অসম লাইভ ২৪ঃ জে’লৰ ভিতৰত কয়দীয়ে মোবাইল ফোন ৰখা অভিযোগ নতুন নহয়৷ সময়ে সময়ে দেশৰ বহু জে’লৰ কয়দীৰ পৰা অবৈধভাৱে ৰখা মোবাইল জব্দ কৰি আহিছে৷ কিন্তু শেহতীয়াভাৱে দিল্লীৰ তিহাৰ জেলত পোহৰলৈ আহিছে এটা অদ্ভুত ঘটনা৷ জে’লৰখনৰ এজন কয়দীৰ পেটৰ পৰা চিকিৎসকে উলিয়াইছে দুটাকৈ মোবাইল৷ কয়দীজনৰ পেটত এতিয়াও দুবিধ অন্য বস্তু আছে, যিটোৰ বিষয়ে চিকিৎসকে পৰীক্ষা কৰি আছে আৰু শীঘ্ৰে সেয়াও বাহিৰ কৰিব৷
দৰাচলতে আগষ্ট মাহত তিহাৰ কাৰাগাৰত মোবাইল বিক্ৰীৰ সন্দৰ্ভত জে’ল কৰ্তৃপক্ষই গোপন তথ্য লাভ কৰিছিল। ইয়াৰ পিছতে তিহাৰত নিৰাপত্তা ব্যৱস্থাও কটকটীয়া কৰা হয়। প্ৰতিজন কয়দীক সূক্ষ্মভাৱে পৰীক্ষা কৰা হৈছিল৷ সেই সময়তে ১ নম্বৰ জেলত বন্দী হৈ থকা এজন কাৰাবন্দীয়ে তেওঁৰ পেটত মোবাইল থকাৰ কথা বিষয়াসকলক জনায়।
তাৰ পাছতে কাৰাগাৰ প্ৰশাসনে কয়দীজনক জিম্মাত লৈ তেওঁৰ চিকিৎসা পৰীক্ষা কৰোৱায়৷ পৰীক্ষাত কয়দীজনৰ পেটত মোবাইল থকাৰ তথ্য জানিব পাৰে৷ ইয়াৰ পিছতে কয়দীজনক জিবি পন্ত হাস্পতালত ভৰ্তি কৰোৱা হয়। য’ত বুধবাৰে বন্দীজনৰ পেটৰ পৰা দুটা মোবাইল উলিওৱা হয়৷
কাৰাগাৰ প্ৰশাসনৰ মতে, কয়দীজনক হত্যা-ডকাইতিৰ গোচৰত অভিযুক্ত আছিল৷ কিছুদিন পূৰ্বে তেওঁ আদালতৰ তাৰিখত জে’লৰ পৰা ওলাই গৈছিল। এই সময়তে অন্য কাৰাবন্দীক যোগান ধৰাৰ উদ্দেশ্যৰে মোবাইলটো গিলি জে’ললৈ আহে। কিন্তু ভিতৰলৈ অহাৰ পিছত তেওঁ ফোনটো উলিয়াব নোৱৰাত তীব্ৰ পেটৰ বিষত ভুগিবলৈ ধৰে৷ অৱশেষত উপায়হীন কয়দীজনে নিজেই বিষয়াসকলক এই বিষয়ে অৱগত কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
