পুনৰ অন্য এগৰাকী অকৰ্মণ্য মন্ত্ৰীয়ে ৰাজহুৱা স্থানতে মুখ্যমন্ত্ৰী ডঃ হিমন্ত বিশ্ব শৰ্মাৰ পৰা ধমক খালে৷ এইবাৰ মুখ্যমন্ত্ৰীৰ ধমক খোৱা মন্ত্ৰীগৰাকী হৈছে ৰাজ্যৰ উদ্যোগ আৰু পৰিবহণ মন্ত্ৰী চন্দ্ৰমোহন পাটোৱাৰী৷
আমিনগাঁৱৰ এখন ৰাজহুৱা সভাত মুখ্যমন্ত্ৰী ডঃ হিমন্ত বিশ্ব ৰাজ্যৰ পৰিবহণ মন্ত্ৰী চন্দ্ৰমোহন পাটোৱাৰীৰ পৰিবহণ বিভাগকলৈ তীব্ৰ বিষোদগাৰ প্ৰকাশ কৰিছে৷ আনকি মুখ্যমন্ত্ৰীগৰাকীয়ে মন্ত্ৰী চন্দ্ৰমোহন পাটোৱাৰীক আৰু ১০ দিনৰ সময়সীমা দিছে৷
মুখ্যমন্ত্ৰীয়ে কয় যে ৰাজ্যৰ পৰিবহণ বিভাগ বহু পিছপৰি আছে৷ বিমল বৰাৰ পৰ্যটন বিভাগৰ দৰে মন্ত্ৰী চন্দ্ৰমোহন পাটোৱাৰীৰ পৰিবহণ বিভাগ আগবাঢ়িব পৰা নাই, বৰং বহুখিনি পিছ পৰি আছে৷ পৰিবহণ মন্ত্ৰী তথা তেওঁ বিভাগে উন্নয়নৰ প্ৰতিযোগিতাৰ দৌৰত অংশ লওক৷
লগতে পঢ়ক কি নাম ৰাখিলে প্ৰিয়ংকা চোপ্ৰা-নিক জোনাছৰ নৱজাতিকা কন্যাৰ নাম?
মুখ্যমন্ত্ৰীৰ ঘোষণা অনুসৰি কোভিডকালীন সময়ত পৰিবহন খণ্ডৰ চালক হেণ্ডিমেনক এককালীন সাহায্য প্ৰদান কৰাৰ কথা আছিল৷ মুখ্যমন্ত্ৰীৰ অভিযোগ অনুসৰি পৰিবহণ বিভাগৰ মন্ত্ৰী চন্দ্ৰমোহন পাটোৱাৰীয়ে আজিলৈকে তাৰ তালিকা প্ৰস্তুত কৰিব নোৱাৰাৰ বাবে তেওঁৰ চৰকাৰে সেই এককালীন সাহায্য প্ৰদান কৰিব পৰা নাই৷
মুখ্যমন্ত্ৰীয়ে ৰাজহুৱাভাৱে মন্ত্ৰী চন্দ্ৰ মোহন পাটোৱাৰীক ১০ দিনৰ সময়সীমা বান্ধি দি শীঘ্ৰেই উক্ত তালিকা প্ৰস্তুত কৰিবলৈ নিৰ্দেশ দিছে৷ মুখ্যমন্ত্ৰীৰ এই ধমকৰ সময়ত পৰিবহণ মন্ত্ৰী চন্দ্ৰমোহন পাটোৱাৰীও মঞ্চত উপস্থিত আছিল৷
উল্লেখ্য যে ইয়াৰ পূৰ্বে তামুলপুৰৰ উপ নিৰ্বাচনৰ সময়ত পঞ্চায়ত আৰু গ্ৰামোন্নয়ন মন্ত্ৰী ৰঞ্জিত দাসে মুখ্যমন্ত্ৰীৰ পৰা মঞ্চতে তদ্ৰূপ ধমক খাইছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
