অসম লাইভ২৪ঃ নাম অলখ পাণ্ডে। অলখ এতিয়া প্ৰতিষ্ঠিত দেশৰ একমাত্ৰ এড টেক ইউনিকৰ্ণ ‘ফিজিক্সওৱালা’ৰ মালিক। এই বৰ্ষত তেওঁ এই ব্যৱসায়ৰ পৰা লাভ কৰিছে ৭৮০ কোটি। বিগত বৰ্ষতকৈ ৩০০ শতাংশ বেছি লাভ কৰিছে অলখে। বিগত বৰ্ষত তেওঁৰ লাভ্যাংশ আছিল ২৩৩কোটি। এই সফলতাৰ পূৰ্বে অলখৰ জীৱন সম্পূৰ্ণ পৃথক আছিল। কলেজত পঢ়ি থকাৰ সময়তো পঢ়াশুনাৰ প্ৰতি মুঠেও আগ্ৰহ নথকা এজন ছাত্ৰ আছিল অলখ। সেয়ে কলেজো আধাতে সামৰিছিল অলখে। তেওঁ ইঞ্জিনীয়াৰিঙৰ ছাত্ৰ আছিল। ইঞ্জিনীয়াৰিঙৰ তৃতীয় বৰ্ষত তেওঁ পঢ়া সমাপ্ত কৰে।
পাছলৈ অলখে নিজা চহৰ এলাহবাদৰ এটা কছিং চেণ্টাৰত কাম কৰিবলৈ আৰম্ভ কৰে। কছিং চেণ্টাৰত কাম আৰম্ভ কৰাৰ সময়ত তেওঁৰ দৰমহা আছিল ৫হাজাৰ টকা। শিক্ষক হিচাপে যাত্ৰা আৰম্ভ কৰাৰ পাছত তেওঁ ছাত্ৰৰ বিভিন্ন সমস্যাৰ সৈতে পৰিচিত হয়। তেওঁ পোনতে পঢ়াশুনা অতিকৈ বেয়া পাইছিল যদিও পাছলৈ শিক্ষাৰ ক্ষেত্ৰতেই তেওঁ জড়িত হৈ পৰিল। অলখৰ চকুৰ সন্মুখত ধৰা দিলে নতুন দিগন্তই। ছাত্ৰ ছাত্ৰীক পঢ়োৱাৰ অভিজ্ঞতাৰ পৰা তেওঁ বুজি উঠিল যে শিক্ষক এজন কঠোৰ হোৱাৰ লগতে ছাত্ৰৰ এজন ভাল বন্ধুও হ’ব লাগিব।
ইঞ্জিনীয়াৰিঙত ড্ৰপআউট , প্ৰাক্তন শিক্ষক অলখে ভৰি দিলে ইউটিউবৰ পৃথিৱীত। ভৰি দিয়েই জনপ্ৰিয় হৈ পৰিল ইউটিউবৰ পৃথিৱীত। ২০১৪ চনত আৰম্ভ কৰা ইউটিউব চেনেলত এতিয়া তেওঁৰ মিলিয়ন ফলৱাৰ্ছ। অলখৰ জনপ্ৰিয়তা ইমানেই বৃদ্ধি পালে যে তেওঁ আকৌ এটা সংস্থাৰ চাকৰি লাভ কৰিলে। বাৰ্ষিক ৪০ কোটিৰ পেকেজ সংস্থাটোৱে অলখক দিলে। কিন্তু সেই অফাৰ অলখে গ্ৰহণ নকৰি নিজাকৈ আৰম্ভ কৰিলে ‘ফিজিক্সওৱালা’ নামৰ এটা সংস্থা। সমান্তৰালকৈ আগবাঢ়িল ইউটিউবৰ জগততো। ২০১৭চনত তেওঁৰ ফ’লৱাৰ্ছৰ সংখ্যা আছিল ৪০০০। ২০১৯ চনত সেই সংখ্যা বৃদ্ধি পায় হয়গৈ ২.২ মিলিয়ন। ২০২০ চনত তেওঁ ইউটিবৰ ওপৰিও স্থায়ী ঠিকনাৰে আৰম্ভ কৰিলে ‘ফিজিক্সওৱালা’ নামৰ সংস্থাটো। এই সংস্থা আৰু ইউটিউব দুটাতেই সমান্তৰালভাৱে আগুৱাই অলখ এতিয়া ৪০০০কোটিৰ মালিক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
