ধন-সোণ অবৈধভাৱে সৰবৰাহ কৰা সৰবৰাহকাৰীয়ে বিভিন্ন কৌশলেৰে সোণ বিমান বন্দৰ, ৰে’লপথেৰে বা স্থল পথেৰে সৰবৰাহ কৰে। এনেকৈ সৰবৰাহ কৰা বুজন পৰিমাণৰ সোণ আৰক্ষী, নিৰাপত্তাৰক্ষী বা শুল্ক বিভাগৰ শেনচকুৰ পৰা প্ৰায়ে সাৰি যাব নোৱাৰে। বিভিন্ন সময়ত এনেকৈ বিভিন্ন স্থানত জব্দ কৰা সোণৰ পৰিমাণ বৰ্তমান হৈছেগৈ প্ৰায় ৮ হাজাৰ ৬০০ কিলোগ্ৰাম। কেন্দ্ৰীয় চৰকাৰৰ তথ্য অনুসৰি, ২০২২-২৩ বিত্তীয় বৰ্ষৰ পৰা ২০২৫ চনৰ অক্টোবৰলৈকে বিমানবন্দৰসমূহত শুল্ক বিভাগ আৰু DRI-এ ৮,৫৯৮.১৮ কিলোগ্ৰাম সোণ জব্দ কৰিছে, যাৰ মূল্য প্ৰায় ৫,০০৩.৬০ কোটি টকা। ইয়াৰ পৰা স্পষ্ট যে সোণ চোৰাং সৰবৰাহ আৰু আৰ্থিক অপৰাধৰ বিৰুদ্ধে দেশজুৰি কঠোৰ অভিযান অব্যাহত আছে। চৰকাৰীভাৱে সংৰক্ষণ কৰি ৰখা এই বুজন পৰিমাণৰ সোণ সম্প্ৰতি চৰকাৰে গতি লগোৱাৰ যো-জা চলাইছে। কিয়নো এনে মূল্যৱান সম্পত্তি দীঘলীয়া সময় ধৰি সংৰক্ষণ কৰি ৰাখিবলগীয়া হোৱাত চৰকাৰৰ ওপৰত সুৰক্ষা, ৰক্ষণাবেক্ষণ আৰু নথি-পত্ৰ সংৰক্ষণৰ ক্ষেত্ৰত অতিৰিক্ত ব্যয়ৰ বোজা পৰিছে। সেয়ে, আইন আৰু বিধি অনুসৰি শীঘ্ৰে নিলাম, বিক্ৰী অথবা আন আইনী প্ৰক্ৰিয়াৰে ইয়াৰ নিষ্পত্তি কৰাৰ পৰামৰ্শ দিছে CAG-এ।
কোন বছৰত কিমান সোণ জব্দ?
সংসদত দাখিল কৰা কেন্দ্ৰীয় চৰকাৰৰ তথ্য অনুসৰি, ২০২২-২৩ বিত্তীয় বৰ্ষৰ পৰা ২০২৫ চনৰ অক্টোবৰলৈকে শুল্ক বিভাগ আৰু DRI-এ বিমানবন্দৰসমূহত ১৩,২১৩টা গোচৰত ৮,৫৯৮.১৮ কিলোগ্ৰাম সোণ জব্দ কৰিছে, যাৰ মূল্য প্ৰায় ৫,০০৩.৬০ কোটি টকা।
এই সময়ছোৱাত—
২০২২-২৩ বৰ্ষত ২,৭৭৫.৮৮ কিলোগ্ৰাম সোণ জব্দ
২০২৩-২৪ বৰ্ষত ৫,৯৬২টা গোচৰত ৩,৭১৪.৩৮ কিলোগ্ৰাম সোণ জব্দ, মূল্য ২,০৮১.৩৯ কোটি টকা (সৰ্বাধিক)।
২০২৪-২৫ বৰ্ষত ১,৮৪৮.২৯ কিলোগ্ৰাম সোণ জব্দ।
অক্টোবৰ ২০২৫লৈ ২৫৯.৬৩ কিলোগ্ৰাম সোণ জব্দ।
এই পৰিসংখ্যাই স্পষ্টভাৱে দেখুৱাইছে যে বিমানবন্দৰসমূহৰ জৰিয়তে চলা সোণ চোৰাং সৰবৰাহৰ বিৰুদ্ধে তদন্তকাৰী সংস্থাসমূহে নিৰন্তৰ কঠোৰ অভিযান চলাই আছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
