মানৱেন্দ্ৰ কুমাৰ দাসঃ ২০১৪ চনত দেশৰ প্ৰায় ৪০ শতাংশ হিন্দু লোকৰ সমৰ্থন লাভ কৰিছিল ভাৰতীয় জনতা পাৰ্টীয়ে৷ পৰৱৰ্তী পৰ্যায়ত প্ৰধানমন্ত্ৰী নৰেন্দ্ৰ মোদীৰ নেতৃত্বত গঠন হৈছিল বিজেপি মিত্ৰজোঁটৰ চৰকাৰ৷ বিজেপি দল ক্ষমতালৈ অহাৰ লগে লগেই সনাতনী হিন্দু সভ্যতাই বিশ্বৰ মানচিত্ৰত এক নতুন পৰিচয় লাভ কৰে৷
ৰাষ্ট্ৰীয় স্বয়ং সেৱক সংঘৰ নীতি আৰু আদৰ্শৰ দ্বাৰা পৰিচালিত হোৱা বিজেপিৰ নেতৃত্বত আৰম্ভ হয় হিন্দুত্ববাদৰ সূত্ৰ৷ আৰু এই সূত্ৰক মূলধন হিচাপে লৈ বিজেপিয়ে ভাৰতত এখনৰ পাছত আনখন ৰাজ্যত নিজৰ প্ৰভাৱ বিস্তাৰ কৰিবলৈ সক্ষম হৈছে৷ আৰু ইয়াৰ সমান্তৰালভাৱে দেশত হিন্দুত্ববাদৰ প্ৰচলনো ক্ৰমে ব্যাপক হৈ উঠে৷ বিজেপি আৰু rssৰ সাংগঠনিক তৎপৰতাৰ পৰিণতিত দেশৰ হিন্দু জনতা একত্ৰিত হোৱাৰ প্ৰৱণতাও বিশ্ববাসীয়ে লক্ষ্য কৰে৷ আৰু সাম্প্ৰতিক সময়ত ভাৰতত বিজেপিৰ যি ৰাজনৈতিক আৰু সাংগঠনিক আধিপত্য চলিব লাগিছে তাক লৈ বিশ্বৰ বহু শক্তিধৰ ৰাষ্ট্ৰও যেন আজি শংকিত৷ কিন্তু কিয়?
ভাৰতৰ একত্ৰিত হিন্দুক লৈ মূলত খ্ৰীষ্টিয়ান আৰু ইছলামিক দেশসমূহ অধিক শংকিত হোৱা পৰলক্ষিত হৈছে৷ ১৩০ কোটি জনসংখ্যাৰ দেশখনত হিন্দু লোকৰ সংখ্যা প্ৰায় ১০০ কোটি৷ সেই ১০০ কোটি লোকৰ ৪০ শতাংশৰ ভোটহে বিজেপিয়ে লাভ কৰিবলৈ সক্ষম হোৱা বুলি তথ্য প্ৰকাশ পাইছে৷ এই কথা এতিয়া গোপন হৈ থকা নাই৷ কিন্তু ভাৰতীয় জনতা পাৰ্টীয়ে দেশৰ ৮০ শতাংশ হিন্দু লোকৰ সমৰ্থন আদায় কৰিবলৈ পূৰ্ণ প্ৰচেষ্টা চলাব লাগিছে৷ গ্ৰহণ কৰা হৈছে বিভিন্ন আঁচনি৷ আৰু এই আঁচনিসমূহ যদি সফল হয়, তেন্তে পৃথিৱীৰ সৰ্ববৃহৎ গণতান্ত্ৰিক গণৰাজ্য ভাৰতবৰ্ষত এককভাৱে হিন্দু নেতৃত্বৰ শাসন চলিব৷ ইয়াক লৈ হয়তো শংকিত হৈ উঠিছে অন্য বহু ৰাষ্ট্ৰ৷ তাৰ প্ৰমাণো ক্ৰমাৎ স্পষ্ট হ’বলৈ ধৰিছে৷
লগতে পঢ়ক ওফন্দি উঠা বৰাক নৈৰ মথাউৰি কাটি গ্ৰেপ্তাৰ হ’ল ধৰ্মীয় সংখ্যালঘু সম্প্ৰদায়ৰ ৪ যুৱক
ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত ইতিমধ্যে চৰ্চিত হোৱা বিষয়টো হ’ল হিন্দু বিৰোধী শক্তিৰ তৎপৰতা৷ একে সময়তে একাংশ বৃহৎ পুঁজিপতি গোষ্ঠীৰ পৃষ্ঠপোষকতাত হিন্দু ধর্মবিৰোধী কাম-কাজো আৰম্ভ হোৱা বুলি অভিযোগ উঠিছে৷ বৌদ্ধিক পৰ্যায়ত হিন্দু ধৰ্মৰ আৰাধ্য দেৱ-দেৱীক অপমান কৰাৰ অচিলাৰে হিন্দু মানুহৰ ধৰ্মীয় অনুভূতিকো আঘাত হানিবলৈ চেষ্টা কৰা হৈছে৷ তাৰ তথ্যও বিশ্বৰ ইতিহাসত কম নহয়৷ অতি শেহতীয়াকৈ কানাডাত সংঘটিত এক ঘটনাই ইয়াৰ সত্যতা অধিক স্পষ্ট কৰি তুলিছে৷
কানাডাত স্থায়ীভাৱে বসবাস কৰা লীনা মেনিমেকেলাই নামৰ চলচ্চিত্ৰ পৰিচালক এগৰাকীয়ে ‘কালী’ নামেৰে নিৰ্মাণ কৰিছে এখন তথ্যচিত্ৰ৷ এই তথ্যচিত্ৰত শক্তি আৰু শান্তিৰ আৰাধ্য দেৱী মা-কালীক বিকৃত ৰূপত উপস্থাপন কৰি হিন্দু ধৰ্মক হেয় প্ৰতিপন্ন কৰিবও বিচৰা হৈছে৷ তামিলনাডুৰ নাডুৰাই চহৰত জন্মগ্ৰহণ কৰা মহিলাগৰাকী সম্প্ৰতি কানাডাৰ টৰেণ্ট’ চহৰৰ স্থায়ী বাসিন্দা৷ ইয়াৰ পূৰ্বেও এইগৰাকী মহিলাই হিন্দু ধৰ্মক হেয় প্ৰতিপন্ন কৰিব পৰা তথ্যচিত্ৰ নিৰ্মাণ কৰাৰো অভিযোগ আছে৷ কিন্তু শেহতীয়াভাৱে তেওঁ যি পদক্ষেপ লৈছে তাৰ আঁৰত উন্নত ৰাষ্ট্ৰৰ পুঁজিপতি গোষ্ঠীৰ পৃষ্ঠপোষকতা থকা বুলিও অভিযোগ উঠিছে৷
লগতে পঢ়ক ১৫ জুলাইৰ পৰা সলনি হ’ব NPSত বিনিয়োগৰ নিয়ম, লাভ নে লোকচান হ’ব আপোনাৰ?
একে সময়তে কানাডাত বসবাস কৰা হিন্দু ধৰ্মাৱলম্বী লোকেও তীব্ৰ বিৰোধ কৰিছে লীনা মেনিমেকেলাইৰ কৰ্মকাণ্ডক৷ কানাডাত থকা ভাৰতীয় উচ্চায়ুক্তই ‘কালী’ নামৰ চিনেমাখনৰ প্ৰ’ম’চন বন্ধ ৰাখিবলৈ নিৰ্দেশ দিছে লীনা মেনিমেকেলাইক৷ কিন্তু তাৰ পাছতো এইগৰাকী চিত্ৰ পৰিচালকে বিতৰ্কিত চলচ্চিত্ৰখনৰ প্ৰ’ম’চন বন্ধ কৰা নাছিল৷ আৰু অতি শেহতীয়াভাৱে যোৱা ৪ জুলাইত উত্তৰ প্ৰদেশ আৰক্ষীয়ে ipc-153(a) আৰু ipc-295(a) ধাৰাৰ অধীনত ৰুজু গোচৰ কৰিছে৷ হয়তো আগন্তুক সময়ছোৱাত ভাৰত চৰকাৰে বিতৰ্কিত তথ্যচিত্ৰ প্ৰস্তুত কৰা প্ৰৱাসী ভাৰতীয়গৰাকীক ভাৰতলৈ চমন জাৰি কৰিব পাৰে৷ সেয়া যথাসময়ত স্পষ্ট হৈ উঠিব৷
কিন্তু সাম্প্ৰতিক সময়ত অতি গুৰুত্বপূৰ্ণ প্ৰশ্নটো হৈছে বিশ্বৰ বিভিন্ন প্ৰান্তত হিন্দুবিৰোধী শক্তি অধিক সক্ৰিয় হৈ উঠিছে কিয়? ১০০ কোটি হিন্দু লোক একত্ৰিত হ’ব বুলি শংকিত হৈছে নেকি বিশ্বৰ মহা শক্তিধৰ ৰাষ্ট্ৰসমূহ? আৰু সেই শংকাৰ বলি হৈ অতি কৌশলেৰে বিশ্বৰ বিভিন্ন প্ৰান্তত হিন্দু ধৰ্মৰ দেৱ-দেৱীক অপমান কৰাৰ কৌশল ৰচিছে নেকি? যদি সঁচাকৈয়ে ১০০ কোটি একত্ৰিত হিন্দুৰ প্ৰতি বিশ্বৰ শক্তিধৰ ৰাষ্ট্ৰসমূহ চিন্তিত হৈছে, তেন্তে আগন্তুক সময়ছোৱাত বিশ্বৰ ইতিহাসো হয়তো সলনি হ’ব পাৰে৷ তাৰ বাবে অপেক্ষা মাথোঁ সময়ৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ