বিশ্ববাসীক আতংকিত কৰি তোলা এক ভয়ংকৰ দৃশ্য ভাইৰেল হৈ পৰিছে সামাজিক মাধ্যমত৷ এগৰাকী মাতৃয়ে নিজৰ তিনিবছৰীয়া কন্যা সন্তানক ভালুকৰ গঁৰাললৈ নিক্ষেপ কৰিছে৷
এই ভয়ংকৰ ঘটনাটো সংঘটিত হৈছে উজবেকিস্তানৰ তাচখণ্ডৰ এখন চিৰিয়াখানাত৷ মাৰ্কিন সংবাদ পত্ৰ নিউয়ৰ্ক প’ষ্টৰ মতে চিৰিয়াখানাৰ ভিতৰত থকা ভালুকৰ গঁৰাললৈ নিজ তিনিবছৰীয়া কন্যাক নিক্ষেপ কৰে এগৰাকী মহিলাই৷ এই সমগ্ৰ দৃশ্য আৱদ্ধ হৈ ৰৈছে চিৰিয়াখানাৰ চিচিটিভি টিভি কেমেৰাত৷
চিৰিয়াখানাৰ জুজু নামৰ ভালুকটোক বন্দী কৰি ৰখা গঁৰালটোৰ ১৬ ফুট তললৈ শিশু কন্যাটিক নিক্ষেপ কৰে মাতৃগৰাকীয়ে৷ ১৬ ফুট তললৈ নিক্ষেপ কৰাৰ ফলত শিশু কন্যাটি মূৰ আৰু হাতত আঘাত পালেও সৌভাগ্যবশতঃ প্ৰাণ ৰক্ষা পোৱা বুলি প্ৰকাশ কৰিছে সংবাদ পত্ৰখনে৷
ইফালে শিশু কন্যাটিক নিক্ষেপ কৰাৰ সময়ত ভালুকটোৱে অন্য দিশলৈ গতি কৰাৰ বাবেও শিশুটি ভালুকটোৰ পৰা ৰক্ষা পৰে৷ ঘটনাটোত প্ৰত্যক্ষ কৰাৰ লগে লগে চিৰিয়াখানাৰ কৰ্মৰত কৰ্মচাৰীয়ে গঁৰালটোৰ পৰা নিৰাপদ অৱস্থাত কন্যা শিশুটিক উদ্ধাৰ কৰে৷ ইয়াৰ পিছতে হাত আৰু মূৰত আঘাত পোৱা কন্যা শিশুটিক স্থানীয় চিকিৎসালয়ত ভর্তি কৰোৱা হয়৷ বৰ্তমান শিশুটি বিপদমুক্ত বুলি জানিব পৰা গৈছে৷
ইফালে বৃটেইনৰ সংবাদ পত্ৰ ডেইলী মিল-এ প্ৰকাশ কৰা অনুসৰি শিশুটিৰ মাতৃগৰাকীৰ পৰিচয় সংবাদ মাধ্যমত ৰাজহুৱা নকৰিলেও তেওঁৰ বিৰুদ্ধে হত্যাৰ চেষ্টাৰ অভিযোগত গোচৰ ৰুজু কৰি গ্ৰেপ্তাৰ কৰা হৈছে৷ যদি মাতৃগৰাকী দোষী সাৱ্যস্ত হয় তেতিয়া অতি কমেও ১৫ বছৰৰ কাৰাবাস খাটিব লাগিব৷
‘‘দৰ্শনাৰ্থীৰ সন্মুখতে এগৰাকী যুৱতীয়ে এটি শিশু কন্যাক ভালুকৰ গঁৰালটোৰ তললৈ নিক্ষেপ কৰে৷’’ চিৰিয়াখানাৰ মুখপাত্ৰই সংবাদ মাধ্যমৰ আগত কয়৷
‘‘কিয় মহিলাগৰাকীয়ে এই কাণ্ড সংঘটিত কৰিলে সেয়া এতিয়াও স্পষ্ট হোৱা নাই৷ দৰ্শনাৰ্থী আৰু চিৰিয়াখানাৰ কৰ্তৃপক্ষই মহিলাগৰাকীৰ এই কাণ্ডক সংঘটিত কৰাৰ পৰা ৰক্ষা কৰিবলৈ চেষ্টা কৰিও আমি ব্যৰ্থ হওঁ৷’’ মুখপাত্ৰগৰাকীয়ে লগতে আৰু কয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
