ দিয়া নহ’ব৷ ইয়াৰ সলনি ৰাবৰি আৰু ড্ৰাই ফ্ৰুইট দিয়া হ’ব বুলি জনা গৈছে৷ ইয়াৰোপৰি অযোধ্যাৰ তীব্ৰ শীতৰ কথা ভাৱিয়েই দৈনিক গৰম পানীৰে স্নান কৰোৱা হ’ব বিগ্ৰহক৷ গৰ্ভগৃহত হিটাৰ ৰখাৰো ব্যৱস্থা আছে৷ মন্দিৰৰ প্ৰধান পুৰোহিত আচাৰ্য সত্যেন্দ্ৰ দাসে কয়, ‘২০ নৱেম্বৰত ভাল তিথি আছে৷ সেই দিনাৰ পৰাই ৰামলালাৰ ভোগৰ পৰিবৰ্তন অনা হ’ব৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
