‘সমাজৰ বিবৰ্তন আৰু সময়ৰ পৰিবৰ্তনশীল স্বভাৱৰ প্ৰতি লক্ষ্য ৰাখিয়েই ভাৰতীয় জনতা পাৰ্টিয়ে দলৰ কাৰ্য্যকৰ্তা আৰু নেতৃত্ব তৈয়াৰ কৰাত সদায় মনোনিবেশন কৰি আহিছে। ব্যাপক ৰাজনৈতিক কৰ্মসূচীৰ আধাৰত দলে কায্যৰ্কতাসকলক গতিশীল কৰি ৰাখে। নিৰ্বাচনী প্ৰচাৰ, জন সম্পৰ্ক, বৌদ্ধিক চৰ্চা আদিৰ মাধ্যমেৰে নতুন প্ৰগতিশীল যুৱ নেতৃত্ব তৈয়াৰ কৰাত দলে সৰ্বাধিক গুৰুত্ব দি আহিছে। অহা ২১ মাৰ্চত অনুষ্ঠিত হবলগীয়া ৰাজ্যসভাৰ নিৰ্বাচনতো দলে এনেবোৰ দিশকে প্ৰাধান্য দিছে’— এই মন্তব্য বিজেপি ৰাজ্যিক মুখপাত্ৰ ৰঞ্জীৱ কুমাৰ শৰ্মাৰ।
শনিবাৰে বিজেপি অসম প্ৰদেশৰ ৰাজ্যিক কাৰ্যালয় অটল বিহাৰী বাজপেয়ী ভবনৰ পৰা সংবাদ মাধ্যমলৈ প্ৰেৰণ কৰা এক বিবৃতিত শ্ৰী শৰ্মাই এনেদৰে মত পোষণ কৰে। সাংস্কৃতিক জগতৰ পৰা এক দশক পূৰ্বে ভাৰতীয় জনতা পাৰ্টিৰ ৰাজনীতিলৈ অহা পবিত্ৰ মাৰ্ঘেৰিটাক দলীয় প্ৰাৰ্থী হিচাপে মনোনীত কৰি দলৰ গতিশীলতা আৰু নেতৃত্ব তৈয়াৰ কৰা প্ৰক্ৰিয়াৰ এটি উৎকৃষ্ট উদাহৰণ দাঙি ধৰা হৈছে বুলি ৰাজ্যিক বিজেপিৰ মুখপাত্ৰ ৰঞ্জীৱ কুমাৰ শৰ্মাই মত পোষণ কৰে।
লগতে পঢ়ক সাগৰৰ পাৰত ২ ডজনতকৈ অধিক তিমিৰ মৃত্যু
আনহাতে, মিত্ৰদল ইউপিপিএলেও প্ৰাক্তন ছাত্ৰ নেতা ৰণগৌৰা নাৰ্জাৰীক ৰাজ্যসভাৰ দ্বিতীয়খন আসনৰ বাবে প্ৰাৰ্থী কৰি ৰাজ্যৰ ৰাজনীতিত নতুন প্ৰজন্মৰ অংশীদাৰ বৃদ্ধি কৰাৰ ক্ষেত্ৰত এক বলিষ্ঠ পদক্ষেপ গ্ৰহণ কৰা বুলি বিজেপি মুখপাত্ৰজনে মতপোষণ কৰে।
পবিত্ৰ মাৰ্ঘেৰিটা আৰু ৰণগৌৰা নাৰ্জাৰীৰ প্ৰাৰ্থীত্বই Rajya Sabha is a House of Seniors বুলি থকা ধাৰণাৰো অন্ত পেলোৱা বুলি বিজেপি মুখপাত্ৰ জনে বিবৃতিটোত উল্লেখ কৰিছে।
বিজেপিৰ মুখপাত্ৰগৰাকীৰ মতে ৰাজ্যসভাৰ প্ৰাৰ্থী দুজন অসমৰ গতিশীল নৱ প্ৰজন্মৰ প্ৰকৃত প্ৰতিনিধি। এনডিএৰ দুযোজন প্ৰাৰ্থীৰ নিশ্চিতভাৱে বিজয়ী হ’ব বুলি দাবী কৰি মুখপাত্ৰ শ্ৰীশৰ্মাই কংগ্ৰেছৰ প্ৰাৰ্থী ৰিপুণ বৰাক ব্যৰ্থ, ভাগৰুৱা, আৰু হতাশাগ্ৰস্ত বুলি বৰ্ণনা কৰে।
লগতে পঢ়ক মহানগৰীৰ মহিলাৰ ব্যক্তিগত মুহূৰ্তৰ ভিডিঅ’ ভাইৰেল কৰি জেইল হাজোতলৈ গ’ল এক যুৱক
বৰ্তমান সময়ত কংগ্ৰেছ দলত নতুনত্ব বুলিবলৈ একো নাই। গান্ধী-ৱাৰ্ডা পৰিযাল আৰু ৰাজ্যই ৰাজ্যই থকা তেওঁলোকৰ স্থাবক সকলক বাদ দি দলটোত আত্মসন্মান থকা এজনো লোক নাই বুলি বিজেপি মুখপাত্ৰ জনে কটাক্ষ্য কৰে।
শৰ্মাৰ মতে কংগ্ৰেছৰ ৰাজ্যসভাৰ প্ৰাৰ্থী ৰিপুণ বৰা কেৱল স্তাৱকেই নহয় আজমল বাহিনীৰ দাঢ়ি, টুপী, বোৰ্খা আৰু লুঙী’ৰ চৰকাৰ বনোৱা তত্ত্বৰো পৃষ্ঠপোষক বুলি কটাক্ষ কৰিছে। অসম আৰু অসমীয়াৰ স্বাভিমানৰ প্ৰতি ভাবুকি সৃষ্টি কৰাত সদায় অৰিহণা যোগাই অহা আজমল বাহিনীৰ নেগুৰত ধৰাৰ বাহিৰে খিলঞ্জীয়া জনসাধাৰণৰ পৰা সম্পূৰ্ণ বিছিন্ন হৈ পৰা কংগ্ৰেছ দলৰ আন কোনো বিকল্পই নাই বুলি শৰ্মাই মত পোষণ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
