মানৱতাক লজ্জিত কৰা ঘটনা, এহাল দম্পতীয়ে এগৰাকী মহিলাৰ সৈতে কৰিলে নিকৃষ্ট কাম
ডাইনী সন্দেহত এক অতিকে নিৰ্লজ্জ ঘটনা সংঘটিত হৈছে দেশত। এগৰাকী মহিলাক নিৰ্মম নিৰ্যাতন। চুলি কাটি মহিলাগৰাকীৰ ওপৰত চলালে অত্যাচাৰ। দিল্লীৰ গাতে লাগি থকা উত্তৰ প্ৰদেশৰ গ্ৰেটাৰ নয়ডাত পোহৰলৈ আহিছে এই চাঞ্চল্যকৰ খবৰ।
ইয়াৰ সুৰজপুৰ অঞ্চলত এটা পৰিয়ালে ডাইনী সন্দেহত এগৰাকী মহিলাক মাৰপিট কৰি চুলি কাটি প্ৰস্ৰাৱ খাবলৈ বাধ্য কৰায়। ভুক্তভোগী মহিলাগৰাকীয়ে জনোৱা মতে, অভিযুক্তই এই সমগ্ৰ ঘটনাৰ ভিডিঅ’ও বনাইছিল। ঘটনা সন্দৰ্ভত আৰক্ষীক অভিযোগ দাখিল কৰিছে ভুক্তভোগীয়ে। এই গোচৰত ব্যৱস্থা গ্ৰহণ কৰি আৰক্ষীয়ে অভিযুক্ত ঠিকাদাৰ, তেওঁৰ পত্নী আৰু কন্যাক গ্ৰেপ্তাৰ কৰিছে।
আৰক্ষীৰ পৰা পোৱা তথ্য অনুসৰি বিহাৰৰ পূৰ্ণিয়া নিবাসী শ্ৰমিক মহিলাগৰাকী গাঁৱৰ ভাড়াঘৰত থাকে। মহিলাগৰাকীৰ ঘৰৰ সমীপতে ঠিকাদাৰ হিচাপে কাম কৰা নানুভা নামৰ লোকগৰাকী পৰিয়ালৰ সৈতে একেটা চুবুৰীতে বাস কৰে। সেই ঠিকাদাৰ জনৰে কন্যা বহু দিন ধৰি অসুস্থ হৈ আছিল। যাৰ বাবে ঠিকাদাৰ আৰু তেওঁৰ পত্নীয়ে চুবুৰীটোত বসবাস কৰা মহিলাগৰাকীয়ে ডাইনী চৰ্চা কৰা বুলি সন্দেহ কৰে।
এই সন্দেহত ঠিকাদাৰৰ পৰিয়ালে মাৰপিট কৰা বুলি আৰক্ষীক জনায়। পৰিয়ালৰ লোকে মহিলাগৰাকীক ঘৰত আবদ্ধ কৰি বেয়াকৈ প্ৰহাৰ কৰে। চুলি কাটি জোৰকৈ প্ৰস্ৰাৱ খাবলৈ বাধ্য কৰাই। এই সময়ছোৱাত অভিযুক্তই এই ঘটনাৰ ভিডিঅ’ও বনাই ৰাখে। ইয়াৰ পিছত কেনেবাকৈ মহিলাগৰাকীয়ে অভিযুক্তৰ কবলৰ পৰা মুক্ত হৈ আৰক্ষীৰ কাষ চাপে।
সুৰজপুৰ কোতৱালিৰ ভাৰপ্ৰাপ্ত আৰক্ষীয়ে কয় যে মহিলাগৰাকীৰ অভিযোগৰ ভিত্তিত অভিযুক্ত ঠিকাদাৰ নানুভা, তেওঁৰ পত্নী পিংকি আৰু কন্যা প্ৰীতিৰ বিৰুদ্ধে গোচৰ ৰুজু কৰা হৈছে। কেৱল এয়াই নহয় আৰক্ষীয়ে তিনিওজনকে গ্ৰেপ্তাৰ কৰি জেললৈ প্ৰেৰণ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
