হাতেৰেও নহয়, ভৰিৰেও নহয়, বৰঞ্চ বিশেষ অংগৰে টাইপিং কৰি গীনিজ ৱৰ্ল্ড ৰেকৰ্ডত নাম ভাৰতীয়ৰ
পৃথিৱীত বেলেগ কিবা এটা কৰিবলৈ মানুহে বিভিন্ন কৌশল গ্ৰহণ কৰে। নিজৰ নামত ৰেকৰ্ড গঢ়িবলৈ বিভিন্ন পন্থা অৱলম্বন কৰে। কোনোবাই যদি দীঘল নখ ৰাখে, কোনোবাই আকৌ দাড়ি- চুলি দীঘল কৰি অভিলেখ গঢ়ে। কোনোৱে আকৌ বহু কষ্টৰ তথা কঠোৰ অভ্যাসৰ ফলত কৰি পেলাই অসাধ্য সাধন।
তেনেই এক কাম কৰিছে এগৰাকী ভাৰতীয় লোকে। লোকগৰাকীয়ে হাত-ভৰি ব্যৱহাৰ নকৰাকৈ শৰীৰৰ আন এক অংগহে ব্যৱহাৰ কৰি টাইপ কৰি অভিলেখ সৃষ্টি কৰিছে।
গীনিজ ৱৰ্ল্ড ৰেকৰ্ডৰ তথ্য অনুসৰি ব্যক্তিগৰাকীয়ে নাকেৰে সৰ্বাধিক বেগেৰে টাইপ কৰাৰ নিজৰেই পূৰ্বৰ অভিলেখ ভংগ কৰিলে। বিনোদ কুমাৰ চৌধুৰী নামৰ ব্যক্তি জনে একেটা বিভাগতে তিনিবাৰকৈ এই অভিলেখ গঢ়িবলৈ চেষ্টা কৰিছিল আৰু প্ৰতিবাৰেই তেওঁ নিজৰ অভিলেখ ভংগ কৰি আন এটা অভিলেখ গঢ়িছিল।
৪৪ বছৰীয়া বিনোদ কুমাৰ চৌধুৰীয়ে প্ৰথমে ২০২৩ চনত ২৭.৮০ ছেকেণ্ডত নাকেৰে টাইপ কৰাৰ অভিলেখ গঢ়িছিল। দ্বিতীয়বাৰত তেওঁ ২৬.৭৩ ছেকেণ্ডৰ সময় লৈছিল। তৃতীয় প্ৰচেষ্টাত বিনোদে পুনৰবাৰ নিজৰ পূৰ্বৰ অভিলেখ ভংগ কৰি ২৫.৬৬ ছেকেণ্ডত টাইপিং সম্পূৰ্ণ কৰে।
গিনিজ ৱৰ্ল্ড ৰেকৰ্ডছে শ্বেয়াৰ কৰা ভিডিঅ’টোত দেখা গৈছে যে বিনোদে নাকেৰে কি-বৰ্ডৰ বুটাম টিপি এৰ পৰা জেডলৈ ইংৰাজী আখৰ টাইপ কৰি আছে। প্ৰতিটো আখৰৰ মাজতো স্পেছ এৰি গৈছে। বিনোদে কয় যে তেওঁৰ অভিলেখ ভংগকাৰী কৃতিত্বৰ বাবেই তেওঁক “টাইপিং মেন অৱ ইণ্ডিয়া” বুলি জনা যায়।
বিনোদে কয় যে তেওঁৰ কাম টাইপিঙৰ সৈতে জড়িত, সেয়েহে তেওঁ এই দিশত ৰেকৰ্ড বনোৱাৰ সিদ্ধান্ত লৈছিল আৰু আজি তেওঁৰ হাতত বহু ৰেকৰ্ড আছে। তেওঁ কয় যে পৰিস্থিতি যিয়েই নহওক কিয়, আমি আমাৰ কাম সম্পূৰ্ণ নিষ্ঠাৰে কৰিব লাগে, ইয়াৰ দ্বাৰা সফলতা লাভ কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
