সকলোৰে বাবে জন্মদিনটো জীৱনৰ অন্যতম বিশেষ দিন৷ আৰু যদি কাৰোবাৰ বাবে সেই দিনটো ১০০ বছৰীয়া জন্মদিন হয়! তেতিয়া সেই দিনটো কিমান বিশেষ হ’ব পাৰে সেয়া বৰ্ণনাৰো হয়তো প্ৰয়োজন নাই৷
কিন্তু যদি কোনোবাই তেওঁৰ ১০০ বছৰীয়া জন্মদিন উদযাপন কৰিবলৈ গ্ৰেপ্তাৰ বৰণ কৰিবলগীয়া হয় তেতিয়া বাৰু কেনে লাগিব! ঠিক তেনে খবৰেই সংবাদ মাধ্যমত এতিয়া প্ৰকাশ পাইছে৷ প্ৰকাশিত খবৰৰ মতে এগৰাকী অষ্ট্ৰেলিয়ান মহিলাই তেওঁৰ ১০০ বছৰীয়া জন্মদিনতে গ্ৰেপ্তাৰ হ’ল।
এই ঘটনাটো অষ্ট্ৰেলিয়াৰ ভিক্টোৰিয়াৰ। অষ্ট্ৰেলিয়াৰ সংবাদ মাধ্যমৰ খবৰ অনুসৰি, ভিক্টোৰিয়া আৰক্ষীয়ে নিজেই নিজৰ ছ’চিয়েল মিডিয়াৰ পেজত মহিলাগৰাকীৰ গ্ৰেপ্তাৰ কৰা ফ’টো এখন শ্বেয়াৰ কৰিছে। তাত কোৱা হৈছে যে জিন বিকটন নামৰ এগৰাকী মহিলাক তেওঁৰ কিছুমান বিশেষ বন্ধু-বান্ধৱী আৰু পৰিয়ালৰ সদস্যৰ সৈতে জন্মদিন উদযাপন কৰি থকাৰ সময়তে গ্ৰেপ্তাৰ কৰা হৈছে।
লগতে পঢ়ক ৰক্ষাবন্ধনৰ দিনাই নাবালিকা ভগ্নীক ধৰ্ষণ, হত্যা দুই সম্পৰ্কীয় ভাতৃৰ; আইতাককো ধৰ্ষণ
কিন্তু অতি তাৎপৰ্যপূৰ্ণ কথাটো হৈছে যে মহিলাগৰাকীৰ নিজ ইচ্ছাৰ বাবেই এইদৰে গ্ৰেপ্তাৰ কৰা হয়। আচলতে মহিলাগৰাকীৰ বয়সে এশ বছৰ স্পৰ্শ কৰিলেও তেওঁক কেতিয়াও আৰক্ষীৰ হাতত গ্ৰেপ্তাৰ কৰা হোৱা নাছিল৷
সেয়ে নিজেই ইচ্ছা প্ৰকাশ কৰিছিল যে তেওঁক আৰক্ষীয়ে এবাৰ গ্ৰেপ্তাৰ কৰক আৰু ইয়াৰ বাবেই তেওঁৰ পৰিয়ালৰ লোকসকলেও মহিলাগৰাকীক গ্ৰেপ্তাৰৰ বাবে এইধৰণেৰে ব্যৱস্থা কৰি দিছিল।
অৱশ্যে কিছু সময়ৰ পিছতে মহিলাগৰাকীক মুকলি কৰি দিয়া হয়। আৰক্ষীয়ে জনোৱা মতে, ভিক্টোৰিয়াৰ গাৰ্ডেনছ ৰেচিডেন্সিয়েলত থকা মহিলাগৰাকীৰ ঘৰত তিনিজন যুৱ কনিষ্টবলে মহিলাগৰাকীৰ হাতত লাহে লাহে হেণ্ডকাফ লগাই আনুষ্ঠানিকভাৱে গ্ৰেপ্তাৰ কৰা বুলি ঘোষণা কৰে। ইয়াৰ পিছত সকলোৱে একেলগে জন্মদিন উদযাপন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
