অসম লাইভ২৪ঃ চিনেমাৰ কাহিনীৰ দৰে এটা দুৰ্ঘটনা। কৰো বুলিয়েই কৰি পেলাইছিল এই দুৰ্ঘটনাটো। দুৰ্ঘটনাটো সংঘটিত হোৱাৰ ৮ বছৰ সম্পূৰ্ণ হৈছে। এই বিমান দুৰ্ঘটনাক লৈ সেই সময়ত চলিছিল বিশ্বজুৰি চৰ্চা। সকলোৰেই সন্দেহৰ আৱৰ্তত থকা এই দুৰ্ঘটনাটো বলীউডৰ কাহিনীতকৈ কোনোগুণে কম নহয়।
এয়া আছিল এটা বিমান দুৰ্ঘটনা। ৮ বছৰ পূৰ্বে সংঘটিত এই দুৰ্ঘটনাত প্ৰাণ হেৰুৱাইছিল প্ৰায় ২৩৯ জন লোকে। এয়াৰলাইন্সৰ ফ্লাইট এমএইছ৩৭০। বিমানখনৰ কোনো বিজুটি নথকাকৈ হঠাতেই বিমানখন দুৰ্ঘটনাত পতিত হয়। এজনো যাত্ৰী এই দুৰ্ঘটনাত জীৱন্তে উদ্ধাৰ হোৱা নাছিল। উল্লেখ্য যে সেই দুৰ্ঘটনাটো বিমান চালকজনে জানিবুজিয়েই সংঘটিত কৰিছিল৷ ইতিহাসৰ সবাতোকৈ ভয়াৱহ দুৰ্ঘটনাৰ ভিতৰত এটা এই দুৰ্ঘটনা৷ ২০১৪ চনৰ ৮ মাৰ্চত কুয়ালা লামপুৰৰ পৰা বেজিং বিমান বন্দৰ অভিমুখে ৰাওনা হৈছিল এমএইছ৩৭০ নামৰ বিমানখন৷ আকাশৰ প্ৰায় ৩৮ মিনিট উৰণৰ পাছত এয়াৰ ট্ৰেফিক কণ্ট্ৰলৰ পৰা যোগাযোগ বিচ্ছিন্ন হৈছিল বিমানখনৰ৷ প্ৰায় এঘণ্টা সময় যোগাযোগ বিচ্ছিন্ন হৈ আকাশত উৰি থকাৰ সময়তে মালয়েছিয়া সোনাবাহিনীৰ ট্ৰেফিক কণ্ট্ৰলে সন্ধান পাইছিল বিমানখনৰ৷ কিন্তু বিমান চালকজনে সকলো গম পাইয়ো যাৱলগীয়া পথেৰে যাত্ৰা কৰা নাছিল৷ পৰিকল্পিতভাৱেই পশ্চিম দিশত থকা আন্দামান সাগৰৰ দিশে যাত্ৰা কৰিছিল বিমানখন৷
আন্দামান সাগৰ অতিক্ৰম কৰাৰ পাছত আৰু কোনো সন্ধান পোৱা নগ’ল বিমানখনৰ৷ সেনাৰ ট্ৰেফিক চিগনেলেও ট্ৰেক কৰিব নোৱাৰিলে বিমানখনক৷ বিমানখন যিহেতু এখন যাত্ৰীবাহী বিমান আছিল, হেৰাই যোৱাৰ সময়ত বিমানখনত আছিল ২২৭ জন যাত্ৰী আৰু ১২ জন বিমান কৰ্মী৷ যাত্ৰীৰ মাজত আছিল ৫ জন কৈ ভাৰতীয় নাগৰিকো৷ হেৰাই যোৱা এই বিমানখনক বিচাৰি অভিযান অব্যাহত ৰাখিলে মালয়েছিয়াৰ সেনাই৷ পাছলৈ দক্ষিণ চীন সাগৰ আৰু আন্দামান সাগৰত বিমানখনৰ ভগ্নাৱশেষ বিচাৰি অভিযান চলাবলৈ নিৰ্দেশ দিয়ে মালয়েছিয়া চৰকাৰে৷ এই অভিযানত এমএইচ৩৭০-ৰ কিছু ভগ্নাৱশেষ উদ্ধাৰ হ’ল যদিও বিমানখনৰ বেছিভাগ অংশই উদ্ধাৰ নহ’ল৷
উল্লেখ্য যে অসামৰিক বিমান পৰিবহন ইতিহাসৰ সকলোতকৈ ব্যয়বহুল উদ্ধাৰ অভিযান বুলিও এই অভিযানকেই ধৰা হয়৷ উপগ্ৰহৰ মাধ্যমেৰে বিমানৰ সৈতে যোগাযোগ কৰোৱাটো ব্যয়বহুল অভিযানৰ ভিতৰত এটা৷ এই দুৰ্ঘটনাৰ ৮ বছৰ পাৰ হৈ গ’লেও দুৰ্ঘটনাটো কিয় সংঘটিত কৰিলে সেই সম্পৰ্কে জনা নাযায়৷ এই সময়ত বিষয়টোৱে চৰ্চা লাভ কৰাৰ আৰু এটা কাৰণ হৈছে কিছুদিন পূৰ্বে মাদাগাস্কাৰৰ এজন মৎস্যজীৱিয়ে মাছ মাৰি থকাৰ সময়তে বিমানৰ ভঙা টুকুৰা লাভ কৰিছে৷ এই টুকুৰাটো সেই বিমানখনৰেই বুলি প্ৰকাশ কৰিছে ব্ৰিটিছ সংবাদপত্ৰ ‘ইণ্ডিপেণ্ডেণ্টে’৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
